Thoothuvalai chutney: தூதுவளை ரசம் சரி, தூதுவளை சட்னி சாப்பிட்டிருக்கீங்களா..சளியை அடியோடு விரட்டும்

Thoothuvalai chutney recipe: தமிழகம் முழுவதும் பலத்த மழை, குளிரான காலநிலை நிலவி வருகிறது. குடும்பத்தில் ஒருவருக்காவது சளி, இருமல் இல்லாமல் இருக்காது. சளியை விரட்டுவதில் தூதுவளைக்கு இணையேதுமே இல்லை. அந்த அளவுக்கு அதில் மருத்துவ குணம் உள்ளது. தூதுவளையில் ரசம் செய்து சாப்பிட்டிருப்பீங்க தோசை, இட்லி, சப்பாத்தி, ஆப்பம் என அனைத்திற்கும் அட்டகாசமான காம்போவாக இருக்கும் தூதுவளை சட்னி செய்யத் தெரியுமா.. இதோ உங்களுக்காகத் தான் ரெசிபி வாங்க பார்க்கலாம்.

தூதுவளை சட்னிக்கு தேவையான பொருள்கள்:

தூதுவளை இலை - 10

பூண்டு - 1 பல்

வரமிளகாய் - 1

மிளகு - 1/2 டேபிள் ஸ்பூன்

சின்ன வெங்காயம் - 4

உளுத்தம்பருப்பு - 1 டேபிள் ஸ்பூன்

நல்லெண்ணெய் - 2 டேபிள் ஸ்பூன்

தூதுவளை சட்னி செய்யும் முறை:

1. தூதுவளை இலையை முதலில் நன்றாக அலசி வைத்துக் கொள்ளவும்.

2. அடுப்பில் ஒரு கடாயை வைத்து 2 டேபிள் ஸ்பூன் சமையல் எண்ணெயை ஊற்றிக் கொள்ளவும். எண்ணெய் சூடானதும் அதில் உளுத்தம் பருப்பு, சின்ன வெங்காயம், பூண்டு, வரமிளகாய், மிளகு, தேவையான அளவு உப்பு சேர்த்து நன்றாக வதக்கிக் கொள்ளவும்.

3. அதில், அலசி எடுத்து வைத்துள்ள தூதுவளை இலைகளைச் சேர்த்து நன்றாக வதக்கவும்.

4. வதக்கிய கலவை ஆறிய பின்னர் மிக்ஸி ஜாரில் சேர்த்து நன்றாக அரைத்துக் கொள்ளவும்.

5. இன்னொரு கடாயில் கடுகு, கருவேப்பிலை சேர்த்து தாளித்து சட்னியில் சேர்த்தால் அவ்வளவு தான் சூப்பரான தூதுவளை சட்னி தயார்.

அப்பறம் என்ன இட்லி, தோசை, ஆப்பம், சப்பாத்தி என எதை செய்தாலும் தூதுவளை சட்னியை சேர்த்து சாப்பிட்டு பாருங்க அட்டகாசமாக இருக்கும்.

English summary

Thoothuvalai chutney recipe: Let's learn how to make healthy thoothuvalai chutney recipe in tamil.