காசு, பணம் முக்கியம் இல்லை.. ரூ.125 கோடி உதறி தள்ளிய அமீர் கான்.. இதுக்கு உண்மையா தைரியம் வேண்டும்!

மும்பை: பிரபல பாலிவுட் நடிகரான அமீர் கான் சமீபத்தில் ரூ.125 கோடி மதிப்பிலான ஒரு டீலை உதறித் தள்ளி இருக்கிறார். சினிமாவின் எதிர்காலத்திற்காகவே இந்த முடிவை எடுத்துள்ளதாக அவர் கூறுகிறார். எதற்காக அமீர் கான் இந்த முடிவை எடுத்தார்.. இதன் காரணம் என்ன.. பின்னணி என்ன என்பது குறித்துப் பார்க்கலாம்.

பாலிவுட்டில் இருக்கும் டாப் நடிகர்களில் ஒருவர் அமீர் கான். இவரது படங்கள் எப்போதும் நம்மைத் திரும்பிப் பார்க்க வைக்கும் வகையிலேயே இருக்கும். இவரது நடிப்பில் கடந்த ஜூன் 20ம் தேதி 'சிதாரே ஜமீன் பர்' திரைப்படம் வெளியானது.. விமர்சகர்களிடையே நல்ல பாராட்டைப் பெற்ற இந்த படம் வசூலிலும் சாதனை படைத்தது.

அமீர் கான்

இந்த காலத்தில் ஒரு படம் தியேட்டரில் ஓடுவதற்கு இணையாக, சில நேரம் அதை விட அதிகமாகக் கூட ஓடிடி தளங்களில் விற்பனையாகும். அப்படி தான் 'சிதாரே ஜமீன் பர்' படத்தின் ஓடிடி உரிமத்தை வாங்க அமீர் கானை பட வெளியீட்டிற்கு முன்பே பிரபல ஓடிடி நிறுவனம் அணுகியுள்ளது. அவர்கள் ரூ.125 கோடி ரூபாய் கொடுக்க முன்வந்துள்ளனர். ஆனாலும், அமீர் கான் அதை நிராகரித்திருக்கிறார்.

ரூ.125 கோடி என்பது பெரிய தொகை.. அதை நிராகரிக்க வேண்டாம் என அமீர் கானுக்கு நெருக்கமான அனைவரும் சொல்லியுள்ளனர். ஆனாலும், அந்த ஆலோசனைகளைக் கேட்காமல் 'சிதாரே ஜமீன் பர்' ஓடிடி உரிமத்தை விற்க மறுத்துவிட்டார். வருமானத்தை விட, படத்தின் மீது மக்கள் வைக்கும் மதிப்பீடுகளுக்கே அதிக முக்கியத்துவம் அளித்து இந்த முடிவை எடுத்ததாக அவர் கூறியிருக்கிறார்.

என்ன காரணம்

இது தொடர்பாக பிஸினஸ் டுடே-க்கு அளித்த பேட்டியில் அமீர் கான், "வெளியீட்டிற்கு முன் ஓடிடிக்கு நாங்கள் விற்கவில்லை. அது ஒரு கடினமான மற்றும் பெரிய முடிவு. இதனால் எங்களுக்கு எந்த பாதுகாப்பு வலையும் இல்லை. ஆனாலும், ஒரு படத்தின் இறுதித் தீர்ப்பை ரசிகர்கள் தான் தீர்மானிக்கிறார்கள் என்பதில் எனக்கு நம்பிக்கை இருக்கிறது. இதன் காரணமாக ஓடிடி வேண்டாம் என்றோம்.

மக்கள் ஒரு படத்தை விரும்பும்போது, அது வாய்மொழி விளம்பரம் மூலம் வெற்றிபெறும். படம் வெளியான பிறகு, மக்கள் அதைப் பற்றி என்ன நினைக்கிறார்கள் என்பதை அறிவது எனக்கு முக்கியம். 'சிதாரே ஜமீன் பர்' படத்தை தியேட்டரில் பார்த்த பார்வையாளர்கள் அதை மிகவும் விரும்பியுள்ளனர். படம் உலகளவில் ₹250 கோடிக்கும் மேல் வசூலித்து பெரும் வரவேற்பைப் பெற்றது" என்றார்.

ரூ.125 கோடி டீல்

₹125 கோடி ஒப்பந்தம் குறித்துப் பேசிய அவர், "அந்த ஒப்பந்தத்தை நிராகரிக்க வேண்டாம் எனப் பலரும் சொன்னார்கள். ஆனால் நீண்ட கால நோக்கில், ஓடிடி என்பது ஒரு படைப்பாளியாகவோ அல்லது பிஸ்னஸ்மேனாக எனக்குச் சிறந்ததல்ல என்று நான் உறுதியாக நம்பினேன். ஓடிடி தளங்களில் இருந்து ₹125 கோடியைப் பெறுவதை விட, எனது ரசிகர்களில் ஒவ்வொருவரிடமிருந்தும் ₹100 பெறுவதையே விரும்புகிறேன். அந்த 100 ரூபாய்க்குத் தான் மதிப்பு அதிகம்" என்றார்.

அதேநேரம் தான் முழுமையாக ஓடிடிக்கு எதிரானவன் இல்லை என்றும் கூறியிருக்கிறார் அமீர் கான். திறமையான இளம் மற்றும் சுதந்திரமான திரைப்பட தயாரிப்பாளர்களை ஊக்குவிக்க டிஜிட்டல் தளத்தைப் பயன்படுத்த விரும்புவதாகவும் அவர் கூறினார். தியேட்டர் ரிலீஸுக்கு போராடுவோருக்கு, ஓடிடி ஒரு நல்ல வாய்ப்பாக அமையும் என்றும் அவர் தெரிவித்தார்.

சிதாரே ஜமீன் பர் ஓடிடி

2018ல் ஸ்பானிஷ் படமான 'கேம்பியோனஸ்' படத்தின் ரிமேக் தான் 'சிதாரே ஜமீன் பர்'. கடந்த ஜூன் 20ம் தேதி இந்த படம் வெளியாகி பெரும் வரவேற்பைப் பெற்றது. இந்த படம் இப்போது ஓடிடியில் வெளியாகவில்லை. மாறாக நேரடியாக யூடியூப் தளத்தில் கட்டண முறையில் வெளியிடப்பட்டுள்ளது. அதாவது யூடியூப் தளத்தில் ரூ.100 செலுத்தினால் மட்டுமே உங்களால் இந்த படத்தைப் பார்க்க முடியும்.

English summary

Aamir Khan OTT latest news in tamil (ரூ.125 கோடி ஓடிடி ஒப்பந்தத்தை ரத்து செய்த அமீர் கான்): Aamir Khan explains why he turned down a Rs 125 crore OTT deal for Sitaare Zameen Par.