Thengai Paal Satham: ஆப்பத்துக்கு தொட்டுக்கறது இருக்கட்டும்! தேங்காய் பால் வைத்து சாதம் செய்யலாமா?

Thengai Paal Satham Recipe: தேங்காய் பாலை ஆப்பத்துக்கும், இடியாப்பத்திற்கும் தொட்டு சாப்பிட்டிருப்பீர்கள், இல்லாவிட்டால் அப்படியே சர்க்கரை சேர்த்தும் குடித்திருப்பீர்கள். ஆனால் அந்த தேங்காய்ப் பாலில் ஒரு சூப்பரான சாதம் செய்யலாம்.

தேங்காய் பால் வயிற்று புண்களை ஆற்றும். வயிறு தொடர்பான பிரச்சினைகளை நீக்கும். தேங்காய் பால் உடலுக்கு குளிர்ச்சியை தரும். இந்த தேங்காயை அரைத்து அதிலிருந்து பால் எடுத்து அதில் சர்க்கரை, ஏலக்காய் தட்டி போட்டு இடியாப்பத்திற்கும் ஆப்பத்திற்கும் தொட்டு சாப்பிட்டிருப்பீர்கள்.

ஆனால் அந்த தேங்காய் பாலை வைத்து ஒரு சூப்பரான சாதம் செய்யலாம். தேவையான பொருட்கள் என்னென்ன என்பதை பார்க்கலாம்.

தேவையான பொருட்கள்

தேங்காய் பால் - 2 கப்
அரிசி- 1 கப்
வெங்காயம்- 2 நீளவாக்கில் நறுக்கியது
பச்சை மிளகாய் -2 கீரியது
பிரிஞ்சி இலை - 1
பட்டை - அரை துண்டு
ஏலக்காய் - 2
சோம்பு- அரை டீஸ்பூன்
கிராம்பு-3
இஞ்சி பூண்டு பேஸ்ட் -2 ஸ்பூன்
உப்பு, எண்ணெய், நெய் - தேவைக்கேற்ப
புதினா, மல்லி- ஒரு கைப்பிடி

செய்முறை

ஒரு வாணலியில் எண்ணெய், நெய் ஊற்றி அதில் பட்டை, சோம்பு, கிராம்பு, பிரிஞ்சி இலை சேர்த்து வதக்கவும்.

பின்னர் அதில் வெங்காயத்தை போட்டு நன்கு வதக்கிவிட்டு பின்னர் பச்சை மிளகாய் சேர்க்கவும்.

அதன் பிறகு மல்லி, புதினா தழைகளை சேர்த்து நன்றாக வதக்கிவிட்டுக் கொள்ளவும்.

இந்த பொருட்கள் வதங்கும் நேரத்தில் 1 கப் அரிசியை நன்கு கழுவி ஊற வைத்துக் கொள்ளுங்கள். அரிசி பாஸ்மதியாக இருக்கலாம், பச்சை அரிசி, பொன்னி என உங்கள் விருப்பம் போல் எடுத்து ஊற வையுங்கள்.

பின்னர் வெங்காயம் வதங்கியதும் அதில் இஞ்சி பூண்டு பேஸ்ட் போட்டு அதையும் வதக்கிவிட்டு தேங்காய் பாலை சேர்க்கவும். அது ஒரு கொதி வந்ததும் அரிசியை தண்ணீரில் இருந்து வடிகட்டி சேர்க்கவும். பின்னர் உப்பு சேர்த்துவிட்டு ஒரு விசில் வந்ததும் இறக்கிவிடவும்.

இந்த சூப்பரான தேங்காய் பாலுக்கு வெங்காய ரைத்தா நன்றாக இருக்கும். இல்லாவிட்டால் குருமா குழம்பு கூட தொட்டுக் கொள்ளலாம்.

பிரிஞ்சி சாதம் செய்யும் போது 1-க்கு இரு பங்கு தண்ணீர் ஊற்றுவீர்கள். அது போல் தேங்காய் பால் சாதத்திற்கும் 1 பங்கு அரிசிக்கு 2 பங்கு தேங்காய் பால் சேர்க்க வேண்டும்.

2 பங்கில் ஒரு பங்கு தேங்காய் பாலும், மற்றொரு பங்கு தண்ணீரையும் கூட சேர்க்கலாம்.

ஒரு வேளை நீங்கள் அரைத்த தேங்காய் பால் ஒன்றரை கப் மட்டும்தான் கொடுத்தது என்றால் மீதி அரை கப் தண்ணீர் சேர்த்துக் கொள்ளலாம்.