குக் வித் கோமாளி 7 தொடங்கும் முன்பே பஞ்சாயத்து.. புகழ் பற்றி நெட்டிசன் போட்ட கமெண்டுக்கு வந்து விழுந்த அடி!
சென்னை: விஜய் டிவியில் ஒளிபரப்பாக இருக்கும் குக் வித் கோமாளி சீசன் 7 தொடங்குவதற்கும் முன்பே இந்த நிகழ்ச்சி பெரிய அளவில் பேசுபொருளாக மாறி இருக்கிறது. காரணம்-நிகழ்ச்சியில் கலந்து கொள்ளும் காமெடி நடிகர் புகழ் கொடுத்த பதில்தான்.
குக் வித் கோமாளி கிராண்ட் லான்ச் ப்ரோமோ
சமீபத்தில் வெளியான கிராண்ட் லாஞ்ச் ப்ரோமோ வீடியோக்கு கீழே, ஒரு நெட்டிசன் "இந்த புகழை ஏன் டா மீண்டும் மீண்டும் கூப்பிடுறீங்க... அவனுக்கு காமெடி பண்ண தெரியாதே" என்று விமர்சனமாக கமெண்ட் போட்டிருந்தார். இதற்கு நேரடியாக பதில் கொடுத்த புகழ், "ப்ளீஸ் விஜய் டிவிக்கு மெயில் போடுங்க... உங்க காமெடி வீடியோ அனுப்புங்க... உங்களை புதிய கோமாளியாக எடுத்துக்குவாங்க" என்று கலாய்த்து பதிலடி கொடுத்துள்ளார்.
இந்த பதில் சமூக வலைதளங்களில் வேகமாக பரவி, "சரியான கவுண்டர்" என்று பலரும் பாராட்டி வருகின்றனர். விமர்சனத்திற்கே நகைச்சுவையாக பதில் கொடுத்த விதம் ரசிகர்களை கவர்ந்திருக்கிறது.
கிராண்ட் லாஞ்ச் ஸ்பெஷல்
இந்த சீசன் ப்ரோமோவில் பல புதிய அம்சங்கள் ரசிகர்களின் கவனத்தை ஈர்த்துள்ளன. நடிகை ரோஜா புதிய நடுவராக அறிமுகமாகிறார். அவரை சமையல் நிபுணர்களான செஃப் தாமு மற்றும் மாதம்பட்டி ரங்கராஜன் இணைந்து வரவேற்கும் காட்சிகள் இடம்பெற்றுள்ளன. இதற்கு கூடுதலாக, பிரமாண்டமான மேடை அமைப்பு, கலர்ஃபுல்லான டான்ஸ், கலாட்டா தருணங்கள் ஆகியவை இந்த சீசன் இன்னும் வித்தியாசமாக இருக்கப் போகிறது என்பதை காட்டுகின்றன.
இந்த சீசனில் யார் யார்?
ஆனா இந்த சீசனின் மிகப்பெரிய ட்விஸ்ட் போட்டியாளர்கள்தான். இதுவரை தனித்தனியாக வந்த குக்குகள், இந்த முறை ரியல் லைஃப் கணவன்-மனைவி ஜோடிகளாக களமிறங்க இருக்கிறார்கள். அதாவது சமையலுக்கு கூடுதலாக குடும்ப கலாட்டாவும் சேரும். அந்த வகையில் பாடகர் மனோ - ஜமீலா, அரவிந்த் - சங்கீதா, கானா வினோத் - பாக்கியா, ரியாஸ் - நிஷா, சம்யுக்தா - அனிருத்தா போன்ற ஜோடிகள் பங்கேற்கிறார்கள்.
இதோடு சேர்த்து இன்னொரு சர்ப்ரைஸ்-யூடியூப் உலகில் பெரிய வரவேற்பு பெற்ற பரிதாபங்கள் சேனல் மூலம் பிரபலமான டேவிட், தனது மனைவியுடன் இந்த சீசனில் போட்டியாளராக வருகிறார். கோமாளிகள் பக்கம் பார்த்தால், பழைய ஹிட் டீம் தான் மீண்டும் களம் இறங்குகிறது-புகழ், சுனிதா, ராமர், தங்கதுரை போன்றவர்கள் மீண்டும் சிரிக்க வைக்க வருகிறார்கள்.
ஏன் இவ்வளவு எதிர்பார்ப்பு?
குக் வித் கோமாளி என்பது ஒரு சாதாரண சமையல் நிகழ்ச்சி மட்டும் அல்ல. இது நகைச்சுவை, சமையல், கலாட்டா கலந்த குடும்ப பொழுதுபோக்கு நிகழ்ச்சி. ஒவ்வொரு சீசனிலும் வைரலாகும் தருணங்கள், மீம்ஸ், ரசிகர்களின் எதிர்பார்ப்பை அதிகரித்துக் கொண்டே வருகிறது. குறிப்பாக கோமாளிகள் தான் இந்த நிகழ்ச்சியின் மிகப்பெரிய பலம் என்பதால், யார் யார் இந்த முறை வரப்போகிறார்கள் என்ற ஆர்வமும் அதிகமாக உள்ளது.
ரசிகர்கள் என்ன சொல்கிறார்கள்?
புகழின் இந்த பதிலுக்கு ரசிகர்கள் பலரும் "சூப்பர் கவுண்டர்", "இதுதான் உண்மையான காமெடி டைமிங்", "அதனால்தான் இவரை மீண்டும் மீண்டும் அழைக்கிறார்கள்" என்று ஆதரவு தெரிவித்து வருகின்றனர். விமர்சனத்தையும் நகைச்சுவையாக மாற்றிய விதம் அனைவரிடமும் நல்ல வரவேற்பை பெற்றுள்ளது.
சீசன் 7 இன்னும் தொடங்கவில்லை. ஆனால் அதற்குள் ப்ரோமோ, கமெண்ட், புகழின் பதில் என நிகழ்ச்சி மீதான எதிர்பார்ப்பு அதிகரித்து வருகிறது. இந்த வேகத்தை பார்த்தால், இந்த சீசனும் ரசிகர்களை அதிகமாக கவரும் என்பது உறுதியாக தெரிகிறது.
Click it and Unblock the Notifications
Sign in with Google