பட்டியல் பெண் சமைத்து சாப்பிடுவதா.. பிள்ளைகளிடம் விஷத்தை பரப்பிய பெற்றோர்.. சமையல் பெண் வேதனை

தூத்துக்குடி: சாதி பார்க்குறாங்க; பிள்ளைங்கள அவங்க பெற்றோர்களே சாப்பிட விட மாட்றாங்க' என தூத்துக்குடி மாவட்டம் உசிலம்பட்டி கிராமத்தில் உள்ள அரசு தொடக்கப்பள்ளியில் முதலமைச்சரின் காலை உணவு திட்டத்தில் சமைக்கும் முனிய செல்வி வேதனை தெரிவித்துள்ளார்.

தூத்துக்குடி மாவட்டம் கோவில்பட்டி அருகே உசிலம்பட்டி என்ற கிராமத்தில் ஊராட்சி ஒன்றிய தொடக்கப்பள்ளி இயங்கி வருகிறது. இங்கு முதலமைச்சரின் காலை உணவு திட்டத்திற்கு முனிய செல்வி என்ற பெண் சமைக்கிறார். இவர் பட்டியல் இனத்தை சேர்ந்த பெண் ஆவார்.

இதனால் அந்த பள்ளியில் படிக்கும் மாணவர்களின் பெற்றோர் தங்கள் பிள்ளைகள், எஸ்சி பெண் சமைத்து சாப்பிடுவதா என்று கூறி சாப்பிடவிட மறுத்துள்ளார்கள். 11 மாணவர்களின் பெற்றோர் தங்கள் பிள்ளைகள் சாப்பிடவிட மறுத்த புகாரின் பேரில் கோட்டாட்சியர் ஜேன் கிறிஸ்டி பாய் தலைமையில் வருவாய்துறை அதிகாரிகள் நேரில் வந்து பெற்றோரிடம் பேச்சுவார்த்தை நடத்தினார்கள்.

இதனிடையே சமையலர் முனிய செல்வி பிரபல தமிழ் செய்தி ஊடகம் ஒன்றுக்கு அளித்த பேட்டியில், என் பெயர் முனிய செல்வி, ஊராட்சி ஒன்றிய துவக்கப்பள்ளியில் வேலை பார்க்கிறேன். என்னுடைய பையன் இங்குதான் படிக்கிறான். முதலமைச்சரின் காலை உணவு திட்டத்தில் என்னை தேர்வு செய்தார்கள். தகுதியின் அடிப்படையில் தான் என்னை வேலைக்கு சேர்த்தார்கள்.

அப்படியிருக்கையில் கடந்த 25ம் தேதி நான் வேலையில் சேர்ந்தேன். அப்போது இருந்து இன்று வரை இரண்டு பிள்ளைகள் தான் சாப்பிடுகிறார்கள். 11 பிள்ளைங்க இங்க இருக்காங்க.. ஆனால் சாப்பிடுவது இல்லை.. ஏன் என்று கேட்ட போது, ஏற்கனவே இந்த ஊரில் பிரச்சனை ஏற்பட்டது. உடனே ஊரில் இருந்த பெரியவர்கள் என்னிடம் பேசினார்கள்..நீ, பிள்ளைகளை சாப்பிட வற்புறுத்தக்கூடாது.. பிள்ளைகள் சாப்பிடாது. தேவையில்லாத பிரச்சனை செய்ய கூடாது என்றார்கள்.

நான் சைலண்டாக இருந்து கொண்டேன்.. ஆனால் இடையிலேயே பிரச்சனை வந்தது.. நான் சமையல் செய்யும் போதே பிரச்சனை வந்தது.காலையில் வந்து நான் பருப்பை அலசுவேன்.. பருப்பு தண்ணீரை கூட கொட்டக்கூடாது என்று சொல்கிறார்கள்.. சாதி பார்த்து இப்படி நடந்து கொள்கிறார்கள்.. என் மனசு அன்றே உடைந்துவிட்டது. நான் அதையும் விட்டுட்டேன்.. வியாழக்கிழமை என்று என் பையன் சாப்பிட்டுக்கொண்டிருந்தான்.. ஒரு பையன் சாப்பிட ஆசைப்பட்டான்.. ஆனால் பெற்றோர் தடுக்குறாங்க.. சாதி பார்த்துக்கொண்டு சாப்பிட விடமாட்றாங்க " என வேதனையுடன் முனிய செல்வி தெரிவித்தார்.

English summary

The woman who cooks at the Chief Minister's breakfast program at a government primary school in Usilambatti village of Tuticorin district said, "They look at caste and their parents don't let them eat."