ஹிந்தி பிக் பாஸில் ஸ்ருதிகாவிற்கு அநீதி? திடீர் வெளியேற்றத்துக்கு காரணம்? மொத்த சம்பளம் இவ்வளவா?

Updated: Thursday, January 9, 2025, 18:06 [IST]

Subscribe to Oneindia Tamil

சென்னை: பிக் பாஸ் ஹிந்தி சீசன் 18ல் போட்டியாளராக சென்ற ஸ்ருதிகா நேற்று மிட் நைட் எவிக்ஷன் ஆகி வெளியே வந்திருக்கிறார். அவர் வாங்கிய சம்பள விவரங்கள்? அவர் எதற்காக வெளியேற்றப்பட்டார் என்ற விபரம் தற்போது வெளியாகி இருக்கிறது. அது பற்றி பார்க்கலாம்.

தமிழில் பெரும் பரபரப்பை ஏற்படுத்திக் கொண்டிருக்கும் பிக் பாஸ் நிகழ்ச்சி ஹிந்தியில் பதினெட்டாவது சீசன் ஒளிபரப்பாகி வருகிறது. தமிழில் இப்போதுதான் 8வது சீசன் வந்திருக்கிறது. தமிழ் பிக் பாஸ் நிகழ்ச்சியில் அதிகமான விஜய் டிவி பிரபலங்கள் கலந்து கொண்டிருக்கிறார்கள்.

அதுபோல இதுவரைக்கும் ஹிந்தி பிக்பாஸில் எந்த தமிழ் நடிகையும் கலந்து கொண்டது கிடையாது. முதல் முறையாக நடிகை ஸ்ருதிகா கலந்து கொண்டார். இவர் ஏற்கனவே சில திரைப்படங்களில் நடித்திருக்கிறார். அதுபோல விஜய் டிவியில் குக் வித் கோமாளி நிகழ்ச்சியிலும் போட்டியாளராக கலந்து கொண்டு வெற்றி பெற்றார்.

அந்த ஹிந்தி பிக் பாஸில் ஆரம்பத்திலிருந்து எல்லோரும் வியக்க வைக்கும் போட்டியாளராக ஸ்ருதிகா இருந்தார். ஹிந்தி பிரபலங்களுக்கு மத்தியில் தனி ஆளாக சிங்க பெண்ணாக இவர் ஜொலித்துக் கொண்டிருந்தார். சில நேரங்களில் இவர் துவண்டு போகும்போது பார்த்த ரசிகர்கள் இவருக்காக ஃபீல் பண்ணி வந்தனர். காரணம் தமிழில் குக் வித் கோமாளி நிகழ்ச்சியில் ஸ்ருதிகா எவ்வளவு ஜாலியான கேரக்டர் என்று எல்லோருக்கும் தெரியும்.

இவர் குக்காக வந்தாலும் கோமாளியை விடவும் ஜாலியாக சிரித்துக்கொண்டே, அடுத்தவர்களை கிண்டல் செய்து கொண்டும் இருப்பார். தன்னை எவ்வளவு ட்ரோல் செய்தாலும் அதைப்பற்றி கண்டு கொள்ளாமல் இருந்த ஸ்ருதிகா, பிக் பாஸ் நிகழ்ச்சியில் பலமுறை அழுது இருக்கிறார். ஒருமுறை நான் வீட்டிற்கு போகவேண்டும் என்று கதறி அழுதது பார்க்கும் ரசிகர்களையும் பதற வைத்திருந்தது.

இப்படியான நிலையில் இவர் எப்படியாவது பைனலுக்கு போவார் என்று தமிழ் ரசிகர்கள் நினைத்திருந்தனர். அதுபோல ஹிந்தி ரசிகர்களும் இவருக்கு ஆதரவு கொடுத்து வந்தனர். ஆனால் இவருடைய நண்பர்கள் சிலருடைய சதியால் இவர் கடைசி வாரத்தில் நாமினேஷனுக்கு வந்தார்.

கடந்த வாரத்தில் ஒரு டாஸ்க் கொடுக்கப்பட்டிருந்தது அதாவது மூன்று அணியாக பிரிந்து அங்கு இருப்பவர்களை எலிமினேஷனுக்காக நாமினேஷன் செய்ய சொல்லி இருந்தார்கள். அதில் ஸ்ருதிகாவை அவருடைய நெருங்கிய நண்பர்களாக இருந்தவர்களே நாமினேஷன் செய்தனர். இதற்கு முன்பு அவருடைய தோழியான சும் மற்றும் கிரணுக்காகவே ஸ்ருதிகா நாமினேஷனுக்கு வந்தார்.

ஆனாலும் அவர்கள் ஸ்ருதிகாவை நெருங்கிய தோழியாக நினைக்கவே இல்லை என்பது இந்த வாரத்தில் தெரியவந்தது. அது போல இந்த வாரத்தில் தமிழ் பிரபலங்கள் பலரும் வீடியோ வெளியிட்டு வாக்கு கேட்டிருந்தனர். ஆனாலும் அவருக்கு வாக்குகள் குறைவாக இருந்ததால் நேற்று அவர் மிட்நைட்டில் எவிக்ஷன் செய்யப்பட்டிருந்தார்.

அதற்கு முக்கிய காரணம் அவருடைய நண்பர்கள்தான். அதே நேரத்தில் ஸ்ருதிகா பிக் பாஸ் நிகழ்ச்சியில் 90 நாட்களை கடந்து இருக்கிறார். அதற்காக அவர் வாங்கிய சம்பள விபரமும் வெளியாகி இருக்கிறது. அதாவது பிக் பாஸ் நிகழ்ச்சியில் ஸ்ருதிகா கலந்து கொள்வதற்கு ஒரு வாரத்திற்கு 6 முதல் 8 லட்சம் வரை வாங்கியுள்ளதாக கூறப்படுகிறது.