நைஜீரியாவின் போராட்டம் தோல்வி - அர்ஜென்டினாவுக்கு முதல் வெற்றி

ஜோஹன்னஸ்பர்க்: தென் ஆப்பிரிக்க உலகக் கோப்பைப் போட்டியில் தான் சந்தித்த முதல் ஆட்டத்தில், நைஜீரியாவை 1-0 என்ற கோல் கணக்கில் வீ்ழ்த்தியது அர்ஜென்டினா.

வெற்றிக்காக கடுமையாகப் போராடியும் வெற்றி பெற முடியாமல் துவண்டு போனது நைஜீரியா.

விறுவிறுப்பாக நடந்த இந்தப் போட்டியில் அர்ஜென்டினா அணியின் ஆதிக்கமே மேலோங்கி இருந்தது. அதேசமயம் வெற்றிக்காக நைஜீரியா கடுமையாகப் போராடியது. இருப்பினும் நைஜீரியாவின் முயற்சி வெற்றி பெற முடியவில்லை. காப்ரியல் ஹெய்ன்ஸ் அடித்த ஒரு கோலால் நைஜீரியாவை 1-0 என்ற கணக்கில் அர்ஜென்டினா வெற்றி பெற்றது.

நேற்றைய போட்டியில் அர்ஜென்டினாவுக்கு நிறைய கோல் வாய்ப்புகள் கிடைத்தன. ஆனால் நைஜீரியாவின் அபாரமான தடுப்பு முறைகள் உள்ளிட்டவை காரணமாக அவை அனைத்தும் தோல்வியிலேயே முடிந்தன.

போட்டி தொடங்கிய 6வது நிமிடத்தில் ஜூவான் செபாஸ்டியன் வெரோனிடமிருந்து வந்த பந்தை தலையில் வாங்கி முட்டி கோலாக்கினார் ஹெய்ன்ஸ். அதன் பிறகு அவர்களால் கோலடிக்கவே முடியவில்லை.

கோன்சலோ ஹிகுயினுக்கு 3 வாய்ப்புகளும், மெஸ்ஸிக்கு 4 முறையும் கோலடிக்க வாய்ப்பு கிடைத்தது. ஆனால் நைஜீரிய கோல் கீப்பர் வின்சன்ட் எனிமா அவற்றை அபாரமாக தடுத்து விட்டார்.

முதல் பாதி ஆட்டத்தில் அர்ஜென்டினாவிடம் திணறியபோதிலும், 2வது பாதி ஆட்டத்தில் நைஜிரியர்கள் கோலடிக்க கடுமையாக முயற்சித்தனர். ஆனால் அவர்களால் மெஸ்ஸியின் அபார தடுப்பைத் தாண்டிப் போகவே முடியவில்லை.

தனது அபாரமான தடுப்பாட்டத்தால் நைஜீரியர்களின் கோல் குறிக்கோளை மிக அழகாக தடுத்தார் மெஸ்ஸி.

முதல் போட்டியில் வென்ற போதிலும், நிறைய கோல்கள் அடிக்க முடியாமல் போனது அர்ஜென்டினா வீரர்களை ஏமாற்றத்தில் ஆழ்த்தியது. இருப்பினும் இந்த வெற்றி குறித்து பயிற்சியாளர் மாரடோனா திருப்தி தெரிவித்தார்.

முதல் முறையாக அர்ஜென்டினா அணியின் பயிற்சியாளராக மாரடோனா நேற்றைய ஆட்டத்தில் கலந்து கொண்டார். அட்டகாசமான தாடி, மீசை, கோட் சூட்டில் மிடுக்காக காணப்பட்ட மாரடோனாவுக்கு ரசிகர்கள் கைகளைத் தட்டியும், குரல் எழுப்பியும் தொடர்ந்து உற்சாகப்படுத்தியவண்ணம் இருந்தனர்.