இசை வெளியிட்டு விழாவில் இப்படி உருட்டுறீங்க? சாப்பாட்டை வைத்து அனுதாபமா? தனுஷ் பற்றி ப்ளூசட்டை மாறன் போஸ்ட்

சென்னை: நடிகர் தனுஷ் தானே இயக்கி நடித்துள்ள இட்லி கடை திரைப்படத்தின் இசை வெளியீட்டு விழா சென்னையில் பிரம்மாண்டமாக நடைபெற்றது. இந்த விழாவில், தனுஷின் மேலாளர் ஸ்ரேயாஸ் பேசிய சில கருத்துகள், திரைத்துறையில் புதிய சர்ச்சையைக் கிளப்பியுள்ளன. இந்த விவகாரம் குறித்து சினிமா விமர்சகர் ப்ளூ சட்டை மாறன் போட்ட போஸ்ட் சமூக வலைத்தளங்களில் வைரலாகி வருகிறது.

இயக்குநராக தனுஷின் புதிய பயணம்

நடிகர், பாடகர், பாடலாசிரியர் எனப் பன்முகத் திறமைகளைக் கொண்ட தனுஷ், பவர் பாண்டி திரைப்படத்தின் மூலம் இயக்குநராக அறிமுகமானார். அந்தப் படம் பெரிய வெற்றியைப் பெற்றது. அதன் பிறகு, அவர் இயக்கிய நிலவுக்கு என்மேல் என்னடி கோபம் திரைப்படம் சுமாரான வரவேற்பைப் பெற்றது.

தற்போது, அவர் இட்லி கடை என்ற திரைப்படத்தை இயக்கி, கதாநாயகனாகவும் நடித்திருக்கிறார். இந்தப் படத்தில் நித்யா மேனன், அருண் விஜய், ராஜ்கிரண் உள்ளிட்டோர் முக்கிய கதாபாத்திரங்களில் நடித்துள்ளனர். குபேரா, ராயன், கேப்டன் மில்லர் போன்ற அவரது சமீபத்திய படங்கள் பெரிய வெற்றியைப் பெறாத நிலையில், இட்லி கடை அவருக்கு ஒரு வெற்றியைப் பெற்றுத்தருமா என்ற எதிர்பார்ப்பில் ரசிகர்கள் உள்ளனர்.

ஸ்ரேயாஸின் பரபரப்பான பேச்சு

இட்லி கடை திரைப்படத்தின் இசை வெளியீட்டு விழாவில் தனுஷின் மேலாளர் ஸ்ரேயாஸ் பேசியது அனைவரின் கவனத்தையும் ஈர்த்தது. அவர், "பிரபலமாவதற்கு இரண்டு வழிகள் இருக்கின்றன. ஒன்று உழைத்து, ரத்தம் சிந்தி முன்னேறுவது. இரண்டாவது, உச்சத்தில் இருப்பவரை அடிப்பது. தனுஷால் வாழ்ந்தவர்கள், வளர்ந்த பிறகு அவரையே அடிக்கிறார்கள். தைரியம் இருந்தால் நேருக்கு நேர் வந்து அடிக்க வேண்டும். அவர் நல்லவனாக இருக்க வேண்டும்; ரொம்ப நல்லவராக இருக்கக்கூடாது" என்றார்.

இந்தக் கருத்துக்கள் மறைமுகமாக வேறு சில நடிகர்களைச் சாடுவதாகப் பார்க்கப்படுகிறது. இந்த சர்ச்சை பேச்சால் சோசியல் மீடியாவில் அதிகமான விமர்சனங்கள் எழுந்து வருகிறது.

புளூ சட்டை மாறனின் பதிலடி

சினிமா விமர்சகர் புளூ சட்டை மாறன், பொதுவாகப் பிரபலங்களின் பேட்டிகள் மற்றும் திரைப்படங்களை நக்கலடித்து விமர்சிப்பவர். இவர், இந்தச் சம்பவத்தையும் விட்டு வைக்கவில்லை. தனது எக்ஸ் (ட்விட்டர்) பக்கத்தில், "வேற எந்த மாநில சினிமா pre release event-லயும் நடக்காத காமெடிகள் கோலிவுட்டில் தான் நடக்கும். இவங்களுக்கு எதிரா யாரோ சதி செய்றாங்கன்னு சொல்லுவாங்க. ஆனா யாருன்னு சொல்ல மாட்டாங்க. அன்பை பரப்புங்க, ignore negativity, சாப்பாட்டுக்குக் கஷ்டப்பட்டேன்னு தத்துவமும், அனுதாபமும் கனமழையா கொட்டும். படம் சம்பந்தமா பேச பல விஷயங்கள் இருக்கும். அதை விட.. இதைத்தான் ஹெவியா உருட்டுவாங்க. Kollywood pre release events - Cringe Ultra Pro MAXXX" என்று பதிவிட்டு, இந்த விவகாரத்தைக் கடுமையாக விமர்சித்துள்ளார்.

மாறன், இதற்கு முன்னரும் தனுஷின் சில படங்களின் தோல்வி குறித்து விமர்சித்து இருக்கிறார். இந்தப் பதிவின் மூலம், அவர் மறைமுகமாகத் தமிழ் திரையுலகில் இதுபோன்ற சம்பவங்கள் அடிக்கடி நடப்பதைக் கிண்டல் செய்துள்ளார். இட்லி கடை திரைப்படம் தனுஷுக்கு வெற்றியைப் பெற்றுத் தருமா அல்லது இந்தச் சர்ச்சைகள் படத்தின் மீதான எதிர்பார்ப்பைக் குறைக்குமா என்பதைப் பொறுத்திருந்துதான் பார்க்க வேண்டும்.

English summary

Blue Sattai Maran: Actor Dhanush, who turned director with Power Paandi and is now helming Idli Kadai, launched the film’s music in Chennai with grandeur. The movie stars Nithya Menen, Arun Vijay, and Rajkiran alongside Dhanush, and fans hope it revives his box-office success after recent setbacks. However, the event took a controversial turn when Dhanush’s manager Shreyas remarked that “those who rise with Dhanush later attack him” and hinted at betrayal within the industry. His indirect comments sparked heated debate online. Popular critic Blue Sattai Maran mocked the incident, calling Kollywood pre-release events “Cringe Ultra Pro MAXXX” and accusing the industry of dramatizing negativity instead of focusing on cinema. With the film’s release nearing, all eyes are on whether Idli Kadai will overcome the controversies and deliver success for Dhanush.