Retta Thala OTT: சைலண்டாக ஓடிடிக்கு வந்த அருண் விஜயின் ரெட்டை தல.. அதுவும் இந்த தளத்தில் பார்க்கலாம்!

சென்னை: அருண் விஜய் நடிப்பில் கடந்த ஆண்டு டிசம்பர் 25ஆம் தேதி திரையரங்குகளில் வெளியான 'ரெட்ட தல' திரைப்படம் தற்போது ஓடிடி தளத்தில் வெளியாகி கவனம் பெற்றுள்ளது. திரையரங்கு வெளியீட்டின்போது பெரிய அளவில் பேசப்படாமல் போன இந்த படம், இப்போது ஓடிடி ரிலீஸால் மீண்டும் ரசிகர்களிடையே விவாதத்தை ஏற்படுத்தியுள்ளது.

கிறிஸ்துமஸ் விடுமுறையை முன்னிட்டு வெளியான 'ரெட்ட தல', அருண் விஜய்க்கு சவாலான இரட்டை வேடத்தை கொண்ட படம். இதில் அவர் காளி மற்றும் மல்பே உபேந்திரா என்ற இரண்டு மாறுபட்ட கேரக்டரில் நடித்துள்ளார். பாண்டிச்சேரி தெருக்களில் வாழும் காளி, வாழ்க்கையில் முன்னேற வேண்டும் என்ற கனவுடன் போராடும் இளைஞன்.

காளியின் காதலி, வாழ்க்கையில் பணமே முக்கியம் என்ற எண்ணத்துடன் இருப்பவள். இந்த வேறுபட்ட மனநிலையே கதையின் மையமாக நகர்கிறது. ஒரு கட்டத்தில், காளி தனது உருவத்தைப் போலவே இருக்கும் செல்வந்தரான மல்பே உபேந்திராவை சந்திக்கிறான். அப்போது, உபேந்திராவை கொன்று அவனது இடத்தை பிடித்து ஆடம்பர வாழ்க்கையை அனுபவிக்கலாம் என்ற அபாயகரமான யோசனையை காளியின் காதலி முன்வைக்கிறாள்.

அதன் பின்னர் காளி அந்த திட்டத்தை நிறைவேற்றுகிறானா, அதன் விளைவாக அவன் வாழ்க்கையில் என்னென்ன சிக்கல்கள் ஏற்படுகின்றன என்பதே 'ரெட்ட தல' படத்தின் மீதிக்கதை. இந்த படத்தில் அருண் விஜய்க்கு ஜோடியாக சித்தி இத்னானி மற்றும் தன்யா ரவிச்சந்திரன் நடித்துள்ளனர்.

இவர்களுடன் யோகி பாபு, ஜான் விஜய், ஹரீஷ் பேரடி, பாலாஜி முருகதாஸ் உள்ளிட்ட பலரும் முக்கிய கதாபாத்திரங்களில் நடித்துள்ளனர். படத்தை கிரிஸ் திருமுகுமார் எழுதி இயக்கியுள்ளார். சாம் சி.எஸ் இசையமைப்பாளராக பணியாற்றியுள்ள இந்த படத்திற்கு, டிஜோ டோமி ஒளிப்பதிவையும், ஆன்டனி எடிட்டிங்கையும் மேற்கொண்டுள்ளனர்.

வசூல் ரீதியாக பார்த்தால், 'ரெட்ட தல' திரைப்படம் திரையரங்குகளில் சுமார் ரூ.3.7 கோடி வசூல் செய்ததாக பாக்ஸ் ஆபீஸ் தகவல்கள் தெரிவிக்கின்றன. கிறிஸ்துமஸ் விடுமுறை காலத்தில் வெளியான போதிலும், ரசிகர்களிடம் எதிர்பார்த்த அளவிற்கு பெரிய தாக்கத்தை இந்த படம் ஏற்படுத்தவில்லை. அதே சமயம், விக்ரம் பிரபு நடித்த 'சிறை' திரைப்படத்துடன் ஏற்பட்ட நேரடி போட்டியும் வசூல் குறைவதற்கு ஒரு காரணமாக சொல்லப்படுகிறது.

இந்நிலையில், தற்போது அமேசான் பிரைம் வீடியோ ஓடிடி தளத்தில் 'ரெட்ட தல' திரைப்படம் ஸ்ட்ரீமாகி வருகிறது. எந்தவித முன் அறிவிப்பும் இல்லாமல் சர்ப்ரைஸாக வெளியான இந்த ஓடிடி ரிலீஸ், திரையரங்கில் பார்க்க தவறிய ரசிகர்களுக்கு வீட்டிலிருந்தே படம் பார்க்கும் வாய்ப்பை உருவாக்கியுள்ளது.

இரட்டை வேடம், ஆசை, பேராசை மற்றும் அதன் விளைவுகள் ஆகியவற்றை மையமாக கொண்டு உருவான 'ரெட்ட தல', ஓடிடி பார்வையாளர்களிடம் நல்ல வரவேற்பை பெறுமா என்ற எதிர்பார்ப்பு தற்போது உருவாகியுள்ளது.

English summary

Retta Thala OTT: Actor Arun Vijay’s film Retta Thala, which was released in theatres on December 25 last year, has now made its OTT debut on Amazon Prime Video, bringing the movie back into the spotlight. Directed by Kris Thirukumaran, the film features Arun Vijay in a challenging dual role as Kaali, a struggling youth from Puducherry, and Malpe Upendra, a wealthy businessman. The story revolves around ambition, greed, and moral conflict, as Kaali’s lover pushes him toward a dangerous plan to kill his lookalike and take over his luxurious life. While the film received mixed responses during its theatrical run and collected around Rs 3.7 crore at the box office, it failed to create a major impact due to strong competition and moderate word of mouth. Featuring performances by Siddhi Idnani, Tanya Ravichandran, Yogi Babu, John Vijay, and others, Retta Thala now hopes to find a wider audience through its OTT release, especially among viewers who missed it in theatres.