எடப்பாடி பழனிசாமியின் “வலது கரத்துக்கு” சுத்து போட்ட ஐ.டி அதிகாரிகள்.. இளங்கோவன் கல்லூரியில் ரெய்டு!

Updated: Wednesday, October 23, 2024, 12:33 [IST]

Subscribe to Oneindia Tamil

திருச்சி: திருச்சி மாவட்டம் முசிறி அருகே உள்ள தனியார் கல்லூரியில் வருமான வரித்துறை அதிகாரிகள் திடீர் சோதனை மேற்கொண்டுள்ளனர். இந்தக் கல்லூரி, எதிர்க்கட்சித் தலைவர் எடப்பாடி பழனிசாமியின் நெருங்கிய நண்பரும், அதிமுக நிர்வாகியுமான இளங்கோவனுக்கு சொந்தமானது என்பது குறிப்பிடத்தக்கது.

முன்னாள் முதலமைச்சரும், எதிர்க்கட்சித் தலைவருமான எடப்பாடி பழனிசாமிக்கு நெருக்கமான ஆர்.இளங்கோவன், சேலம் மத்திய கூட்டுறவு வங்கியின் தலைவராகவும், தமிழ்நாடு மாநில வங்கியின் தலைவராகவும் பதவி வகித்தவர். தற்போது சேலம் புறநகர் மாவட்ட அதிமுக செயலாளராக பொறுப்பு வகித்து வருகிறார்.

கடந்த 2012 ஆம் ஆண்டு முதல் சேலம் புறநகர் மாவட்ட செயலாளர் பதவியில் இருந்து வந்தார் எடப்பாடி பழனிசாமி. முதலமைச்சராக இருந்தபோதும், மாவட்ட செயலாளர் பதவியையும் தானே வைத்திருந்தார் எடப்பாடி பழனிசாமி. இந்நிலையில் கடந்த 2022 ஆம் ஆண்டு திடீரென்று தனது பதவியை இளங்கோவனுக்கு விட்டுக் கொடுத்தார். அந்த அளவுக்கு தனது வலது கரமாக இளங்கோவனை வைத்துள்ளார் எடப்பாடி பழனிசாமி.

இந்நிலையில், திருச்சி மாவட்டம் முசிறியில் உள்ள எம்.ஐ.டி பாலிடெக்னிக் கல்லூரி மற்றும் வேளாண் பொறியியல் கல்லூரிகளில் வருமான வரித்துறை அதிகாரிகள் இன்று திடீர் சோதனை மேற்கொண்டுள்ளனர்.

சேலம் இளங்கோவன் வருமானத்திற்கு அதிகமாக 3 கோடியே 78 லட்சத்து 31 ஆயிரத்து 755 ரூபாய்க்கு சொத்துகளை சேர்த்ததாக லஞ்ச ஒழிப்பு துறையினர் வழக்குப்பதிவு செய்து, ஏற்கனவே இளங்கோவனுக்கு சொந்தமான பல்வேறு இடங்களில் சோதனை நடத்தியுள்ளது குறிப்பிடத்தக்கது.