தன்னுடைய 8 வயதில் பார்த்த நடிகர் மயில்சாமி செய்த செயல்.. நினைவு கூர்ந்து கண்கலங்கிய Kpy பிரபலம்

தன்னுடைய எட்டு வயதில் மயில்சாமியின் நிகழ்ச்சியை பார்த்து தான் நான் மிமிக்ரி பண்ண ஆரம்பித்தேன் என கலக்கப்போவது யாரு நிகழ்ச்சி பிரபலம் தெரிவித்திருக்கிறார்.

Updated: Monday, February 20, 2023, 19:42 [IST]

Subscribe to Oneindia Tamil

சென்னை: நகைச்சுவை நடிகர் மயில்சாமி காலமான நிலையில் அவருடைய இறுதி சடங்கு இன்று நடைபெற்றது.

நடிகர் மயில்சாமியின் மறைவிற்கு பிரபலங்களும், ரசிகர்களும் தொடர்ந்து தங்களுடைய வருத்தங்களை தெரிவித்து வருகிறார்கள்.

அந்த வகையில் கலக்கப்போவது யாரு நிகழ்ச்சியில் பிரபலமான பழனி பட்டாளம் மயில்சாமி மேடை கலைஞராக இருந்தபோது எடுக்கப்பட்ட ஒரு அரிய புகைப்படத்தை பகிர்ந்து பல தகவல்களையும் தெரிவித்திருக்கிறார்.

பல முகங்கள்

100க்கு மேற்பட்ட திரைப்படங்களில் நடித்து பிரபலமான நடிகர் மயில்சாமி நேற்று மரணம் அடைந்தார். இவர் ஒரு நடிகராக மட்டுமல்லாமல் சமூக ஆர்வலராகவும், மிமிக்கிரி கலைஞராகவும், தொகுப்பாளராகவும், அரசியல் பிரமுகராகவும், எம் ஜி ஆரின் தீவிரமான ரசிகராகவும், கஷ்டப்பட்டவர்களுக்கு உதவும் நல்ல உள்ளம் கொண்டவராகவும், பல விழிப்புணர்வுகளை ஏற்படுத்தும் நபராகவும் இருந்து வந்தார். இவருக்கு அதிகமான ரசிகர்கள் இருக்கின்றனர்.

அரிய புகைப்படம்

நடிகர் மயில்சாமியின் திடீர் இழப்பு அவருடைய ரசிகர்களை அதிகமாக பாதித்திருக்கிறது. அது மட்டும் இல்லாமல் அவரோடு பணிபுரிந்த நடிகர்கள் பிரபலங்கள் பலர் அவருடைய இறுதி சடங்கில் கலந்து கொண்டு தங்களுடைய வருத்தத்தை தெரிவித்து வருகின்றனர். அந்த வகையில் விஜய் டிவியில் ஒளிபரப்பாகி வரும் கலக்கப்போவது யாரு நிகழ்ச்சியின் மூலம் பிரபலம் அடைந்த பழனி பட்டாளம் உருக்கமான ஒரு பதிவு ஒன்றை வெளியிட்டு இருக்கிறார். அந்தப் பதிவில் மயில்சாமி மேடை கலைஞராக இருந்தபோது எடுக்கப்பட்ட ஒரு அரிய புகைப்படத்தையும் அதற்கான சுவாரசியமான பின்னணி பற்றியும் நெகிழ்ச்சியோடு பதிவிட்டு இருக்கிறார்.

எட்டு வயதில் பார்த்தது

இது குறித்து அந்த பதிவில் 1990 ஆம் வருடத்தில் அண்ணன் மயில்சாமி அவர்கள் லக்ஷ்மணன் அவர்களோடு இணைந்து ஸ்ருதி இசை குழு ஆரம்பித்து என் வீட்டில் கட்டியுள்ள அங்காள பரமேஸ்வரி அம்மன் கோவில் திருவிழாவில் இசை கச்சேரி நடத்தினார்கள். மயில்சாமி அண்ணனுக்கு நினைவு பரிசு வழங்குபவர் என்னுடைய அப்பா முத்து. அப்போது எனக்கு எட்டு வயது இருக்கும். அவர் நிகழ்ச்சியை நேரில் பார்த்து தான் நான் மிமிக்ரி பண்ண ஆரம்பித்தேன். சமீபத்தில் கூட அவரை சந்திக்கும் போது இதை சொல்லி நினைவுபடுத்தி இருக்கேன் என்றும் அவர் இறப்பு மிகவும் வேதனையை அளிக்கிறது. அண்ணாவின் ஆன்மா சாந்தியடைய இறைவனிடம் வேண்டுகிறேன் என்றும் கூறியிருக்கிறார்.

பல வருட நடிப்பு

நடிகர் மயில்சாமி ரஜினி, கமல், விஜயகாந்த், சத்யராஜ் என பல நடிகர்களோடு ஆரம்பத்தில் நடித்திருந்தாலும் இன்று முன்னணி நடிகர்களோடு நடித்து வந்தார். சமீபத்தில் உதயநிதி ஸ்டாலின் நடித்த நெஞ்சுக்கு நீதி மற்றும் பாலாஜி நடித்த வீட்ல விசேஷங்க போன்ற திரைப்படங்களில் இவர் நடித்திருந்தார். இந்த நிலையில் இவர் மாரடைப்பால் காலமான சம்பவம் பெரும் சோகத்தை ஏற்படுத்தியிருக்கிறது. நடிகர் மயில்சாமி நேற்று காலமான நிலையில் அவருடைய இறுதி சடங்கு இன்று நடைபெற்றது. அவரது உடல் சென்னை சாலிகிராமத்தில் உள்ள அவரது இல்லத்தில் பொதுமக்கள் அஞ்சலிக்காக வைக்கப்பட்டிருந்த நிலையில், சாலிகிராமம் வெங்கடேஸ்வரா நகரில் அவரது உடல் ஊர்வலமாக கொண்டு செல்லப்பட்டு சென்னை வடபழனி ஏ.வி.எம் மைதானத்தில் தகனம் செய்யப்பட்டது. அதில் பல பிரபலங்கள் கலந்து கொண்டிருந்தனர்.