ஆதார் கார்டு ரெடியா? சபரிமலையில் பக்தர்களுக்கு சிறப்பு வரவேற்பு.. இருமுடி பையில் இது மட்டும் வேணாமே

Updated: Friday, November 15, 2024, 14:44 [IST]

Subscribe to Oneindia Tamil

திருவனந்தபுரம்: சபரிமலை ஐயப்பன் கோயிலில் இந்த வருட மண்டல காலம் நாளை தொடங்குகிறது.. இன்று மாலை 5 மணிக்கு நடை திறக்கப்படுகிறது. இதையொட்டி சபரிமலையில் சிறப்பு ஏற்பாடுகள் செய்யப்பட்டுள்ளன. கோயிலுக்கு வரும் பக்தர்களுக்கும் சில அறிவுரைகளும், வழிமுறைகளும் வழங்கப்பட்டுள்ளன.

சபரிமலை ஐயப்பன் கோயிலில் இந்த வருட மண்டல காலம் நாளை தொடங்குகிறது. இதையொட்டி இன்று மாலை 5 மணிக்கு நடை திறக்கப்படுகிறது. பம்பை, சன்னிதானம், நிலக்கல் உள்ளிட்ட இடங்களில் பக்தர்களுக்கான வசதிகள் செய்யும் பணிகள் இறுதி கட்டத்தில் விறுவிறுப்பாக நடந்து கொண்டிருக்கிறது.

இதனால், சபரிமலை வரும் பக்தர்களுக்காக பல்வேறு முன்னேற்பாடுகளை தேவஸ்தான நிர்வாகம் மேற்கோண்டு வருகிறது. சபரிமலை தரிசனத்திற்கு தினசரி ஆன்லைன் மூலம் 70 ஆயிரம் பக்தர்களுக்கும், உடனடி முன்பதிவு மூலம் 10 ஆயிரம் பக்தர்களுக்கும் அனுமதி அளிக்கப்படுகிறது. வரும் 30ம் தேதி வரை ஆன்லைன் முன்பதிவு முடிவடைந்து விட்டது.

இன்று நடை திறப்பு: இன்று நடை திறக்கப்படுவதைத் தொடர்ந்து உணவு, தங்குதல் உள்ளிட்ட பல்வேறு ஏற்பாடுகளும் செய்யப்பட்டுள்ளன. சபரிமலைக்கான முக்கிய வழித்தடமாக தேனி மாவட்டம் அமைந்துள்ளது. இதன்வழியே தமிழகம் மட்டுமல்லாது கர்நாடகா, தெலங்கானா, ஆந்திரா உள்ளிட்ட பல்வேறு மாநிலங்களைச் சேர்ந்த பக்தர்களும் அதிகளவில் கடந்து செல்வார்கள்..

தமிழக - கேரள எல்லையான குமுளியில் இருந்து வண்டிப்பெரியாறு, எரிமேலி வழியாக பம்பைக்கு வாகனங்களில் செல்லலாம். மேலும் பாதயாத்திரையாக செல்பவர்கள் வண்டிப்பெரியாறில் இருந்து 14 கி.மீ.தூரம் உள்ள சத்திரத்தை அடைந்து அங்கிருந்து புல்மேடு வனப்பாதை வழியே 12 கி.மீ. நடந்து சென்றும் சன்னிதானத்தை அடையலாம்.

வனத்துறையினர்: இது வனப்பாதை என்பதால் பல்வேறு கட்டுப்பாடுகள் விதிக்கப்பட்டுள்ளது. இதன்படி காலை 7 முதல் பிற்பகல் 2 மணி வரை மட்டுமே செல்ல வனத்துறையினர் அனுமதிக்கின்றனர். இங்குள்ள நுழைவுப்பாதையில் பக்தர்கள் வரிசையாக செல்ல கம்புகள் கட்டி நடைபாதை அமைக்கப்பட்டுள்ளன... பிற்பகல் 2 மணிக்குப் பிறகு பக்தர்களுக்கு அனுமதியில்லாததால் இந்த பகுதிகளில் தங்க தற்காலிக பந்தல்கள் அதிகளவில் அமைக்கப்பட்டு வருகின்றன.

