Mutton kola urundai: ருசியான செட்டிநாடு மட்டன் கோலா உருண்டை.. இப்படி செய்து பாருங்க

Mutton kola urundai: குழந்தைகள் முதல் பெரியவர்களை வரை விரும்பி உண்ணும் செட்டிநாடு ஸ்பெஷல் மட்டன் கோலா உருண்டை செய்வது எப்படி என்று தெரிந்து கொள்ளலாம்.

அசைவம் என்றாலே மட்டன் தான், பிரியாணி என்றாலே மட்டன் பிரியாணி தான் என்று பல அசைவப் பிரியர்கள் கூறுவதைக் கேட்டிருப்போம். அந்த அளவுக்கு ஆட்டுக் கறியின் சுவை அருமையாக இருக்கும். பெரும்பாலும் குழந்தைகள் சிக்கனைத் தான் விரும்பி சாப்பிடுவார்கள். சிக்கன் 65, சில்லி சிக்கன், சிக்கன் குழம்பு போன்றவற்றையே சாப்பிடுவார்கள். ஆனால், மட்டனே பிடிக்காத குழந்தைகளும் விரும்பி உண்ணும் இந்த செட்டிநாடு ஸ்பெஷல் மட்டன் கோலா உருண்டையை செய்து கொடுத்துப் பாருங்கள். கண்டிப்பாக பாராட்டுகள் குவியும்.

தேவையான பொருட்கள்

கொத்துக்கறி - 750 கிராம்

பெரிய வெங்காயம் - 4

பொட்டுக் கடலை - 7 ஸ்பூன்

கசகசா - 2 ஸ்பூன்

சோம்பு - 1 ஸ்பூன்

தேங்காய்த் துருவல் - முக்கால் கப்

முட்டை - ஒன்று

பச்சை மிளகாய் - 7

பட்டை - 1

இஞ்சி - சிறு துண்டு

பூண்டு - 10 பல்

மஞ்சள்தூள் - தேவையான அளவு

செய்முறை

1. முதலில் துருவிய தேங்காய், பொட்டுக்கடலை, கசகசா ஆகியவற்றை மிக்ஸியில் அரைத்து எடுத்துக் கொள்ள வேண்டும்.

2. பெரிய வெங்காயம், இஞ்சி, பூண்டு, பச்சை மிளகாய் ஆகியவற்றை பொடியாக நறுக்கிக் கொள்ளவும்.

3. குக்கரில் தேவையான அளவு சமையல் எண்ணெய் ஊற்றி பட்டை, சோம்பு சேர்த்து தாளித்துக் கொள்ளவும்.

4. பொடியாக நறுக்கிய வெங்காயம், பூண்டு, இஞ்சி, பச்சை மிளகாய், மஞ்சள் தூள், உப்பு சேர்த்து நன்றாக வதக்கிக் கொள்ளவும்.

5. பின்னர், சிறிது தண்ணீர் சேர்த்து 15 நிமிடம் வேக வைக்கவும். தண்ணீர் வற்றி வதங்கியதும் அரைத்துக் கொள்ளவும்.

6. மிக்ஸியில் மட்டன் கறியை மிருதுவாக அரைத்துக் கொள்ளவும். பின்னர், கறியுடன் முட்டையை உடைத்து ஊற்றி, அரைத்த தேங்காய் விழுது சேர்த்து நன்றாகப் பிசைந்து கொள்ளவும்.

7. பின்னர், சிறு சிறு உருண்டைகளாகப் பிடித்து வைத்துக் கொள்ளவும்.

8. அடுப்பில் கடாய் வைத்து தேவையான அளவு எண்ணெய் ஊற்றி கறி உருண்டைகளைப் போட்டு சிவக்க பொறித்து எடுத்தால், சூடான சுவையான செட்டிநாடு ஸ்பெஷல் கோலா உருண்டை ரெடி.

English summary

Mutton kola urundai: Learn how to make the Chettinad special mutton kola urundai, a favorite among children and adults alike.