ஒரு வார்த்தையில் நடிகையின் பெயரை மாற்றிய விஜய்.. பல வருடங்களுக்கு பிறகு பிரபலம் பகிர்ந்த சுவாரஸ்யம்!

Updated: Monday, June 1, 2026, 17:43 [IST]

Subscribe to Oneindia Tamil

சென்னை: நடிகர் விஜய் குறித்து அவருடன் நடித்த நடிகர், நடிகைகள் பகிரும் நினைவுகள் எப்போதும் ரசிகர்களின் கவனத்தை ஈர்த்து விடும். குறிப்பாக அவரது எளிமை, நகைச்சுவை உணர்வு மற்றும் சக நடிகர்களிடம் பழகும் விதம் பற்றி பலரும் பல்வேறு சம்பவங்களை கூறியிருக்கிறார்கள். அந்த வரிசையில் தற்போது சிவகாசி படத்தில் விஜயின் தங்கையாக நடித்த நடிகை கிருஷ்ணா சஜித் பகிர்ந்துள்ள ஒரு சுவாரஸ்யமான தகவல் இணையத்தில் வைரலாகி வருகிறது.

Vijay Krishna Sajith Lakshana Sivakasi Perarasu Actress

விஜயின் தங்கை

2005-ம் ஆண்டு பேரரசு இயக்கத்தில் வெளியான சிவகாசி திரைப்படம் விஜயின் கேரியரில் முக்கியமான வெற்றிப்படங்களில் ஒன்றாக அமைந்தது. அசின், பிரகாஷ்ராஜ், கீதா, எம்.எஸ்.பாஸ்கர் உள்ளிட்ட பலர் நடித்திருந்த அந்த படத்தில் விஜயின் தங்கையாக "வைரம்" என்ற கதாபாத்திரத்தில் நடித்தவர் கிருஷ்ணா சஜித்.

அந்த கதாபாத்திரத்தின் மூலம் ரசிகர்கள் மத்தியில் கவனம் பெற்ற அவர், சமீபத்தில் அளித்த பேட்டி ஒன்றில் தனது திரைப்பயணத்தின் ஆரம்பகால அனுபவங்களை பகிர்ந்து கொண்டார். அதில் குறிப்பாக தனது பெயர் எப்படி மாறியது என்பது குறித்து அவர் கூறிய விஷயம் தற்போது ரசிகர்களின் கவனத்தை ஈர்த்துள்ளது.

பேட்டியில் பேசிய கிருஷ்ணா சஜித், "நான் சினிமாவுக்கு வந்தபோது என்னுடைய பெயர் கிருஷ்ணா தான். சிவகாசி படத்தில் அறிமுகமாகும் போது அந்த பெயரை அப்படியே பயன்படுத்தலாமா அல்லது வேறு பெயர் வைக்கலாமா என்று படக்குழுவினர் ஆலோசித்துக் கொண்டிருந்தார்கள். இயக்குநர் பேரரசு சாரும் அதுகுறித்து பேசிக்கொண்டே இருந்தார்.

லக்ஷனா என்று பெயர்

அப்போது "ஒரு காட்சிக்காக திரையில் என்னுடைய முகத்தை பார்த்துக்கொண்டிருந்தார்கள். அப்போது அங்கிருந்த ஒருவர், 'லக்ஷணமாக இருக்காங்க' என்று சொன்னார். உடனே பக்கத்தில் இருந்த விஜய் சார், 'அப்போ லக்ஷனா என்று பெயர் வச்சிடலாமே' என்று சாதாரணமாக சொன்னார்" என தெரிவித்தார்.

அந்த நேரத்தில் அது ஒரு சாதாரண பேச்சாகத்தான் இருந்ததாகவும், தானும் சிரித்துவிட்டு அங்கிருந்து சென்றுவிட்டதாகவும் கிருஷ்ணா கூறினார். ஆனால் சில நாட்கள் கழித்து படத்தின் விளம்பரங்கள் மற்றும் பத்திரிகை செய்திகளை பார்த்தபோது அவருக்கு ஒரு பெரிய ஆச்சரியம் காத்திருந்ததாம்.

"பத்திரிகைகளில் இந்த படத்தில் அறிமுகமாகும் நடிகை லக்ஷனா என்று செய்தி வந்தது. அதை பார்த்து எனக்கே ஷாக் ஆகிவிட்டது. விஜய் சார் ஜாலியாக சொன்ன பெயரைத்தான் படக்குழுவினர் அதிகாரப்பூர்வமாக வைத்திருந்தார்கள். எனக்கு லக்ஷனா என்ற பெயர் எப்படி வந்தது என்றால் அதற்கு காரணம் விஜய் சார்தான்" என்று சிரித்தபடி அவர் கூறியுள்ளார்.

இந்த தகவல் தற்போது சமூக வலைதளங்களில் ரசிகர்களால் அதிகம் பகிரப்பட்டு வருகிறது. குறிப்பாக விஜய் ரசிகர்கள், "ஒரு நடிகையின் திரைப்பெயருக்கே விஜய் காரணமா?", "அவர் சொன்ன ஒரு வார்த்தை நேரடியாக பெயராக மாறிவிட்டதே" என்று ஆச்சரியத்துடன் கருத்து தெரிவித்து வருகின்றனர்.

கிருஷ்ணா சஜித்

திரையுலகில் பல நடிகர், நடிகைகள் தங்களது இயற்பெயரை மாற்றி புதிய பெயரில் அறிமுகமாகி இருப்பது வழக்கமான விஷயம்தான். ஆனால் அந்த பெயரை ஒரு முன்னணி ஹீரோ தேர்வு செய்து கொடுத்தார் என்ற சம்பவங்கள் அரிதாகவே நடக்கும். அதனால்தான் கிருஷ்ணா சஜித் பகிர்ந்த இந்த நினைவு தற்போது மீண்டும் பேசுபொருளாக மாறியுள்ளது.

மேலும் விஜய் குறித்து பேசிய அவர், படப்பிடிப்பு தளத்தில் அனைவரிடமும் மிகவும் அன்பாக பழகுவார் என்றும், புதியவர்களுக்கு எப்போதும் ஊக்கம் கொடுப்பார் என்றும் குறிப்பிட்டுள்ளார். சிவகாசி படத்தில் நடித்த காலத்தில் கிடைத்த அந்த அனுபவங்கள் இன்றும் மறக்க முடியாத நினைவுகளாக இருப்பதாகவும் அவர் தெரிவித்துள்ளார்.

சினிமாவில் ஒரு நடிகைக்கு புதிய அடையாளத்தை கொடுத்த பெயரின் பின்னால் விஜயின் ஒரு சாதாரண கமெண்ட் இருந்தது என்பது தற்போது ரசிகர்களை ஆச்சரியப்படுத்தியுள்ளது. பல வருடங்கள் கழித்தும் அந்த சம்பவத்தை கிருஷ்ணா சஜித் புன்னகையுடன் நினைவுகூர்ந்திருப்பது, விஜயுடன் பணியாற்றிய அனுபவம் அவருக்கு எவ்வளவு சிறப்பானதாக இருந்திருக்கும் என்பதை காட்டுவதாக ரசிகர்கள் கூறி வருகின்றனர்.