பீர்க்கங்காய் பொரியல், கூட்டு செய்யும் போது தோலை தூக்கி எறியாதீங்க! சூப்பரான துவையல் செய்யலாம்!
சென்னை: பீர்க்கங்காய் பயன்படுத்தும் போது அதன் தோலை தூக்கி தூர எறியாதீங்க, அதை வைத்து ஒரு சூப்பரான துவையல் செய்யலாமா? இதை வைத்து சூடான சாதம், இட்லி, தோசைக்கு தொட்டு சாப்பிட்டால் அட்டகாசமாக இருக்கும்.
பீர்க்கங்காய் என்பது கொடி வகையிலான காய்கறியாகும். இதை வைத்து கூட்டு, பொரியல் செய்யலாம். இந்த பீர்க்கங்காயின் தோல் முறைப்பாக இருக்கும் என்பதால் தோலை சீவிவிட்டுதான் பயன்படுத்த வேண்டும்.
பீர்க்கங்காய் சட்டென சீக்கிரம் வெந்துவிடும் என்பதால் இதற்கு நிறைய தண்ணீரை ஊற்றி வேகவிடக் கூடாது. பொரியல் செய்ய சற்று பெரிது பெரிதாக வெட்டி, வாணலியில் எண்ணெய் விட்டு கடுகு, சிவந்த மிளகாய் போட்டு பின்னர் வெட்டி வைத்த காயை போட்டு வதக்கி விடவும்.
அதில் மஞ்சள் தூள், உப்பு சேர்த்து மூடி போட்டு வேகவிடலாம். இல்லாவிட்டால் தண்ணீரை சிறிது சிறிதாக தெளித்து வேகவிடவும். வெந்ததும் அப்படியே சாப்பிட்டாலும் சரி, துருவிய தேங்காயை கலந்தாலும் சரி அட்டகாசம்தான்.
சரி! தோலை என்ன செய்யலாம் என்பதை பார்க்கலாம். தோல் துவையல் செய்ய தேவையான பொருட்கள் என்னென்ன தெரியுமா?
கடலைப் பருப்பு- 1 டேபிள் ஸ்பூன்
உளுத்தம் பருப்பு- 1 டேபிள் ஸ்பூன்
பூண்டு - 10 பல்
காய்ந்த மிளகாய்- 3
பீர்க்கங்காய் தோல்- ஒரு கப்
உப்பு, எண்ணெய் - தேவையான அளவு
மஞ்சள் தூள்- 1 சிட்டிகை
புளி- சுண்டக்காய் சைஸ்
செய்முறை
- சீவிய தோலை நன்கு கழுவி தண்ணீரை வடித்துவிட வேண்டும்.
- ஒரு வாணலியில் எண்ணெய் விட்டு அது காய்ந்ததும் கடலை பருப்பு, உளுத்தம் பருப்பு போட்டு வறுக்கவும், பின்னர் காய்ந்த மிளகாய் போடவும்.
- பூண்டு பற்களை போட்டு வதக்கி, பீர்க்கங்காய் தோலை போடவும். அதன் நிறம் மாறும் வரை வதக்கி, மஞ்சள் தூள், உப்பு, சேர்த்து கடைசியில் புளி போட்டு ஆறவிடவும்.
- ஆறிய கலவையை மிக்ஸியிலோ அல்லது அம்மியிலோ போட்டு கொரகொரப்பாக அரைத்தால் சூப்பரான துவையல் ரெடி. இதில் கடுகு தாளித்து கொட்டலாம். இல்லாவிட்டால் அப்படியே சாப்பிடலாம்.
- தேவைப்பட்டால் வெங்காயம், தக்காளியை தலா ஒன்று எடுத்து அதையும் வதக்கி சேர்த்து அரைத்துக் கொள்ளலாம். துருவிய தேங்காய் 1 டேபிள் ஸ்பூன் போட்டு அதையும் வதக்கி அரைக்கலாம். எப்படியிருந்தாலும் இந்த துவையல் அல்டிமேட்டாக இருக்கும்.
Click it and Unblock the Notifications
Sign in with Google