"கனா காணும் காலங்கள் நந்தினிக்கு கல்யாணம்!" காதலரை கரம் பிடித்த நடிகை.. வித்தியாசமான திருமணம்
சென்னை: சின்னத்திரை ரசிகர்களின் மனதில் தனக்கென ஒரு இடத்தைப் பிடித்துள்ள 'கனா காணும் காலங்கள்' வெப் சீரிஸின் நந்தினி, நிஜ வாழ்க்கையில் புதிய பயணத்தை தொடங்கியுள்ளார். நடிகை தேஜா வெங்கடேஷ், தனது நீண்டநாள் காதலரான ஹரிஹரன் பாபுவை எளிமையான முறையில் திருமணம் செய்து கொண்டுள்ளார். இவர்களின் திருமண புகைப்படங்கள் மற்றும் வீடியோக்கள் தற்போது சமூக வலைதளங்களில் வேகமாக பரவி ரசிகர்களின் கவனத்தை ஈர்த்து வருகின்றன.
காதலை உறுதி செய்த ஜோடி
சில மாதங்களுக்கு முன்பே தனது காதல் குறித்து ரசிகர்களிடம் பகிர்ந்திருந்த தேஜா வெங்கடேஷ், பிப்ரவரி 9-ஆம் தேதி தனது வாழ்க்கையில் மிகவும் முக்கியமான நாள் என குறிப்பிட்டு, ஹரிஹரன் பாபுவை தனது "கனவுகளின் நாயகன்" என அறிமுகப்படுத்தியிருந்தார்.
அந்த பதிவு வெளியானதும் ரசிகர்கள் பலரும் வாழ்த்துகளை தெரிவித்திருந்தனர். காதலை வெளிப்படையாக அறிவித்த அந்த ஜோடி, இன்று குடும்பத்தினர் மற்றும் நெருங்கிய நண்பர்கள் முன்னிலையில் திருமணம் செய்து கொண்டு தங்களது உறவை அடுத்த கட்டத்திற்கு கொண்டு சென்றுள்ளனர்.
எளிமையான திருமணம்
பிரம்மாண்ட திருமண மண்டபம், கோலாகல கொண்டாட்டம் எதுவும் இல்லாமல், மிகவும் எளிமையான மற்றும் பாரம்பரியமான முறையில் இந்த திருமணம் நடைபெற்றுள்ளது.
சிவப்பு நிற பட்டுப் புடவையில் மணப்பெண் கோலத்தில் மிளிர்ந்த தேஜாவும், வெள்ளை வேட்டி சட்டையில் மணமகன் ஹரிஹரன் பாபுவும் அனைவரின் கவனத்தையும் ஈர்த்தனர்.
திருமண நிகழ்ச்சியில் இருவரும் ஒருவருக்கொருவர் செயின் அணிவித்து, தங்களது காதலை திருமணமாக உறுதி செய்த தருணம் அங்கிருந்த அனைவரையும் நெகிழச் செய்ததாக கூறப்படுகிறது. பொதுவாக திருமணத்தின்போது மாப்பிள்ளை தான் பெண்ணுக்கு தாலி கட்டுவார்.. ஆனால் இவர்களுடைய கல்யாணத்தில் முதலில் தேஜா மாப்பிள்ளை ஹரிஹரன் கழுத்தில் செயினை போடும்போது அவர் முட்டி போட்டு அதை வாங்கிக் கொள்கிறார். பிறகு ஹரிஹரன் தேஜா கழுத்தில் செயினை போடும்போது அதே போல முட்டி போட்டு செயினை வாங்கிக் கொள்கிறார்.
நந்தினியாக அறிமுகம்
தேஜா வெங்கடேஷ் என்ற பெயரை விட, 'கனா காணும் காலங்கள்' தொடரின் நந்தினி என்ற கதாபாத்திரம் மூலமாகவே அவர் ரசிகர்களிடம் மிகவும் பிரபலமானார்.
அந்த தொடரில் அவரது இயல்பான நடிப்பும், எளிமையான தோற்றமும் இளைஞர்கள் மத்தியில் நல்ல வரவேற்பைப் பெற்றது. அதற்கு முன்பாக யூடியூபில் வெளியான 'ஆஹா கல்யாணம்' வெப் தொடரிலும் நடித்திருந்த அவர், தொடர்ந்து சின்னத்திரையில் தனக்கென ரசிகர் பட்டாளத்தை உருவாக்கியுள்ளார்.
வைரலாகும் திருமண வீடியோக்கள்
திருமண நிகழ்ச்சியில் எடுக்கப்பட்ட புகைப்படங்கள் மற்றும் வீடியோக்கள் தற்போது இன்ஸ்டாகிராம், யூடியூப் உள்ளிட்ட சமூக வலைதளங்களில் வைரலாகி வருகின்றன.
"நந்தினிக்கு கல்யாணம் ஆயிடுச்சா?", "கனா காணும் காலங்கள் ரசிகர்களுக்கு இது செம சர்ப்ரைஸ்", "இருவரும் அழகான ஜோடி" என ரசிகர்கள் கமெண்ட்களில் வாழ்த்துகளை குவித்து வருகின்றனர்.
ரசிகர்களின் வாழ்த்து மழை
திருமண செய்தி வெளியான சில மணி நேரங்களிலேயே ஆயிரக்கணக்கான ரசிகர்கள் மற்றும் சின்னத்திரை பிரபலங்கள் தேஜா - ஹரிஹரன் ஜோடிக்கு வாழ்த்துகளை தெரிவித்து வருகின்றனர்.
காதலாக தொடங்கிய இந்த உறவு, இன்று திருமண பந்தமாக மாறியுள்ள நிலையில், "நந்தினியின் புதிய வாழ்க்கை இனிமையாக அமைய வேண்டும்" என ரசிகர்கள் மனமார்ந்த வாழ்த்துகளை பகிர்ந்து வருகின்றனர்.
சின்னத்திரையின் செல்ல நாயகி தேஜா வெங்கடேஷுக்கு புதிய வாழ்க்கை தொடங்கியுள்ளது. காதலாக மலர்ந்த இந்த உறவு, இனி அழகான குடும்ப வாழ்க்கையாக மலரட்டும் என்பதே ரசிகர்களின் ஒருமித்த வாழ்த்தாக உள்ளது.
Click it and Unblock the Notifications
Sign in with Google