தீபாவளி, ஐப்பசி அமாவாசை.. சதுரகிரி மலையேற பக்தர்களுக்கு அனுமதியில்லை.. வனத்துறை சொன்ன காரணம்
விருதுநகர்: சதுரகிரி வனப்பகுதிகளில் பெய்து வரும் கனமழை காரணமாக ஓடைகளில் வெள்ளநீர் பெருக்கெடுத்துள்ளது. தீபாவளி, ஐப்பசி அமாவாசை நாட்களில் மலை ஏறி சாமி தரிசனம் செய்ய பக்தர்கள் யாரும் வனப்பகுதிக்கு வர வேண்டாம் என அறிவிக்கப்பட்டுள்ளது.
சதுராசலம், சித்தர்கள் தேசம், சிவன்மலை, மூலிகைவனம் என்று பெரியோர்களால் போற்றப்படும் சதுரகிரி மலையில் கோயில் கொண்டுள்ளார், சுந்தர மகாலிங்கப் பெருமானார். மேற்குத் தொடர்ச்சி மலையின் தென் கோடியருகே மேற்பகுதி தட்டையான, சதுர வடிவிலான நான்கு மலைகள் உண்டு.
நான்கு வேதங்களே சிவகிரி, விஷ்ணுகிரி, பிரம்மகிரி, சித்தர்கிரி என்ற பெயர்களில் மலைகளாகி நிற்க, அவற்றின் நடுவில் கம்பீரமாக அமைந்திருக்கிறது, சஞ்சீவிகிரி. இம்மலையே சதுரகிரி என்றனர் முன்னோர்கள். மூலிகைகள் நிரம்பிய மலையின் மேல் சிவபெருமான் வீற்றிருக்கிறார். சதுரகிரியை அகஸ்தியர் உள்ளிட்ட சித்தர்கள், இந்த மகாலிங்க மலையை சித்தர்கள் வாழும் பூமி என்கின்றனர்.
சதுரகிரி என்பது திருக்கைலாயத்தை விட புனிதமானது எனப் போற்றுகிறார் நாரதர். ஆடி அமாவாசை, சித்திரை மாத பௌர்ணமி தினம், மார்கழி திருவாதிரை நட்சத்திரத்திலும் இந்த சதுரகிரி ஈசனை வணங்குவதற்கு வானில் இருந்து தேவர்கள் வருகிறார்கள் என்கிறார் அகஸ்தியர். சதுரகிரி மலை ஏறுவது கடினமானது. மலையே சிவமாக இருப்பதால் பக்தர்கள் காலில் செருப்பு இல்லாமல் ஏறுவதை வழக்கமாகக் கொண்டுள்ளனர். மலையடிவாரத்தில் ஆசீர்வாத விநாயகரை வணங்கியபின் சிவசிந்தனையுடன் மலை யாத்திரையைத் தொடங்க வேண்டும்.
மேற்கு தொடர்ச்சி மலையில் அடர்ந்த வனப்பகுதியில் அமைந்துள்ள இந்த கோவிலுக்கு பாதுகாப்பு கருதி ஒவ்வொரு மாதமும் பிரதோஷம், அமாவாசை பௌர்ணமி என எட்டு நாட்கள் மட்டுமே மக்கள் மலையேற அனுமதிக்கப்பட்டு வருகின்றனர். அந்த வகையில் இந்த முறை தீபாவளி பண்டிகை, ஐப்பசி அமாவாசையை முன்னிட்டு நவம்பர் 10 முதல் 14 வரையில் பக்தர்கள் மலைக்கு செல்ல அனுமதிக்கப்படுவர் என எதிர்பார்க்கப்பட்டது.
கடந்த சில வாரங்களாக விருதுநகர் மாவட்டத்தில் நல்ல மழை பெய்து வரும் நிலையில், சதுரகிரி மலையில் உள்ள நீரோடைகள் நிறைந்து நீர் பெருக்கெடுத்து ஓடுவதால் பாதுகாப்பு கருதி இம்முறை பக்தர்கள் மலையேற அனுமதிக்கப்பட மாட்டார்கள் என வனத்துறை தரப்பில் தெரிவிக்கப்பட்டுள்ளது. தீபாவளி, ஐப்பசி அமாவாசை நாட்களில் பக்தர்கள் யாரும் சதுரகிரி மலை ஏறுவதற்கு வர வேண்டாம் என்று அறிவிக்கப்பட்டுள்ளது.
Click it and Unblock the Notifications
Sign in with Google