அடேங்கப்பா.. இவ்வளவு வசதிகளா?அசர வைக்கும் திருச்சி விமான நிலையத்தின் 2வது முனையம்! எப்போது திறப்பு?

திருச்சி: திருச்சி விமான நிலையத்தின் 2வது முனையம் திறப்பு விழாவுக்கு தயாராகிவிட்ட நிலையில், அதில் இடம்பெற்றுள்ள சிறப்பம்சங்கள் அனைத்தும் மலைக்க வைக்கின்றன.

திருச்சி பன்னாட்டு விமான நிலையத்தில் புதிதாக 2வது முனையம் கட்டுவதற்காக இந்திய வி்மான நிலைய ஆணையக் குழுமத்தால் ரூ.951 கோடி ஒதுக்கீடு செய்யப்பட்டு கடந்த 2019ஆம் ஆண்டு பிப்ரவரி மாதம் கட்டுமானப் பணிகள் தொடங்கப்பட்டன. இந்தப் பணிகளை 2021ஆம் ஆண்டு செப்டம்பர் மாதத்திற்குள் முடிக்க திட்டமிடப்பட்ட நிலையில் ஒரு வழியாக 5 ஆண்டுகள் கழித்து இப்போது பணிகள் முடிக்கப்பட்டுள்ளன. இதனால் விரைவில் திறப்பு விழா நடத்தப்படும் என எதிர்பார்க்கப்படுகிறது.

அநேகமாக வரும் ஜனவரி மாதம் பிரதமர் மோடி திறந்த வைக்கக் கூடும் எனத் தெரிவிக்கப்படுகிறது. மொத்தம் 60,723 சதுரமீட்டர் பரப்பளவில் கட்டப்பட்டுள்ள இந்த 2வது முனையமானது 2 அடுக்குகளைக் கொண்டதாக திகழ்கிறது. இதில் ஒரே நேரத்தில் உள்நாடு, வெளிநாடு என மொத்தமாக சேர்த்து 6,000 பயணிகளை கையாள முடியும் என்பது கூடுதல் தகவலாகும்.

திருச்சி விமான நிலையத்தின் 2வது முனையத்தில் புறப்பாடு பகுதியில் 10 வாயில்களும் வருகை பகுதியில் 6 வாயில்களும் அமைக்கப்பட்டுள்ளன. மேலும், 15 எக்ஸ்ரே சோதனை மையங்கள், 3 சுங்கப்பிரிவு மையங்கள்,40 இமிகிரிஷேன் மையங்கள், 48 செக் இன் மையங்கள், 3 விஐபி காத்திருப்பு அறைகள், 26 இடங்களில் லிப்ட், 1,000 கார் பார்க்கிங் வசதி என சிறப்பமசங்களின் லிஸ்ட் நீள்கின்றன.

இன்னும் இதில் ஹைலைட் என்னவென்றால் ஸ்ரீரங்கம் ராஜகோபுரத்தை 2முனையத்தின் நுழைவு வாயிலில் அமைத்திருப்பது தான். இது வெளிநாட்டு மற்றும் வெளிமாநில பயணிகளை கவரும் வகையில் அமைந்துள்ளன. மேலும், சோலார் மூலம் மின்சாரம் பெறத்தக்க வகையில் விமானநிலையத்தின் 2வது முனைய மேற்கூரைகள் அமைக்கப்பட்டுள்ளன. அதே போல் 75 கோடி ரூபாய் செலவில் கண்காணிப்பு கோபுரத்துடன் கூடிய வான் கட்டுப்பாட்டு அறை அமைக்கப்பட்டு வருகிறது.

எல்லாம் சரி, திருச்சி விமான நிலையத்துக்கு எதற்கு 2வது முனையம் என்ற கேள்வி பலருக்கும் எழும். திருச்சியை பொறுத்தவரை தமிழ்நாட்டின் மத்தியப் பகுதியில் அமைந்துள்ள வளரும் மாநகரமாகும். சென்னை, கோவைக்கு இணையாக திருச்சி மாநகரத்தின் உள்கட்டமைப்பு அசுர வளர்ச்சி அடைந்து வருகிறது. விமான சேவைகளும் நாளுக்கு நாள் அதிகரித்த வண்ணம் உள்ளன. திருச்சி ஹைதரபாத், திருச்சி டெல்லி, திருச்சி வியட்நாம் என நேரடி விமான சேவைகள் இப்போது அதிகரிக்கப்பட்டுள்ளன.

இன்னும் வரும் நாட்களில் இந்தியாவின் பல்வேறு நகரங்களுக்கும், உலகின் பல நாடுகளுக்கும் விமான சேவைகள் தொடங்கப்படவுள்ளன. இதனால் திருச்சி விமான நிலையத்துக்கு 2வது முனையம் தேவை என்பது காலத்தின் அவசியமாக பார்க்கப்படுகிறது.

English summary

As Trichy Airport's Terminal 2 is all set for inauguration, all the highlights are mind-boggling.