சாவர்க்கர்-புல்புல் பஞ்சாயத்து.. இபிஎஸ்ஐ இழுத்துவிட்ட “தங்கம்” பறந்தாரா? தவழ்ந்தாரா? ஓ பிளாஷ்பேக்கா

தேனி: ஆர்.எஸ்.எஸ். தலைவர் சாவர்க்கர் புல் புல் பறவையில் பறந்தாரா அல்லது எடப்பாடி பழனிசாமியைபோல் தவழ்ந்து சென்றாரா என்பதை உலகம் அறியும் என திமுக மாவட்ட செயலாளர் தங்க தமிழ்செல்வன் தெரிவித்து உள்ளார்.

கர்நாடக கல்வி நிலையங்களில் மதம் சார்ந்த அடையாளங்கள் இருக்கக்கூடாது என்று இஸ்லாமிய மாணவிகள் அணிந்து வரக்கூடிய ஹிஜாபுக்கு அம்மாநில அரசு தடை விதித்தது.

இந்த நிலையில், பள்ளி மாணவர்களுக்கு வழங்கப்படும் சமூக அறிவியல் மற்றும் மொழி பாடபுத்தகங்களில் உள்ள பாடங்களை திருத்தம் செய்ய ரோகித் சக்ரதிர்தா என்பவர் தலைமையில் கர்நாடக அரசு குழு அமைத்தது.

பெரியார் பாடம் நீக்கம்

இந்த புதிய குழு, வரும் கல்வியாண்டுக்கான மொழி மற்றும் சமூக அறிவியல் பாடப்புத்தகங்களில் மைசூர் மன்னர் திப்பு சுல்தான் போன்ற சுதந்திர போராட்ட வீரர்கள், தந்தை பெரியார், நாராயண குரு உள்ளிட்ட சீர்திருத்தவாதிகள், முற்போக்கு கருத்து கொண்ட தலைவர்கள் குறித்த பாடங்கள் அகற்றியதாக குற்றச்சாட்டுகள் எழுந்தன.

ஆர்.எஸ்.எஸ். கல்வி

அதற்கு மாற்றாக ஆர்.எஸ்.எஸ். சித்தாந்தங்களையும், மதவெறியையும் போதிக்கூடிய பாடங்கள் புதிய புத்தகங்களில் சேர்க்கப்பட்டு இருப்பதாக சர்ச்சை கிளம்பியது. குறிப்பாக ஆர்.எஸ்.எஸ். நிறுவனர் கேஷவ் பலிராம் ஹேட்கேவர், சாவர்க்கர் குறித்த பாடங்கள் கர்நாடக அரசு வெளியிட்டு இருக்கும் பள்ளி பாட புத்தகங்களில் இடம் இருப்பதாக புகார்கள் குவிந்தன.

சாவர்க்கர் சர்ச்சை

இந்த நிலையில் கர்நாடக மாநில பாடத்திட்டத்தில் உள்ள 8 ஆம் வகுப்பு கன்னட மொழி பாடப்புத்தகத்தில் ''அந்தமான் சிறைச்சாலையில் சாவர்க்கர் அடைக்கப்பட்டு இருந்த சிறிய அறையில் சிறிய துளை கூட கிடையாது. ஆனால், அவரது அறைக்கு எப்படியோ ஒரு புல் புல் பறவை வந்து விடும். அந்த பறவையின் சிறகின் மீது ஏறி அமரும் சாவர்க்கர் தினமும் தாய் மண்ணிற்கு வந்து செல்வார்.'' என்று குறிப்பிடப்பட்டு இருந்தது.

தங்க தமிழ்செல்வன் டுவீட்

இதுகுறித்து முன்னாள் சட்டமன்ற, நாடாளுமன்ற உறுப்பினரும் தேனி வடக்கு மாவட்ட திமுக செயலாளருமான தங்க தமிழ்செல்வன் ட்விட்டரில் பதிவிட்டுள்ளார். அதில், " புல்புல் பறவையின் இறக்கையில் பறந்து சென்றார் சாவர்க்கர் என்று கர்நாடக பாஜக அரசு பாடப்புத்தகத்தில் ஆர்.எஸ்.எஸ். கல்விக் கொள்கையை திணித்துள்ளது. சாவர்க்கர் பறந்து சென்றாரா இல்லை இபிஎஸ் போல தவழ்ந்து சென்றாரா என்று உலகம் அறியும்." என குறிப்பிட்டு உள்ளார்.

English summary

Savarkar Bul Bul bird issue, Thanga Tamilselvan tweet about EPS: ஆர்.எஸ்.எஸ். தலைவர் சாவர்க்கர் புல் புல் பறவையில் பறந்தாரா அல்லது எடப்பாடி பழனிசாமியைபோல் தவழ்ந்து சென்றாரா என்பதை உலகம் அறியும் என திமுக மாவட்ட செயலாளர் தங்க தமிழ்செல்வன் தெரிவித்து உள்ளார்.