Coolie: கூலி ரிலீஸ் நாளில் ரஜினிகாந்த் செய்ய போகும் சம்பவம்! இவரால் மட்டும் எப்படி இப்படி முடியுது

Updated: Friday, August 1, 2025, 13:09 [IST]

Subscribe to Oneindia Tamil

சென்னை: நடிகர் ரஜினிகாந்த் நடித்துள்ள 'கூலி' திரைப்படம் ஆகஸ்ட் 14-ம் தேதி வெளியாக இன்னும் 13 நாட்களே உள்ள நிலையில், படத்திற்கான எதிர்பார்ப்புகள் உச்சத்தை எட்டியுள்ளன. இந்த பரபரப்பான சூழலில், 'கூலி' வெளியாகும் அன்று ரஜினிகாந்த் எங்கு இருப்பார் என்பது குறித்த தகவல் வெளியாகி, ரசிகர்களை வியப்பில் ஆழ்த்தியுள்ளது. அதன்படி, ரஜினிகாந்த் அன்றைய தினம் தனது அடுத்த படத்தில் ஷூட்டிங்கில் கலந்து கொள்ள இருக்கிறாராம்.

கூலி - ரஜினியும் லோகேஷும் இணைந்த சிறப்பு

'கூலி' திரைப்படத்தை லோகேஷ் கனகராஜ் இயக்கியுள்ளார். லோகேஷ் கனகராஜ், கமல்ஹாசனுக்கு 'விக்ரம்' படத்தின் மூலம் ஒரு தரமான வெற்றியைப் பரிசளித்தார். அதேபோன்று, ரஜினிக்கும் ஒரு தரமான சம்பவத்தைச் செய்வார் என்பது சூப்பர் ஸ்டார் ரசிகர்களின் நம்பிக்கையாக உள்ளது. மேலும், இதில் அவருடன் சத்யராஜ், ஆமிர் கான், சௌபின் சாஹிர், நாகார்ஜுனா, ஸ்ருதிஹாசன் உள்ளிட்டோர் நடித்துள்ளனர். பூஜா ஹெக்டே ஒரு பாடலுக்கு நடனமாடியிருக்கிறார். இந்தப் படத்திற்கு அனிருத் இசையமைத்துள்ளார். இதுவரை வெளியான மூன்று சிங்கிள் பாடல்களில், 'மோனிகா' மற்றும் 'பவர் ஹவுஸ்' பாடல்கள் ஹிட்டாகியுள்ளன.

நாளை ஆடியோ வெளியீட்டு விழா

படத்தின் ட்ரெய்லரும், ஆடியோ வெளியீட்டு விழாவும் நாளை நடைபெறுகிறது. இந்த விழாவில் அனிருத்தின் பெர்ஃபார்மென்ஸும் இருக்கும் என்பதால், ரசிகர்கள் ஆவலுடன் எதிர்பார்த்துள்ளனர். மேலும், லோகேஷ் கனகராஜ் ஒரு பேட்டியில், "நான் ஒரு கமல்ஹாசன் ரசிகர் என்று ரஜினியிடம் சொன்னபோது, அவர், 'இசை வெளியீட்டு விழாவில் உங்களைப் பார்த்துக் கொள்கிறேன்' என்று வேடிக்கையாகச் சொன்னார்," என்று குறிப்பிட்டிருந்தார். எனவே, நாளை ரஜினியின் பேச்சிலும், வேடிக்கையான சம்பவங்களும் அதிகமாக இருக்கும் என்று ரசிகர்கள் எதிர்பார்த்துள்ளனர்.

கூலி ரிலீஸ் நாளில் ஜெயிலர் 2 ஷூட்டிங்

'கூலி' திரைப்படம் ரிலீசாகும் நாளான ஆகஸ்ட் 14-ம் தேதி ரஜினிகாந்த் என்ன செய்வார் என்பது குறித்த தகவல் தற்போது வெளியாகியுள்ளது. அதன்படி, நெல்சன் திலீப்குமார் இயக்கத்தில் உருவாகிவரும் 'ஜெயிலர்' படத்தின் இரண்டாவது பாகத்தின் ஷூட்டிங்கில் அன்றைய தினம் ரஜினிகாந்த் கலந்துகொள்ளவிருக்கிறார்.

இந்த வயதிலும், ஒரு படம் ரிலீசாகும் நாளில் இன்னொரு படத்தின் வேலையில் ஈடுபடும் ரஜினியின் இந்த முடிவு, அவரது கடின உழைப்பையும், தொழிலின் மீதான அர்ப்பணிப்பையும் காட்டுகிறது. இது அவரது ரசிகர்களை ஆச்சரியப்படுத்துவதுடன், மற்றவர்களுக்கு ஒரு உத்வேகத்தையும் அளித்துள்ளது.