அமெரிக்க போர் விமானத்தை சுட்டு வீழ்த்திய ஈரான்.. விமானியை உயிருடன் பிடித்து கொடுப்பவருக்கு பரிசு அறிவிப்பு

Updated: Saturday, April 4, 2026, 11:35 [IST]

Subscribe to Oneindia Tamil

வாஷிங்டன்: அமெரிக்க போர் விமானத்தை ஈரான் சுட்டு வீழ்த்திய நிலையில், அதில் சென்ற ஒரு விமானியின் கதி என்ன என்று தெரியவில்லை. அமெரிக்க போர் விமானியை உயிருடன் பிடித்தால் பரிசு தரப்படும் என்று ஈரான் அறிவித்துள்ளது. அமெரிக்காவும் விமானியை முழு வீச்சில் தேடி வருகிறது.

ஈரான் - அமெரிக்கா இடையேயான போர் இரண்டாவது மாதத்தை எட்டியுள்ளது. போரை முடிவுக்கு கொண்டுவர ஒரு பக்கம் பேச்சுவார்த்தை நடப்பதாக அமெரிக்க கூறிவந்தாலும் இன்னொரு பக்கம் இருநாடுகளும் கடுமையாக மோதி வருகின்றன.

Iran Announces Reward to Capture US Pilots After Jet Downing

சுட்டு வீழ்த்திய ஈரான்

ஈரான் மீது அடுத்த இரண்டு வாரங்களுக்கு கடுமையான தாக்குதல் நடத்துவோம் அந்த நாட்டை கற்காலத்திற்கே திருப்பி அனுப்புவோம் என்று சூளுரைத்த டிரம்ப், தாக்குதலை தீவிரப்படுத்தி வருகிறார். அமெரிக்காவின் தாக்குதலுக்கு ஈரானும் வளைகுடா நாடுகள் மீது தாக்குதலை தீவிரப்படுத்தியுள்ளது. இந்த நிலையில்தான், அமெரிக்காவிற்கு சொந்தமான இரண்டு போர் விமானங்களை ஈரான் சுட்டு வீழ்த்தியுள்ளது.

விமானியின் கதி என்ன?

அமெரிக்காவின் அதி நவீன போர் விமானமான எப் -15 இ என்ற ஜெட் சுட்டு வீழ்த்தப்பட்டது. இரண்டு பேர் பயணிக்க கூடிய இந்த ஜெட் போர் விமானம் ஈரானில் சுட்டு வீழ்த்தப்பட்ட நிலையில், அதில் இருந்த ஒரு விமானியை அமெரிக்கா மீட்டுள்ளது. இன்னொரு வீரர் இன்னும் மீட்கப்படவில்லை என்று அமெரிக்க ஊடகங்கள் தெரிவித்துள்ளன.

அதேபோல, ஏ 10 போர் விமானம் குவைத்தில் விழுந்து விபத்தில் சிக்கியது. இதில் இருந்து விமானி வெளியே குதித்தார். இதற்கிடையே, அமெரிக்க போர் விமானத்தில் இருந்து மாயமாகியுள்ள ஒரு விமானியை தேடும் பணியில் ஈடுபட்டு இருந்த அமெரிக்காவின் இரண்டு ஹெலிகாப்டர் மீதும் ஈரான் தாக்குதல் நடத்தியுள்ளது. எனினும், இந்த ஹெலிகாப்டர்கள் ஈரான் வான்பரப்பை தாண்டி வந்துவிட்டது.

பரிசு அறிவித்த ஈரான்

அமெரிக்க போர் விமானத்தில் இருந்து குதித்த விமானியை உயிருடன் பிடித்து கொடுத்தால் பரிசு தரப்படும் என்று ஈரான் அறிவித்துள்ளது. தென்மேற்கு ஈரானில் விமானம் விழுந்த இடத்திற்கு அருகிலுள்ள பகுதியை சல்லடை போட்டுத் தேடி வருவதாக ஈரானின் புரட்சிகரப் பாதுகாப்புப் படை தெரிவித்துள்ளது.

ஈரான் நாடாளுமன்ற சபாநாயகர் மொஹம்மத் பகேர் கலிபாஃப் கூறுகையில், "அமெரிக்கா மற்றும் இஸ்ரேல் நடத்திய போர் ஆட்சிமாற்றம் செய்யும் நோக்கிலிருந்து, அவர்களின் விமானிகளை தேடும் நிலைக்கு தள்ளப்பட்டு இருக்கிறது" என்று அமெரிக்காவை விமர்சித்தார்.