காப்பிரைட் பிரச்சனை.. தேவா சொல்வது பொய்! நடப்பது இதுதான்! திடீரென ஜேம்ஸ் வசந்தன் வெளியிட்ட பதிவு

சென்னை: இசையமைப்பாளர் தேவா தன்னுடைய பாடல்களுக்கு தான் காப்பிரைட் கேட்கப்போவதில்லை என்று சொன்னதாக செய்திகள் வைரலானதை தொடர்ந்து, ஜேம்ஸ் வசந்தன் அதற்கு மறுப்பு தெரிவித்து ஒரு பதிவு வெளியிட்டு இருக்கிறார். அதில் இசை அமைப்பாளர்களின் காப்பி ரைட் பற்றிய விளக்கம் கொடுத்திருக்கிறார்.

சின்னத்திரை நிகழ்ச்சிகளில் தொகுப்பாளராக பிரபலமான ஜேம்ஸ் வசந்தன் சுப்பிரமணியபுரம், பசங்க, நாணயம், ஈசன், நாகராஜசோழன் எம்ஏ எம்எல்ஏ போன்ற திரைப்படங்களுக்கு இசையமைத்து இசை அமைப்பாளர் அவதாரமும் எடுத்திருந்தார். அதுபோல "ஓ அந்த நாட்கள்" என்ற திரைப்படத்தை இயக்கியும் இருக்கிறார். அதுபோல சமூக வலைத்தளத்தில் நடக்கும் பிரச்சனைகள் குறித்து அடிக்கடி பதிவு வெளியிட்டு பரபரப்பு ஏற்படுத்திக் கொண்டிருக்கிறார்.

அதிலும் இசையமைப்பாளர் இளையராஜா தன்னுடைய பாடல்களுக்கு காப்பிரைட் கேட்டது குறித்து அதிகமாக ஜேம்ஸ் வசந்தன் பேசியிருந்தார். அதுபோல சில நாட்களுக்கு முன்பு இசை அமைப்பாளர் தேவா, என்னுடைய பாடல்களுக்கு நான் காப்பி ரைட் கேட்க மாட்டேன். என்னுடைய பாடல்கள் மீண்டும் திரைப்படங்களில் பயன்படுத்தப்படுவதை இப்போது உள்ள 2k கிட்ஸ்களும் கேட்டு ரசிக்கிறார்கள்.

இது கோடி ரூபாய் கொடுத்தாலும் கிடைக்காத சந்தோஷம். எனக்கு பணத்தை விடவும் இப்போது உள்ள ரசிகர்கள் என்னுடைய பாடலை கேட்பதுதான் மகிழ்ச்சி என்று பேசியதாக செய்திகள் வெளியானது. இந்த நிலையில் இது பற்றி ஜேம்ஸ் வசந்தன் தன்னுடைய facebook தளத்தில் ஒரு பதிவு வெளியிட்டு இருக்கிறார். அதில்,
"என் பாடல்களுக்கு நான் Copyright கேட்கமாட்டேன்" என இசையமைப்பாளர் தேவா அண்மையில் சொன்னதாக சமூக ஊடகங்களில் ஒரு தகவல் வலம்வருகிறது. அப்படி அவர் சொல்லியிருந்தால் அது அவரது அறியாமை அல்லது உண்மையற்ற கூற்று.

ஏனெனில் இந்தியாவிலுள்ள எல்லா இசையமைப்பாளர்களைப் போலவே (இளையராஜா தவிர) அவரும் ஒரு IPRS உறுப்பினர்தான். நீங்களே அந்த இணையதளத்தில் போய் பார்த்துக்கொள்ளலாம். இது ஒன்றும் ரகசியமெல்லாம் அல்ல. யார் வேண்டுமானாலும் யாரெல்லாம் அதில் உள்ளனர் என்பதைக் காண இயலும். உறுப்பினர் பெயர்கள் எல்லாமே அதில் உள்ளன. DEVA - COMPOSER - 00254161291

நாம் இதில் உறுப்பினராக இணைந்துவிட்டால், நம் பாடல் ஒன்று வெளியாகி விட்டால், அதை ரசிகர்கள் கேட்கக் கேட்க அதற்கான ஆதாய உரிமைத்தொகை நம் கணக்கில் சேர்ந்துகொண்டே இருக்கும். ஒவ்வொரு மாதமும் குறிப்பிட்ட நாளில் நம் கணக்கிலிருக்கும் தொகையை நமக்கு அனுப்பிவிடுவார்கள்.

இப்படி அவருக்கும் எல்லாருக்கும் இது வந்துகொண்டேதானிருக்கும். எங்கள் எல்லாருக்கும் வந்துகொண்டுதானிருக்கிறது. இதன் பின்னணி தெரியாத பலர் அவரைப் பாரட்டியும் இளையராஜாவை இகழ்ந்தும் பேசிவருதால் இதனை எல்லோரும் அறிந்துகொள்வது நலம் என்று இந்த விளக்கம் என ஜேம்ஸ் வசந்தன் விளக்கம் கொடுத்து இருக்கிறார். ஏற்கனவே சில நாட்களாக தேவா காப்பிரைட் நான் கேட்க மாட்டேன் என்று சொன்னதாக செய்திகள் வெளியானதில் இருந்து அதிகமான ரசிகர்கள் இளையராஜாவை திட்டி வருகிறார்கள்.

இன்னும் ஒரு சில ரசிகர்கள் தேவா போடுவது காபி பாடல் அதனால் அவர் காப்பிரைட் கேட்கவில்லை என்று கிண்டல் செய்து வருகிறார்கள். அதே நேரத்தில் இப்போது ஜேம்ஸ் வசந்தன் புது விளக்கம் கொடுத்திருக்கிறார். இதற்கு தேவா தரப்பில் இருந்து என்ன பதில் சொல்லப் போகிறார்கள் என்று பொறுத்திருந்து பார்க்கலாம்.

English summary

James Vasanthan: Following the news that the composer Deva has said that she is not going to listen to his songs, James Vasanthan has refused to do so. In it, he has explained the music composer's coffee right.