நெட்ஃபிளிக்ஸ் ஓடிடியில் கலக்கும் பிரியங்கா மோகனின் மேட் இன் கொரியா.. நாகார்ஜுனாவின் பாராட்டை பாருங்க

Updated: Wednesday, March 18, 2026, 13:03 [IST]

Subscribe to Oneindia Tamil

சென்னை: ஒடிடி தளங்களில் அமைதியாக வெளியாகி பிறகு, மெதுவாக கவனம் பெற்றுக் கொண்டிருக்கும் தமிழ் படம் மேட் இன் கொரியா, தற்போது பெரிய அளவில் பேசப்படத் தொடங்கியுள்ளது. இதற்கு முக்கிய காரணமாக அமைந்துள்ளது நாகார்ஜுனா வழங்கிய பாராட்டு.

Netflix தளத்தில் வெளியாகியுள்ள இந்த படம், வெளியான போது பெரிய பரபரப்பு இல்லாமல் சென்றாலும், இப்போது சமூக வலைதளங்களில் மீண்டும் கவனத்தை ஈர்த்து வருகிறது.

நாகார்ஜுனா பாராட்டு

தன்னுடைய X தளத்தில் இந்த படத்தை பார்த்த அனுபவத்தை பகிர்ந்த நாகார்ஜுனா, இந்த படத்தை "உற்சாகமூட்டும்" மற்றும் "மனதிற்கு இதமான" அனுபவமாக வர்ணித்துள்ளார். மேலும், இன்றைய மன அழுத்தமான சூழலில் இப்படம் ஒரு நல்ல மன நிம்மதியை தரக்கூடியதாக உள்ளது என்றும் குறிப்பிட்டுள்ளார். ஒரு முன்னணி நடிகர் இப்படியாக நேரடியாக பாராட்டியது, இந்த படத்தை மீண்டும் பேச வைக்கும் காரணமாகியுள்ளது.

இயக்குநருக்கு கிடைத்த அங்கீகாரம்

இந்த படத்தை இயக்கியவர் ரா. கார்த்திக். ஒரு எளிய கதையை உணர்ச்சியுடன் சொல்ல முயற்சித்ததற்காக அவரை நாகார்ஜுனா பாராட்டியுள்ளார். இதற்கு பதிலளித்த ரா. கார்த்திக், இந்த பாராட்டு தனக்கு மிகவும் முக்கியமானது என்றும், இது தனது பணிக்கு கிடைத்த பெரிய அங்கீகாரம் என்றும் தெரிவித்துள்ளார்.

கதையின் மையம்

மேட் இன் கொரியா திரைப்படம் ஒரு இளம் பெண்ணின் வாழ்க்கைப் பயணத்தை மையமாகக் கொண்டது. இதில் பிரியங்கா மோகன் 'ஷென்பா' என்ற கதாபாத்திரத்தில் நடித்துள்ளார். கொரியாவைப் பற்றிய ஒரு தனி ஈர்ப்புடன் வாழும் ஒரு பெண். அந்த நாட்டிற்கு சென்று அங்கு வாழ்க்கையை அமைத்துக் கொள்ள வேண்டும் என்பது அவளுடைய பெரிய கனவு. அவள் கொரிய கலாச்சாரம், உணவு, வாழ்க்கை முறை ஆகியவற்றை மிகவும் விரும்புகிறாள் என்று படம் ஆரம்பத்தில் சொல்லப்படுகிறது.

அவளுடைய வாழ்க்கையில் காதலனாக நடித்துள்ள ரிஷிகாந்த் முக்கிய பங்கு வகிக்கிறார். அவருடன் சேர்ந்து எதிர்காலத்தை உருவாக்க வேண்டும் என்று நினைக்கும் நிலையில், எதிர்பாராத துரோகம் அவளுடைய கனவுகளை சிதைத்து விடுகிறது.

இதனால் மனதளவில் உடைந்து போகும் ஷென்பா, தனிமையில் தள்ளப்படுகிறார். ஆனால் படம் அங்கேயே நின்றுவிடவில்லை. அதன் பிறகு தான் அவளுடைய உண்மையான வாழ்க்கைப் பயணம் தொடங்குகிறது.

கொரியாவில் தொடங்கும் புதிய வாழ்க்கை

ஷென்பா இறுதியாக கொரியாவுக்கு செல்லும் போது, அவள் எதிர்பார்த்த வாழ்க்கை கிடைக்கவில்லை. ஒரு வெளிநாட்டில் தனியாக வாழ வேண்டிய சூழ்நிலை, மொழி பிரச்சனை, கலாச்சார வேறுபாடு அவளுக்கு புதிய சவாலாக மாறுகிறது.

அவள் அங்கே சிலருடன் நட்பு கொள்ள முயற்சிக்கிறார். சிலர் அவளுக்கு உதவுகின்றனர். சிலர் அவளது வாழ்க்கையில் புதிதாக மாற்றங்களை கொண்டு வருகிறார்கள். ஒரு வயதான பெண்ணுடன் உருவாகும் உறவு, அவளது வாழ்க்கையில் ஒரு முக்கிய திருப்பமாக அமைகிறது. அதே நேரத்தில், தனது கடந்தகாலத்தை மறந்து, புதிய வாழ்க்கையை ஏற்க முயற்சிக்கும் அவளின் மனநிலையும் படத்தில் காட்டப்படுகிறது.

அடையாளம் தேடும் பெண்

இந்த படம் முழுக்க ஒரு "identity search" கதையாக நகர்கிறது. "நான் யார்? "என்ன தான் நான் விரும்புறேன்?" "என் வாழ்க்கை எங்கே போகுது?" என்ற கேள்விகளுக்கான பதிலை தேடும் ஒரு பெண்ணின் உள்ளார்ந்த பயணமாக இது சொல்லப்படுகிறது.

விமர்சனங்கள்

இந்த படத்திற்கு கலவையான விமர்சனங்கள் கிடைத்துள்ளன. கதை மற்றும் கருத்து நல்லதாக இருந்தாலும், அந்த உணர்வுகளை பார்வையாளர்களிடம் முழுமையாக கொண்டு செல்லவில்லை என்ற குற்றச்சாட்டு உள்ளது. குறிப்பாக, கொரியாவின் பின்னணி இன்னும் ஆழமாக பயன்படுத்தப்படவில்லை என்றும் கூறப்படுகிறது.

சில காட்சிகள் மிகவும் அழகாக இருந்தாலும், முழு படமாக அது ஒரே அளவிலான தாக்கத்தை கொடுக்கவில்லை என்ற கருத்தும் நிலவுகிறது.

ஆனால், பிரியங்கா மோகனின் நடிப்பு படத்தின் பலமாக பார்க்கப்படுகிறது. குறிப்பாக லைட் மோமென்ட்ஸ் மற்றும் இயல்பான காட்சிகளில் அவர் சிறப்பாக நடித்துள்ளதாக சொல்லப்படுகிறது.