திருப்பதி தேவஸ்தான சேவை.. பக்தர்கள் கருத்து தெரிவிக்க கொண்டு வரப்பட்ட சூப்பர் திட்டம்

Updated: Sunday, May 4, 2025, 8:50 [IST]

Subscribe to Oneindia Tamil

திருப்பதி: திருப்பதி தேவஸ்தானத்தின் சேவைகள் குறித்து பக்தர்கள் தங்களுடைய கருத்துகளைத் தெரிவிக்கும் வகையில், திருப்பதியில் பல்வேறு இடங்களில் கியூஆர் கோடு ஸ்டிக்கர்கள் ஒட்டப்பட்டுள்ளன. இந்த கியூ ஆர் கோடினை ஸ்கேன் செய்து பக்தர்கள் டெக்ஸ்டாகவோ, வீடியோவாகவோ தங்களுடைய கருத்தை தெரிவிக்கும் முறை அறிமுகம் செய்யப்பட்டுள்ளது.

திருப்பதிக்குச் சென்றால் வாழ்க்கையில் கண்டிப்பாக நல்ல ஒரு திருப்பம் ஏற்படும் என்பது பக்தர்களின் நம்பிக்கையாக உள்ளது. இதனால், திருமலை திருப்பதி வெங்கடாஜலபதியை தரிசனம் செய்ய தினந்தோறும் ஆயிரக்கணக்கானோர் வருகை தருகிறார்கள். சிறப்பு நாட்கள், பண்டிகை காலங்களில் லட்சக்கணக்கானோர் வருகை தருவது வழக்கம். தமிழகம் உள்ளிட்ட பல்வேறு மாநிலங்கள், வெளிநாட்டினர் என எந்த நேரத்திலும் ஏழுமலையானை ஏராளமான பக்தர்கள் தரிசித்து வருவதால் கூட்டம் அதிகரித்து காணப்படுகிறது.

தங்கம், வெள்ளி, வெளிநாட்டு கரன்சிகள், நாணயங்கள் என கோடிக் கணக்கில் பக்தர்கள் ஏழுமலையானுக்கு காணிக்கையாக செலுத்துகின்றனர். திருப்பதி தேவஸ்தானம் சார்பில் பல்வேறு சேவைகள் பக்தர்களுக்கு அளிக்கப்பட்டு வருகிறது. இந்நிலையில், திருப்பதி தேவஸ்தானத்தின் சேவைகள் குறித்து பக்தர்கள் தங்களுடைய கருத்துகளைத் தெரிவிக்கும் வகையில், திருப்பதியில் பல்வேறு இடங்களில் கியூஆர் கோடு ஸ்டிக்கர்கள் ஒட்டப்பட்டுள்ளன.

இந்த கியூ ஆர் கோடினை ஸ்கேன் செய்து பக்தர்கள் டெக்ஸ்டாகவோ, வீடியோவாகவோ தங்களுடைய கருத்தை தெரிவிக்கும் முறை அறிமுகம் செய்யப்பட்டுள்ளது.

இதுகுறித்து திருமலை திருப்பதி தேவஸ்தானம் சார்பில் வெளியிடப்பட்டுள்ள செய்திக் குறிப்பில் கூறியுள்ளதாவது: திருமலை திருப்பதியில் ஏழுமலையானை தரிசனம் செய்வதற்காக ஏராளமான பக்தர்கள் வருகை தருகின்றனர். திருப்பதி ஏழுமலையானை தரிசிக்க வரும் பக்தர்களுக்குச் சிறந்த சேவைகளை வழங்க தேவஸ்தானம் நடவடிக்கைகள் எடுக்கப்பட்டு வருகின்றன.

தேவஸ்தானத்தின் சேவைகள் குறித்து பக்தர்கள் கருத்துகளைத் தெரிவிக்கும் வகையில் தேவஸ்தானம் கியூஆர் கோடினை அறிமுகம் செய்து, அதை ஸ்டிக்கராக உருவாக்கி திருமலை, திருப்பதியில் பல்வேறு இடங்களில் ஒட்டப்பட்டுள்ளன. பக்தர்களுக்கு ஏதேனும் குறைகள் தென்பட்டால் செல்போன் மூலமாக கியூஆர் கோடினை ஸ்கேன் செய்து வாட்ஸ்-அப் மூலம் தங்களது கருத்துகளை எளிதாக தெரிவிக்கலாம்.

பக்தர்கள் தங்களின் பெயர், பகுதியை அதில் குறிப்பிட வேண்டும். அன்னப்பிரசாதம், தூய்மை, கல்யாண கட்டா, லட்டு பிரசாதம், லக்கேஜ், தரிசன அனுபவம், தரிசன வரிசை, அறைகள் போன்றவற்றில் உள்ள குறைகளை தெரிவிக்கலாம்.

பக்தர்கள் தங்களின் கருத்தை வெளிப்படுத்த உரை அல்லது வீடியோ வடிவத்தை தேர்வு செய்து அனுப்பலாம். அதில் தேவஸ்தான சேவைகள் தரமானது, சிறப்பானது, சராசரி, மேலும் மேம்பாடு தேவை அல்லது நன்றாக இல்லை, எனக் குறிப்பிடப்பட வேண்டும். பக்தர்கள் தங்கள் கருத்தை அதிகபட்சமாக 600 எழுத்துகளுக்குள் தட்டச்சு செய்யலாம் அல்லது வீடியோவாக பதிவேற்றம் செய்யலாம்.

கருத்தைச் சமர்ப்பித்த உடனேயே, "உங்கள் கருத்து வெற்றிகரமாகப் பதிவு செய்யப்பட்டது, உங்கள் மதிப்புமிக்க கருத்துகளுக்கு நன்றி" என உறுதிப்படுத்தும் செய்தியைப் பெறுவீர்கள். திருப்பதி தேவஸ்தானம் பக்தர்களிடம் இருந்து பெறப்பட்ட கருத்துகளை கருத்தில் கொண்டு சேவைகளின் தரத்தை மேம்படுத்த உரிய நடவடிக்கைகள் எடுக்கப்படும் என்று தெரிவிக்கப்பட்டுள்ளது.