Ajith: தமிழகத்திற்கு உலக அளவில் மீண்டும் பெருமை சேர்த்த அஜித்குமார்.. ஸ்பெயின் கார் ரேஸில் சாதனை
சென்னை: தமிழ் சினிமாவின் 'தல' என்று ரசிகர்களால் கொண்டாடப்படும் நடிகர் அஜித்குமார், திரையுலகில் தனிச்சிறப்புடன் வலம் வந்தாலும், நடிப்புக்கு அப்பாற்பட்ட தனது ஆர்வமான மோட்டார் மற்றும் கார் பந்தயத்திலும் தீவிரமாகச் சாதித்து வருகிறார். நடிப்பில் இருந்து தற்காலிகமாக விலகி, தனது முழு கவனத்தையும் ரேசிங் உலகில் செலுத்தி வரும் அஜித்குமார், இப்போது சர்வதேச அரங்கில் தனது திறமையை நிரூபித்து, ரசிகர்களைப் பெருமை கொள்ளச் செய்திருக்கிறார்.
நடிப்பை தாண்டிய அஜித்தின் ஆளுமை
நடிகர் அஜித்குமார் திரையுலகில் நுழைந்த காலத்திலிருந்தே, ரேசிங் என்றால் அவருக்குப் பெரும் ஆர்வம் உண்டு. ஆரம்பத்தில் அவர் காதல் மன்னனாக பல ஹிட் படங்களில் நடித்திருந்தாலும், ஆக்ஷன் ஹீரோவாக மாறிய பிறகு, அவருடைய உண்மையான வேகம் திரையிலும், நிஜத்திலும் வெளிப்படத் தொடங்கியது.
அவர் இதற்கு முன்னர், ஃபார்முலா ரேசிங் போட்டிகளிலும், பல்வேறு மோட்டார் பந்தயங்களிலும் கலந்துகொண்டிருக்கிறார். 2003 ஆம் ஆண்டு, அவர் பிரிட்டிஷ் ஃபார்முலா 3 சாம்பியன்ஷிப் போட்டியில் கலந்துகொண்டு, பல சர்வதேச வீரர்களுக்குச் சவால் விடுத்தார். அதன் பிறகு, 2010 இல் நடைபெற்ற ஃபார்முலா 2 சாம்பியன்ஷிப் போட்டிகளிலும் அவர் பங்கேற்றது, தமிழ் ரசிகர்களை வியப்பில் ஆழ்த்தியது. நடிப்பைத் தாண்டி, ஒரு நடிகர் தன்னுடைய ஆர்வத்தைத் தொழிலாக மாற்றி அதில் சாதனை படைக்க முடியும் என்பதற்கு அஜித்குமார் ஒரு வாழும் உதாரணம்.
ஸ்பெயின் பந்தயத்தில் AK ரேசிங் சாதனை
சமீபத்தில், ஸ்பெயின் நாட்டின் புகழ்பெற்ற பார்சிலோனா ரேஸ் டிராக்கில் நடைபெற்ற சர்வதேச கார் பந்தயத்தில், அஜித் குமார் தலைமையிலான ஏ.கே. ரேசிங் அணி (AK Racing Team) கலந்துகொண்டது. உலகளாவிய ரேசிங் குழுக்களின் திறமையைச் சோதிக்கும் மிக முக்கியமான போட்டிகளில் இதுவும் ஒன்றாகும்.
இந்தப் போட்டியில், பல்வேறு முன்னணி ரேசிங் குழுக்களுடன் கடுமையான சவால்களைச் சந்தித்த அஜித்குமாரின் அணி, அபாரமான திறமையையும், வீரத்தையும் வெளிப்படுத்தி மூன்றாவது இடத்தை பிடித்துச் சாதனைப் படைத்துள்ளது.
இதற்கு முன்னர், துபாயில் நடைபெற்ற கார் பந்தயத்திலும் அஜித்குமார் தனது அனுபவத்தையும், வீரத்தையும் வெளிப்படுத்தி வெற்றி பெற்றிருந்தார். அந்த வெற்றிக்குப் பிறகு, இப்போது உலக அரங்கில் பார்சிலோனாவில் கிடைத்திருக்கும் மூன்றாவது இடம், அஜித்குமாரின் ரேசிங் ஈடுபாட்டையும், குழுவின் கடின உழைப்பையும் வெளிப்படுத்துகிறது.
திரையில் துணிவுடன் ஆக்ஷன் காட்டிய அஜித்குமார், இப்போது பந்தயத் திடலில், துணிச்சலுடன் களமிறங்கி, உலக அரங்கில் முத்திரை பதித்திருப்பது, அவருடைய ரசிகர்களுக்கு இரட்டிப்பு மகிழ்ச்சியை ஏற்படுத்தியுள்ளது. நடிகர் அஜித்குமார் தொடர்ந்து பந்தய உலகிலும், திரையுலகிலும் பல சாதனைகளைப் படைக்க வாழ்த்துவோம்.
Click it and Unblock the Notifications
Sign in with Google