சின்னத்திரை நடிகர் சங்கத் தேர்தல்: களத்தில் 3 அணிகள்.. இன்று வாக்களிக்கும் 2000 உறுப்பினர்கள்!

சென்னை: சின்னத்திரை நடிகர் சங்கத் தேர்தல் இன்று தொடங்கி உள்ளது. இதில் தினேஷ், பரத், சிவன் சீனிவாசன் ஆகியோர் தலைமையில் 3 அணிகளாக போட்டியிடுகிறார்கள். இவர்கள் தவிர நடிகை ஆர்த்தி கணேஷ் தனியாக தலைவர் பதவிக்கு போட்டியிடுகிறார்.

சென்னை, விருகம்பாக்கத்தில் சின்னத்திரை நடிகர் சங்க தேர்தல் தொடங்கியது. 2,000 உறுப்பினர்கள் இந்த தேர்தலில் வாக்களிக்க உள்ளனர்.

சுமார் 2000 உறுப்பினர்களைக் கொண்ட சின்னத்திரை நடிகர் சங்கத்தின் தேர்தல் இன்று தொடங்கி உள்ளது. இதற்கான வேட்புமனு தாக்கல் கடந்த ஜூலை 22 ஆம் தேதி துவங்கியது. தொடர்ந்து, சின்னத்திரை நடிகர் சங்க உறுப்பினர்களிடம் வேட்பாளர்கள் வாக்கு சேகரித்து வந்தனர்.

சிவன் சீனிவாசன் தலைவராகவும், போஸ் வெங்கட் செயலாளராகவும் இருந்து வரும் தற்போதைய நிர்வாகத்தின் பதவி காலம் முடிவடைவதையடுத்து தேர்தல் அறிவிக்கப்பட்டது. தலைவர், செயலாளர், பொருளாளர் பதவிகளைத் தவிர, இரண்டு துணைத் தலைவர்கள், நான்கு இணைச் செயலாளர்கள், 14 கமிட்டி உறுப்பினர்கள் என மொத்தம் 23 பதவிகளுக்கு தேர்தல் நடைபெறுகிறது.

சிவன் சீனிவாசன் தலைமையிலான அணி மீண்டும் இந்த தேர்தலில் போட்டியிடுகிறது. கடந்த தேர்தலில் இதே அணியில் துணைத் தலைவராகப் போட்டியிட்ட பரத், இந்த முறை தனியாக ஒரு அணியை உருவாக்கினார்.

நடிகரும் பிக் பாஸ் பிரபலமுமான தினேஷ் கோபால்சாமி தலைமையில் மூன்றாவதாக ஒரு அணியும் களத்தில் இறங்கியது. மூன்று அணிகளின் சார்பாக மொத்தம் 69 பேர் போட்டியிடும் நிலையில், நடிகை ஆர்த்தி கணேஷ்கர் சுயேட்சையாக தலைவர் பதவிக்கு போட்டியிடுகிறார்.

தினேஷ், பரத், நிரோஷா, நவீந்தர், துரைமணி, ராஜ்காந்த், அழகப்பன், லொள்ளு சபா பழனியப்பன், மீனா குமாரி, பிரேமி வெங்கட், ரவீனா மற்றும் மறைந்த நடிகர் நேத்ரனின் மனைவி தீபா உள்ளிட்டோர் வேட்பாளர் பட்டியலில் இடம்பெற்றுள்ளனர்.

English summary

Chinnathirai Nadigar Sangam elections have begun today. Dinesh, Bharath and Sivan Srinivasan are contesting in three teams. Apart from them, actress Aarthi Ganeshkar is contesting for the post of president on her own.