இதுதாங்க என்னோட நெடுநாள் கனவு! எப்போ நிறைவேறும்னு தெரியல! உறுக்கமாக பேசிய ஃபகத் பாசில்
சென்னை: இந்தியத் திரையுலகில் தனது தனித்துவமான நடிப்பால் அழுத்தமான முத்திரையைப் பதித்து வரும் மலையாள நடிகர் ஃபகத் பாசில், தமிழைத் தாண்டியும் ரசிகர்கள் மத்தியில் நன்கு அறியப்பட்டவர். தற்போது தமிழில் வடிவேலுவுடன் இணைந்து நடித்துள்ள 'மாரீசன்' படத்தின் வெளியீட்டிற்காகக் காத்திருக்கும் நிலையில், அதன் ப்ரோமோஷன் பணிகளில் தீவிரமாக ஈடுபட்டுள்ளார். இந்த தருணத்தில், அவரது வழக்கத்திற்கு மாறான ஓர் ஆசையான, "ஸ்பெயின் நாட்டில் ஊபர் ஓட்டுநராகப் பணியாற்றுவது" குறித்த கனவு, மீண்டும் பேசு பொருளாகியுள்ளது.
ஐந்து ஆண்டுகளுக்கு முன்பு, அதாவது 2020 இல் தனது 'சி யூ சூன்' படத்தை விளம்பரப்படுத்தும் போது, ஃபகத் பாசில் தனது இந்த ஆசையை முதல் முறையாக வெளிப்படுத்தினார். தற்போது, 'தி ஹாலிவுட் ரிப்போர்டர்' நேர்காணலில் அந்தக் கனவு அப்படியேதான் இருக்கிறதா என்று கேட்கப்பட்டபோது, "ஆமாம் நிச்சயமாக... அது கொஞ்சமும் மாறவில்லை," என்று உறுதியாகப் பதிலளித்துள்ளார்.
மாறாத கனவு
மேலும் தனது கனவு குறித்து விவரித்த ஃபகத், "சில மாதங்களுக்கு முன்பு நாங்கள் பார்சிலோனாவில் இருந்தபோது அதைப் பற்றி ஆழமாகச் சிந்தித்துக் கொண்டிருந்தேன். மக்கள் என்னை முழுவதுமாக விட்டுவிட்டால் தான் அது சாத்தியமாகும், இல்லையா?" என்று தனது நட்சத்திர அந்தஸ்து அத்தகைய எளிய வாழ்க்கைக்குத் தடையாக இருப்பதையும் மறைமுகமாக ஒப்புக்கொண்டார்.
"நகைச்சுவையை விட்டுவிடுங்கள், ஒருவரை ஒரு இடத்தில் இருந்து மற்றொரு இடத்துக்கு அழைத்துச் செல்வது ஒரு அழகான விஷயம் என நினைக்கிறேன். குறைந்தபட்சம் நாம் மக்கள் சென்றடைய வேண்டிய இடத்தைப் பற்றித் தெரிந்துகொள்வோம். இப்போதும் எனக்கு வண்டி ஓட்ட நேரம் கிடைக்கும்போது அதைச் செய்கிறேன். அங்கே, இங்கே என எல்லாப் பக்கமும் செல்கிறேன். எனக்கு இன்னமும் ட்ரைவிங் பிடித்திருக்கிறது. நான் ட்ரைவ் செய்வதைத்தான் எனக்கான நேரமாக (Me time) கருதுகிறேன். வாகனம் ஓட்டும்போது சிந்திப்பதற்கும் நன்றாக இருக்கிறது," என்று ஃபகத் பாசில் தனது இந்த ஆசைக்கான ஆழமான காரணங்களைப் பகிர்ந்துகொண்டார். இது அவரது இயல்பான, ஆடம்பரமற்ற வாழ்க்கை மீதான நாட்டத்தையும், தனது உள்மன அமைதிக்காக அவர் மேற்கொள்ளும் செயல்களையும் காட்டுகிறது.
தமிழ்த்திரை உலகின் ஃபகத் பாசில்
ஃபகத் பாசில் மலையாள சினிமாவில் 'டிரான்ஸ்', 'மகேஷிண்டே பிரதிகாரம்', 'கும்பளங்கி நைட்ஸ்' போன்ற பல வெற்றிகரமான மற்றும் விமர்சன ரீதியாகப் பாராட்டப்பட்ட படங்களில் நடித்துள்ளார். இவரது கதாபாத்திரத் தேர்வுகள், நடிப்பின் மீதான அர்ப்பணிப்பு, மற்றும் துணிச்சலான முயற்சிகள் இவரை இந்திய அளவில் ஒரு சிறந்த நடிகராக உயர்த்தியுள்ளன.
தமிழ்த் திரையுலகிலும் ஃபகத் பாசில் தனது முத்திரையைப் பதித்துள்ளார். சிவகார்த்திகேயனுடன் இணைந்து நடித்த 'வேலைக்காரன்' திரைப்படம் தமிழில் அவரது முதல் முக்கியமான படமாக அமைந்தது. அதைத் தொடர்ந்து, லோகேஷ் கனகராஜ் இயக்கிய கமல்ஹாசனின் 'விக்ரம்' படத்தில் அமர் என்ற மிரட்டலான கதாபாத்திரத்தில் நடித்து ரசிகர்களின் மனதை வென்றார். இந்தப் படம் இவருக்குத் தமிழில் ஒரு பெரிய அங்கீகாரத்தைப் பெற்றுத் தந்தது.
ஊபர் ஓட்டுநர் ஃபகத்
சமீபத்தில், மாரி செல்வராஜ் இயக்கத்தில் உதயநிதி ஸ்டாலின் நடித்த 'மாமன்னன்' படத்தில் ரத்னவேலு என்ற எதிர்மறை கதாபாத்திரத்தில் நடித்து பெரும் பாராட்டைப் பெற்றார். அவரது அழுத்தமான நடிப்பு, படத்தின் வெற்றிக்கு முக்கிய காரணங்களில் ஒன்றாக அமைந்தது. இந்தப் படங்களுக்காக அவர் சந்தித்த விமர்சனங்கள், பின்னர் அவரது நடிப்பின் மூலம் கிடைத்த வெற்றியில் மறைந்து போனது. 'மாரீசன்' படத்தில் வடிவேலுவுடன் இணைந்து ஃபகத் பாசில் நடிக்கிறார் என்பது, படத்தின் மீதான எதிர்பார்ப்பை மேலும் அதிகரித்துள்ளது.
ஃபகத் பாசிலின் இந்த 'ஊபர் டிரைவர்' கனவு, நட்சத்திர அந்தஸ்தைப் பொருட்படுத்தாமல் ஒரு எளிய வாழ்க்கையின் அமைதியை நாடும் அவரது தனித்துவமான ஆளுமையைப் பறைசாற்றுகிறது. தனது நடிப்புத் திறனால் அனைவரையும் ஆச்சரியப்படுத்தும் ஃபகத், தனது தனிப்பட்ட ஆசைகளாலும் ரசிகர்களை வியக்க வைக்கிறார்.
Click it and Unblock the Notifications
Sign in with Google