சினிமா உலகில் சோகம்.. நள்ளிரவில் காரில் போன 30 வயது நடிகைக்கு நேர்ந்த துயரம்! வருத்தத்தில் ரசிகர்கள்
சென்னை: பாலிவுட் உலகில் மெதுவாக முன்னேறிக் கொண்டிருந்த இளம் நடிகை ஹர்ஷில் காலியா திடீர் கார் விபத்தில் உயிரிழந்த செய்தி திரையுலகையும், ரசிகர்களையும் அதிர்ச்சியில் ஆழ்த்தியுள்ளது. வயது 30 மட்டுமே ஆன நிலையில் இந்த விபத்து நடந்திருக்கிறது என்பது இன்னும் வேதனையை அதிகரிக்கிறது.
எப்படி நடந்தது விபத்து?
ராஜஸ்தானைச் சேர்ந்த ஹர்ஷில் காலியா, சமீபத்தில் ஒரு படப்பிடிப்பை முடித்து நள்ளிரவு நேரத்தில் ஜெய்ப்பூரில் உள்ள தனது வீட்டிற்கு காரில் திரும்பிக் கொண்டிருந்தார்.
அப்போது ஷிப்ரா பாத் சாலையில் சென்றுகொண்டிருந்த கார், எதிரே இருந்த தடுப்புச் சுவரில் மோதியது. அதன்பின் கட்டுப்பாட்டை இழந்த கார் திடீரென கவிழ்ந்ததாக கூறப்படுகிறது. இந்த விபத்தில் ஹர்ஷிலுக்கு தலையில் கடுமையான காயம் ஏற்பட்டது.
அருகில் இருந்தவர்கள் உடனடியாக அவரை மீட்டு மருத்துவமனைக்கு கொண்டு சென்றாலும், மருத்துவர்கள் பரிசோதித்தபோது அவர் ஏற்கெனவே உயிரிழந்துவிட்டதாக தெரிவித்தனர். இந்த சம்பவம் குறித்து போலீசார் வழக்குப்பதிவு செய்து விசாரணை நடத்தி வருகின்றனர்.
ஹர்ஷில் காலியா யார்?
ஹர்ஷில் காலியா முதலில் ஒரு மாடலாக தனது பயணத்தை தொடங்கியவர். அழகு, ஸ்டைல், மற்றும் தன்னம்பிக்கை காரணமாக குறுகிய காலத்திலேயே சமூக வலைதளங்களில் கவனம் பெற்றார்.
பின்னர் அவர் நடிப்புலகிற்குள் நுழைந்து, 'Crime Next Door' என்ற வெப் சீரியஸில் நடித்ததன் மூலம் ரசிகர்களிடையே அறிமுகமானார். இதைத் தொடர்ந்து பல இசை வீடியோக்களிலும் தோன்றி தனது தனித்துவமான வெளிப்பாட்டால் ரசிகர்களை கவர்ந்தார்.
சோசியல் மீடியாவில் பிரபலமான முகம்
ஹர்ஷில் காலியா சமூக வலைதளங்களில் மிகவும் ஆக்டிவாக இருந்தவர். இன்ஸ்டாகிராம் போன்ற தளங்களில் அவருக்கு பெரிய அளவில் பாலோவர்ஸ் இருந்தனர். தனது தினசரி வாழ்க்கை, ஷூட் அப்டேட்ஸ், ஃபேஷன் புகைப்படங்கள் போன்றவற்றை தொடர்ந்து பகிர்ந்து வந்ததால், இளைஞர்கள் மத்தியில் நல்ல வரவேற்பைப் பெற்றிருந்தார்.
திடீர் முடிவு
மாடலிங் உலகில் இருந்து நடிப்புக்குள் நுழைந்து, மெதுவாக ஒரு இடத்தை பிடித்து கொண்டிருந்த நேரத்தில் இப்படி ஒரு விபத்து நடந்தது, பலரையும் அதிர்ச்சியில் ஆழ்த்தியுள்ளது. இன்னும் பெரிய வாய்ப்புகள் அவரை எதிர்பார்த்திருந்த நிலையில், இந்த திடீர் இழப்பு திரையுலகிற்கு ஒரு பெரிய அதிர்ச்சியாக பார்க்கப்படுகிறது.
ரசிகர்கள் மற்றும் பிரபலங்கள் இரங்கல்
ஹர்ஷில் காலியா மரண செய்தி வெளியானதும், சமூக வலைதளங்களில் ரசிகர்கள் தங்கள் இரங்கலை தெரிவித்து வருகின்றனர். "இப்படி திடீரென போய்விடுவார் என்று நினைக்கவே முடியவில்லை", "இளம் வயதில் இப்படி ஒரு விபத்து மிகவும் வேதனை" என்ற கருத்துகள் அதிகமாக பகிரப்பட்டு வருகின்றன.
ஒரு சாதாரண விபத்து செய்தியாக அல்லாமல், ஒரு வளர்ந்து கொண்டிருந்த இளம் கனவின் முடிவாகவே இந்த சம்பவம் பார்க்கப்படுகிறது. சில மணி நேரங்களுக்கு முன்பு வரை தனது வேலைகளை செய்து கொண்டிருந்த ஒரு நடிகை... அடுத்த நாள் காலை ஒரு துயரச் செய்தியாக மாறிவிட்டார். அதனால் தான், இந்த செய்தி பலரையும் ஆழமாக தாக்கி உள்ளது.
Click it and Unblock the Notifications
Sign in with Google