நியூசிலாந்தில் கவர்மெண்ட் வேலையில் இருக்கிறேன்! அந்த பாடல் டான்ஸ் பார்த்தால்! நடிகர் அப்பாஸ் உருக்கம்

Updated: Thursday, April 16, 2026, 13:54 [IST]

Subscribe to Oneindia Tamil

சென்னை: 90களில் "சாக்லேட் பாய்" இமேஜில் ரசிகர்களின் மனதை கவர்ந்த நடிகர் அப்பாஸ் குறித்து சமீபத்தில் வெளியான தகவல் ரசிகர்களுக்கு ஆச்சரியத்தையும் நெகிழ்ச்சியையும் ஏற்படுத்தியுள்ளது. நீண்ட இடைவெளிக்குப் பிறகு அவர் தனது தற்போதைய வாழ்க்கை, சினிமா பயணம் குறித்து பேசியிருக்கிறார். அதிலும் அவர் நியூசிலாந்தில் கவர்மெண்ட் வேலை பார்த்து வருவது குறித்து வெளிப்படையாக பேசி இருக்கிறார்.

நியூசிலாந்தில் புதிய வாழ்க்கை

ஒரு யூடியூப் சேனலுக்கு அளித்த பேட்டியில் அப்பாஸ் கூறியதாவது, "நான் இப்போது நியூசிலாந்தில் அரசு வேலை பார்த்துக் கொண்டிருக்கிறேன். பலருக்கும் இது தெரியாது. என்ன வேலை செய்தாலும் மனசுக்கு பிடித்த மாதிரி இருக்கணும் என்பதைத்தான் நான் எப்போதும் பார்த்து வருகிறேன்" என்றார்.

சில வருடங்களுக்கு முன்பு அவர் பெட்ரோல் பங்கில் வேலை பார்த்தது பெரிய அளவில் பேசப்பட்டது. அதைப் பற்றி அவர் சிரித்தபடியே, "அது பெரிய விஷயமா பேசப்பட்டது. ஆனால் நான் அங்கே பத்து நாட்கள்தான் வேலை பார்த்தேன். எனக்கு திருப்தி இல்லாததால் விட்டு விட்டேன்" என்று விளக்கினார்.

அதன்பிறகு கால் சென்டரில் வேலை பார்த்த அனுபவமும் இருந்ததாக கூறிய அவர், தற்போது அரசு பணியில் அமைதியான வாழ்க்கையை வாழ்கிறேன் என்றார். ஃப்ரீயாக இருக்கும் நேரத்தில் தான் சினிமாவில் நடிக்க வாய்ப்பு கிடைக்கிறது என்றும் சொல்லி இருக்கிறார்.

90களின் சாக்லேட் ஹீரோ

1990களில் தமிழ் சினிமாவில் இளைஞர்களின் கனவு ஹீரோவாக விளங்கியவர் அப்பாஸ். குறிப்பாக காதல் தேசம், வி.ஐ.பி, கண்டுகொண்டேன் கண்டுகொண்டேன், சுயம்வரம், மலபார் போலீஸ் போன்ற படங்கள் அவருக்கு பெரிய வரவேற்பை கொடுத்தது. அவரின் ஸ்டைல், ஹேர்ஸ்டைல், உடை அணிவது போன்றவை அந்த கால இளைஞர்களிடையே டிரெண்டாக மாறியது.

மீண்டும் திரைக்கு வருகை

பல ஆண்டுகள் திரையுலகில் இருந்து விலகி இருந்த அப்பாஸ், சமீபத்தில் ஜி.வி. பிரகாஷ் நடித்த ஹேப்பி ராஜ் படத்தில் முக்கிய கதாபாத்திரத்தில் நடித்தார். அவரை மீண்டும் திரையில் பார்த்த ரசிகர்கள் "மீண்டும் தொடர்ந்து நடிக்க வேண்டும்" என்று கோரிக்கை வைத்து வருகின்றனர்.

ரம்பாவுடன் கலகலப்பு

அவரது பேட்டியில் பழைய நினைவுகளையும் பகிர்ந்தார். ரம்பா குறித்து பேசும்போது, "அவங்க எப்போதும் நான் டயட்டில் இருக்கேன் என்று சொல்லிட்டு இருப்பாங்க. நான் அவங்களை கிண்டல் பண்ணி சாக்லேட் கொடுத்து வம்பு பண்ணுவேன்" என்று சிரித்தபடி கூறினார்.

சிம்ரனுடன் டான்ஸ் அனுபவம்

சிம்ரன் உடன் நடித்த பாடல் குறித்து பேசும்போது, "அப்போது ரொம்ப எனர்ஜியாக டான்ஸ் ஆடுவோம். அதிலும், காதல் காதல் காதல் என் கண்ணில் மின்னல் மோதல் பாடலுக்கு நானும் அவங்களும் ஆடுனது அந்த நேரத்தில் ரொம்ப பேசப்பட்டது. அப்போ அது இளம் வயது என்பதால் எனர்ஜியாக தெரிந்தது ஆனால் இப்போ அதை பார்க்கும்போது இப்படி எல்லாம் ஆடி இருக்கோமான்னு தோணும்" என்று கிண்டலாக கூறினார்.

விருதுகள் & சாதனைகள்

அப்பாஸ் தனது ஆரம்ப கால படங்களிலேயே ரசிகர்களின் கவனத்தை ஈர்த்தவர். பெரிய அளவில் விருதுகள் அதிகமாக பெறவில்லை என்றாலும், அவரின் பாப்புலாரிட்டி மற்றும் ரசிகர் வட்டம் மிகப்பெரியது. குறிப்பாக இளைஞர்களிடம் அவர் ஒரு ட்ரெண்ட் செட்டராக இருந்தார்.

அப்பாஸ் திருமணம் செய்து கொண்டு தனது குடும்பத்துடன் நியூசிலாந்தில் வசித்து வருகிறார். சினிமாவை விட அமைதியான வாழ்க்கையை தேர்வு செய்து, குடும்பத்துடன் நேரத்தை செலவிடுவது தான் முக்கியம் என்று அவர் பலமுறை கூறியுள்ளார்.

ரசிகர்களின் எதிர்பார்ப்பு

ஒரு காலத்தில் ரசிகர்களின் இதயத்தை ஆட்கொண்ட ஹீரோ இன்று சாதாரண வாழ்க்கையை தேர்வு செய்திருப்பது பலருக்கும் ஆச்சரியமாக இருக்கிறது. அதே நேரத்தில், "அப்பாஸ் மீண்டும் முழு நேரமாக சினிமாவில் வர வேண்டும்" என்ற கோரிக்கையும் ரசிகர்களிடையே அதிகரித்து வருகிறது.

சினிமாவில் உச்சத்தை தொட்டவர் கூட வாழ்க்கையில் வேறு பாதையை தேர்வு செய்து அமைதியாக வாழ முடியும் என்பதற்கு அப்பாஸ் ஒரு எடுத்துக்காட்டு. ஆனாலும், அவரை மீண்டும் பெரிய திரையில் பார்க்க வேண்டும் என்ற ஆசை ரசிகர்களிடம் இன்னும் குறையவே இல்லை.