அலறிய அமெரிக்கா.. டிரம்ப் அடித்த அந்தர்பல்டி.. H-1B விசா கட்டணத்தில் டாக்டர்களுக்கு விலக்கு! பின்னணி
வாஷிங்டன்: அமெரிக்காவில் உள்ள நிறுவனங்களில் அமெரிக்கர்களுக்கே முன்னுரிமை அளிக்கும் வகையில் வெளிநாட்டில் இருந்து பணி நிமித்தமாக வருவோருக்கு வழங்கப்படும் எச் 1பி விசா கட்டணத்தை டொனால்ட் டிரம்ப் ரூ.88 லட்சமாக உயர்த்தினார். இதனால் நம் நாட்டில் இருந்து அமெரிக்காவுக்கு பணிக்காக செல்வோர் பெரிய அளவில் பாதிக்கப்பட உள்ளனர். இந்நிலையில் தான் டிரம்பின் இந்த அறிவிப்பு அமெரிக்காவுக்கே ஆபத்தாக மாறி உள்ளது. இதனால் எச் 1பி விசா கட்டண உயர்வில் டாக்டர்களுக்கு விலக்கு அளிக்க முடிவு செய்யப்பட்டுள்ளது.
வெளிநாடுகளை சேர்ந்தவர்கள் அமெரிக்காவுக்கு சென்று பணியாற்றும் வகையில் எச் 1 பி விசா வழங்கப்பட்டு வருகிறது. இதன் காலஅவகாசம் 3 ஆண்டுகளாகும். அதன்பிறகு 3 ஆண்டுகள் நீட்டித்து கொள்ளலாம். இதற்கான கட்டணம் ரூ.1.75 லட்சமாக இருந்தது. ஆனால் இந்த கட்டணத்தை டொனால்ட் டிரம்ப் ரூ.88 லட்சமாக அதிகரித்துள்ளார்.
இதனால் வெளிநாடுகளில் இருந்து அமெரிக்கா சென்று பணியாற்றுவோருக்கு புதிய சிக்கல் ஏற்பட்டுள்ளது. இனி வரும் நாட்களில் வெளிநாட்டினர் அமெரிக்காவுக்கு சென்று பணியாற்ற முடியாத நிலை உருவாகி உள்ளது. ரூ.88 லட்சம் கட்டணம் செலுத்தினால் மட்டுமே அவர்களால் எச் 1பி விசாவை பெற முடியும்.
அமெரிக்காவின் எச் 1பி விசா திட்டத்தில் இந்தியர்கள் தான் அதிகம் பயனடைந்து வந்தனர். எச் 1பி விசாவை அமெரிக்காவில் பயன்படுத்தும் வெளிநாட்டினரில் 71 சதவீதம் பேர் இந்தியர்களாக உள்ளன. இதனால் டிரம்பின் இந்த நடவடிக்கை அமெரிக்கா சென்று பணியாற்ற வேண்டும் என்ற கனவில் உள்ளவர்களுக்கு பெரும் சிக்கலை ஏற்படுத்தி உள்ளது. இருப்பினும் ஏற்கனவே எச்-1பி விசா வைத்திருப்போர் அல்லது புதுப்பிப்பவர்களுக்கு இந்த கட்டண உயர்வு பொருந்தாது எனவும் இது ஒருமுறை மட்டுமே செலுத்தும் கட்டணம் எனவும் அமெரிக்க அரசு விளக்கம் அளித்தது.
இந்த நிலையில் எச்-1பி விசா கட்டண உயர்வில் இருந்து டாக்டர்களுக்கு விலக்கு அளிக்க பரிசீலிக்கப்பட்டு வருவதாக தகவல் வெளியாகி உள்ளது. அமெரிக்காவில் ஏற்கனவே கிராம பகுதிகளில் டாக்டர்கள் பற்றாக்குறை உள்ளது. இப்படியான சூழலில் வெளிநாட்டில் இருந்து வரும் டாக்டர்கள் உள்ளிட்ட மருத்துவ பணியாளர்களால் இந்த தொகையை செலுத்த முடியாது. இதனால் அவர்களுக்கு விலக்கு அளிக்க வேண்டும் என்ற கோரிக்கை எழுந்தது.
இதையடுத்து விசா கட்டண உயர்வில் டாக்டர்கள் மற்றும் மருத்துவ பணியாளர்களுக்கு விலக்கு அளிக்க முடிவு செய்யப்பட்டுள்ளதாக கூறப்படுகிறது. இது தொடர்பாக வெள்ளை மாளிகை செய்தித் தொடர்பாளர் டெய்லர் ரோஜர்ஸ் கூறும் போது, "அதிபர் டிரம்ப்பின் விசா கட்டண உயர்வில் சில விலக்குகள் அளிக்கப்பட உள்ளன. அதில் டாக்டர்கள் மற்றும் மருத்துவப் பணியாளர்கள் அடங்குவார்கள் என்று தெரிவித்தார்.
Click it and Unblock the Notifications
Sign in with Google