அதேபோல, புல்மேடு வனப்பாதையின் தொடக்கப் பகுதியில் நுழைவாயில் அமைத்து பக்தர்களுக்கு வரவேற்பு அளிக்கப்பட்டுள்ளது.. காட்டு மரங்களின் இலைகளால் அலங்கரிக்கப்பட்ட வரவேற்பு நுழைவுவாயிலும் அமைக்கப்பட்டுள்ளன. பக்தர்கள் ஸ்பாட் புக்கிங் செய்து கொள்வதற்கான வசதியும், சன்னிதான தகவல்களை தெரிந்து கொள்வதற்கான தகவல் மையமும் இங்கு உள்ளது. சத்திரம் வனத்துறை பிரிவு அதிகாரி பி.பிரசாந்த் தலைமையில் 17 அலுவலர்கள் பாதுகாப்பு மற்றும் கண்காணிப்பு பணியில் ஈடுபட்டுள்ளனர்.

வேண்டுகோள்: இந்த பாதை அடர்வனப்பகுதி என்பதுடன் கடுமையான மேடு, பள்ளமாக இருக்கும் என்பதால், இதய பாதிப்பு உள்ளிட்ட பல்வேறு பாதிப்புகள் உள்ளவர்கள் முடிந்தவரை இந்த பாதையை தவிர்ப்பதே நல்லது என்றும், 2 கி.மீ. இடைவெளியில் குடிநீர் உள்ளிட்ட வசதிகள் செய்யப்பட்டுள்ளன. அவச உதவிக்கு பக்தர்கள் 24 மணி நேரமும் 91884 07523 என்ற எண்ணில்தொடர்பு கொள்ளலாம்" என்றும் வனத்துறை தரப்பில் கேட்டுக் கொள்ளப்பட்டுள்ளது.

முன்னதாக சபரிமலைக்கு வரும் பக்தர்கள் இருமுடி கட்டில் சில பொருட்களை தவிர்க்க வேண்டும் என தேவசம்போர்டு வேண்டுகோள் விடுத்திருந்தது.. காரணம், பக்தர்கள் கொண்டுவரும் பொருட்களில் பெரும் பகுதி வீணாக எரிக்கப்படுவதை தவிர்க்க இந்த முடிவு எடுக்கப்பட்டுள்ளதாக தேவசம்போர்டு விளக்கம் தந்திருந்தது.

இருமுடி கட்டு: அவையெல்லாம் பூஜை பொருட்களாக இருந்தாலும்கூட, தீயின் ஆபத்தை கருத்தில் கொண்டு அவற்றை எரிக்கக் கூடாது என்றும் கேட்டுக் கொண்டது. அதன்படி இருமுடியில் எடுத்துச் செல்லக்கூடிய மற்றும் எடுத்து செல்லக்கூடாத பொருட்கள் பன்னீர், ஊதுபத்தி, சாம்பிராணி, கற்பூரம் ஆகியவை ஆகும்.

அதேபோல, அரிசி, நெய் தேங்காய், வெல்லம், வாழைப்பழம், வெற்றிலை, அரிக்கா கொட்டை, நாணயங்கள் போன்றவை இருமுடிகட்டில் அனுமதிக்கப்பட்ட பொருட்கள் ஆகும்.

ஆதார் கார்டு: அதேபோல, பம்பை, எருமேலி, வண்டிப் பெரியார் ஆகிய இடங்களில் முன்பதிவு மையங்கள் அமைக்கப்பட்டு இருக்கின்றன. சபரிமலை வரும் அனைத்து பக்தர்களுக்கும் ஆதார் அடையாள அட்டை கட்டாயமாக்கப்பட்டு உள்ளது. 41 நாள் மண்டலகாலம் டிசம்பர் 26ம் தேதி நடைபெறும் பிரசித்தி பெற்ற மண்டல பூஜையுடன் நிறைவடைவது குறிப்பிடத்தக்கது.