அரைத்த மாவையே.. அத்தைக்கு மீசை முளைத்தால் சித்தப்பா...நடிகர் விஜய் தவெக குறித்து முத்தரசன் கிண்டல்!
தஞ்சாவூர்: தமிழக வெற்றிக் கழகத்தின் தலைவர் நடிகர் விஜய், ஏற்கனவே அரைத்த மாவையே அரைத்துக் கொண்டிருக்கிறார்; மாவுதான் வீணாகப் போகும் என்று திமுக கூட்டணிக் கட்சியான இந்திய கம்யூனிஸ்ட் கட்சியின் தமிழ் மாநிலச் செயலாளர் முத்தரசன் விமர்சித்துள்ளார். மேலும் திமுகவை எதிர்ப்பதற்காகவே கட்சியை தொடங்கி இருப்பதால் திமுகவை எதிர்த்து நடிகர் விஜய் பேசுகிறார் என்றும் முத்தரசன் தெரிவித்துள்ளார்.
தமிழக வெற்றிக் கழகத்தின் தலைவர் நடிகர் விஜய் அண்மையில் விக்கிரவாண்டி வி.சாலையில் மாநாடு நடத்தினார். இந்த மாநாட்டில் பிளவுவாத மற்றும் திராவிட மாடல் அரசுதான் எதிரிகள் என்றார். ஆனால் பாஜக பெயரை சொல்லவில்லை.
சென்னையில் நேற்று நடைபெற்ற தமிழக வெற்றிக் கழகத்தின் செயற்குழுக் கூட்டத்தில் 26 தீர்மானங்கள் நிறைவேற்றப்பட்டன. இந்த தீர்மானங்கள் பலவற்றிலும் திமுக அரசு என விமர்சிக்கப்பட்டு எதிர்ப்பு தெரிவிக்கப்பட்டிருந்தது. ஒரே ஒரு தீர்மானத்தில் மட்டும் ஒன்றிய பாஜக அரசு குறிப்பிடப்பட்டிருந்தது. பெரும்பாலான தீர்மானங்களில் பாஜக என்பதை தவிர்த்துவிட்டு ஒன்றிய அரசு மட்டுமே என இடம் பெற்றிருந்தது.
விக்கிரவாண்டி மாநாட்டில் ஆட்சியிலும் அதிகாரத்திலும் பங்கு என நடிகர் விஜய் அழைப்பு விடுத்த நிலையில் திமுக கூட்டணி கட்சிகளுக்குதான் வலைவீசுகிறார் என்கிற விமர்சனங்கள் முன்வைக்கப்பட்டன. ஆனால் நடிகர் விஜய்யின் இந்த அழைப்பை திமுக கூட்டணியில் உள்ள விடுதலைச் சிறுத்தைகள் கட்சி கடுமையாக விமர்சித்தது.
இந்த நிலையில் சென்னையில் இன்று நிகழ்ச்சி ஒன்றில் பேசிய திமுக தலைவரும் முதல்வருமான மு.க.ஸ்டாலின், வர்றவன் போறவன்.. புதியதாக கட்சி தொடங்குகிறவன் எல்லாம் திமுக ஒழியனும் அழியனும் என நினைக்கிறாங்க என மறைமுகமாக நடிகர் விஜய்யை விமர்சித்திருந்தார்.
இதேபோல கும்பகோணத்தில் இன்று செய்தியாளர்களை திமுக கூட்டணிக் கட்சியான இந்திய கம்யூனிஸ்ட் கட்சியின் தமிழ் மாநிலச் செயலாளர் இரா.முத்தரசன் சந்தித்தார். அப்போது நடிகர் விஜய் குறித்து கேள்விகள் கேட்கப்பட்டன. இதற்கு பதிலளித்த முத்தரசன், திமுகவை எதிர்க்கவே விஜய் கட்சியை தொடங்கி இருக்கிறார். அதனால் திமுகவை எதிர்த்து பேசுகிறார். விஜய் அரைத்த மாவையே அரைத்து கொண்டிருக்கிறார்; இதனால் மாவுதான் வீணாகும் என்றார்.
மேலும் கூட்டணி ஆட்சி குறித்து விஜய் பேசியிருப்பது, அத்தைக்கு மீசை முளைத்தால் சித்தப்பா என்றுதான் அழைப்போம் என கிண்டலாகப் பதிலளித்தார். விஜய் கூட்டணியில் விசிக இணையுமா என்ற கேள்விக்கு, விசிக தலைவர் திருமாவளவன்தான் இதற்கு பதிலளிக்க வேண்டும்; அவர்தான் அந்த கட்சியின் தலைவர் என்று பதிலளித்தார் இரா.முத்தரசன்.
Click it and Unblock the Notifications
Sign in with Google