Bigg Boss Tamil 9: காத்திருந்த ரசிகர்களுக்கு விருந்து: 'பிக் பாஸ் 9' போட்டியாளர்கள் இறுதி பட்டியல் வந்தாச்சு!
சென்னை: சின்னத்திரை ரசிகர்கள் மத்தியில் ஆண்டுதோறும் மிகப்பெரிய எதிர்பார்ப்பைக் கிளப்பும் ரியாலிட்டி ஷோவான 'பிக் பாஸ் தமிழ்' நிகழ்ச்சியின் ஒன்பதாவது சீசன் நாளை (அக்டோபர் 5) முதல் விஜய் டிவியில் ஒளிபரப்பாகத் தயாராகியுள்ளது. பிக் பாஸ் என்றாலே சண்டை, காதல், கண்ணீர், கொண்டாட்டம் எனப் பரபரப்புக்கும் விறுவிறுப்புக்கும் பஞ்சமிருக்காது. இந்த நிகழ்ச்சியை இத்தனை ஆண்டுகளாக மக்கள் விரும்பிக் காணக் காரணம் என்னவென்றால், இது வெறும் பொழுதுபோக்கு என்பதைத் தாண்டி, பல்வேறு பின்னணிகளைக் கொண்ட மனிதர்களின் நிஜமான உணர்வுகளையும், குணாதிசயங்களையும் ஒரு கூண்டுக்குள் அடைத்துப் பார்ப்பதால்தான்.
வாழ்க்கையின் அத்தனை உணர்வுகளையும் ஒரே இடத்தில் பார்க்கும் வாய்ப்பு கிடைப்பதால், பிக் பாஸ் நிகழ்ச்சி மக்கள் மனதில் ஒரு தனி இடத்தைப் பிடித்துள்ளது. இந்த சீசனையும் நடிகர் விஜய் சேதுபதி தொகுத்து வழங்கவிருக்கிறார் என்பது ரசிகர்களுக்குக் கூடுதல் உற்சாகத்தைக் கொடுத்துள்ளது.
போட்டியாளர்கள் பட்டியல்
போட்டியாளர்கள் யார், யார் என்பதை இறுதிவரை ரகசியமாக வைத்திருந்தாலும், அவர்கள் நேற்று இரவே பிக் பாஸ் வீட்டிற்குள் சென்ற நிலையில், தற்போது உள்ளே சென்றவர்களின் பட்டியல் கசிந்துள்ளது. இந்த முறை சீரியல் நடிகர்கள், தொகுப்பாளர்கள், சோஷியல் மீடியா பிரபலங்கள் எனப் பல தரப்பட்டவர்களும் களமிறங்கியிருப்பது சுவாரஸ்யத்தைக் கூட்டுகிறது.
கொங்கு மஞ்சுநாதன் (சமூக ஊடகங்களில் பிரபலமானவர்), ரம்யா ஜோ (சீரியல் நடிகை), டான்சர் மாலினி ஜீவரத்தினம் (பிரபல டான்சர்), சீரியல் நடிகர் சபரிநாதன், சீரியல் நடிகர் ரோஷன், சீரியல் நடிகை கெமி, சீரியல் நடிகர் வினோத் பாபு, மணிகண்டன் (மிஸ்டர் வேர்ல்ட் பட்டத்தை வென்றவர்), இயக்குநர் பிரவீன் காந்தி, 'மகாநதி' சீரியல் நடிகர் கம்ருதீன், வி.ஜே. பார்வதி (பிரபல தொகுப்பாளினி), வாட்டர்மெலன் ஸ்டார் திவாகர் (நகைச்சுவையாளர்), நடிகர் இர்பான் (சமூக ஊடகங்களில் பிரபலம்) சமூக ஊடகப் பிரபலம் ஆரோனா
இந்தக் கலவையான பட்டியல், வீட்டில் பல்வேறு மோதல்களுக்கும், உறவுகளுக்கும் வழிவகுக்கும் என்று எதிர்பார்க்கப்படுகிறது. குறிப்பாக, VJ பார்வதி, கம்ருதீன், மற்றும் வாட்டர்மெலன் திவாகர் போன்றவர்கள் ஏற்கெனவே தனி ரசிகர் பட்டாளத்தைக் கொண்டிருப்பதால், அவர்களது செயல்பாடுகள் ஆரம்பம் முதலே விறுவிறுப்பாக இருக்கும் என்று எதிர்பார்க்கப்படுகிறது.
இந்த சீசனின் சிறப்பம்சங்கள்
இந்த ஒன்பதாவது சீசனுக்கான பிரம்மாண்ட வீடு, முழுக்க முழுக்க 'ஸ்பேஸ் தீம்' (விண்வெளி கருத்துரு) அடிப்படையில் ஹை-டெக் வசதிகளுடன் அமைக்கப்பட்டுள்ளது. மேலும், இந்த சீசனில் முந்தைய காலங்களில் இல்லாத வகையில், பெட்ரூம் அருகிலேயே திறந்த வெளியில் 'ஜக்குஸி' (Jacuzzi) வசதியும் கொடுக்கப்பட்டிருப்பது, ரசிகர்களிடையே பெரும் விவாதத்தை ஏற்படுத்தியுள்ளது.
வீட்டிற்குள் ஏற்படும் சண்டைகள், கண்ணீர்க் காட்சிகள் ஆகியவற்றைத் தாண்டி, இந்தச் சீசனின் புதிய அமைப்புகள் மற்றும் வசதிகள் போட்டியாளர்களுக்குள் என்னென்ன நெருக்கங்களையும், சிக்கல்களையும் உருவாக்கும் என்பதைப் பார்க்க ரசிகர்கள் ஆவலுடன் காத்திருக்கின்றனர். பிக் பாஸ் வீட்டில் இந்த முறை வைல்டு கார்டு எண்ட்ரி இருக்காது என்று பேசப்படுவதால், ஆரம்பத்திலேயே 18 பேர் வரை களம் இறங்கியிருப்பது, சவால்களை அதிகரிக்கும் என்று எதிர்பார்க்கப்படுகிறது.
விஜய் சேதுபதியின் தொகுப்பு, புதிய விதிகள், மற்றும் கலவையான போட்டியாளர்களுடன் பிக் பாஸ் தமிழ் சீசன் 9 நாளை முதல் தொடங்குகிறது. இந்தச் சீசன், முந்தைய சாதனைகளை முறியடித்து, புதிய உயரங்களைத் தொடுமா என்பதைப் பொறுத்திருந்து பார்ப்போம்.
இந்த ஒன்பதாவது சீசனில் யாருடைய ஆட்டம் அதிக கவனத்தை ஈர்க்கும் என்று நீங்கள் நினைக்கிறீர்கள்?
Click it and Unblock the Notifications
Sign in with Google