ஹுசைனிக்கு அஞ்சலி செலுத்த வந்த காயத்ரி.. கலா மாஸ்டர் சொன்ன உருக்கமான வார்த்தை.. கலங்கிய நடிகர்

Updated: Tuesday, March 25, 2025, 15:59 [IST]

Subscribe to Oneindia Tamil

சென்னை: திரைப்பட நடிகராகவும் கராத்தே நிபுணராகவும் இருந்த ஹுசைனி ரத்த புற்று நோயால் பாதிக்கப்பட்டு மருத்துவமனையில் சிகிச்சை பெற்று வந்த நிலையில் சிகிச்சை பலனின்றி இன்று காலையில் காலமானார். அவருடைய இறுதி சடங்கில் நடிகையையும் அரசியல் பிரமுகருமான காயத்ரி கலந்து கொண்டிருக்கிறார். அதுபோல கலா மாஸ்டர் இந்த நிகழ்வில் கலந்து கொண்டு கண்ணீரோடு ஹுசைனி குறித்து பேசி இருக்கிறார்.

மதுரையை பூர்வீகமான கொண்ட ஷிஹான் ஹுசைன் கராத்தே மாஸ்டராக பல நடிகர்களுக்கும் பல மாணவர்களுக்கும் பயிற்சி அளித்திருக்கிறார். அதுபோல திரைப்படங்களிலும் நடித்திருக்கிறார். புன்னகை மன்னன் என்ற திரைப்படத்தின் மூலமாகத்தான் சினிமாவில் அறிமுகமானார். அதற்கு பிறகு வேலைக்காரன், மூங்கில் கோட்டை, பத்ரி, காத்து வாக்குல ரெண்டு காதல் உட்பட பல படங்களில் நடித்திருக்கிறார்.

பலருக்கும் முன்மாதிரி

அதுபோல பல மாணவர்களுக்கு வில்வித்தை மற்றும் கராத்தே பயிற்சி அளித்து கொண்டிருக்கிறார். தமிழ் சினிமாவில் பல நடிகர்களும் இவரிடம் கராத்தே பயிற்சி எடுக்கிறார்கள். நடிகர் விஜய் கூட பத்ரி படத்திற்காக இவரிடம் தான் கராத்தே பயிற்சி முறையாக கற்றுக் கொண்டாராம். இவருக்கு ரத்த புற்றுநோய் பாதிக்கப்பட்டு இருப்பதை தெரிந்ததும் டாக்டர்கள் நீங்கள் 10 நாட்கள் தான் உயிரோடு இருப்பீர்கள் என்று அதிர்ச்சிகரமான விஷயத்தை சொல்லி இருந்தனர்.

ஹுசைன் கடைசி ஆசை

ஆனாலும் சிரித்த முகமாக அதை ஏற்றுக் கொண்டார். கடந்த இரண்டு வாரங்களாக அவர் தன்னுடைய கடைசி ஆசைகள் ஒவ்வொன்றையும் சொல்லிக் கொண்டே இருந்தார். தன்னுடைய மாணவர்கள் தமிழ்நாடு சார்பாக ஒலிம்பிக் நிகழ்ச்சியில் பங்கு பெற்று வெற்றி பெற வேண்டும் என்பது என்னுடைய ஆசை அதற்கு முறையாக விளையாட்டு அரங்கம் வேண்டும் என்று விளையாட்டு துறை அமைச்சரும் துணை முதல்வருமான உதயநிதி ஸ்டாலினுக்கு வேண்டுகோள் வைத்திருந்தார்.

அதுபோல நடிகர் விஜய் தமிழ்நாட்டில் ஒவ்வொரு வீட்டிலும் ஒரு வில்வித்தை வீரரை உருவாக்க வேண்டும் என்றும் கூறியிருந்தார். தன்னுடைய கராத்தே பள்ளியை விற்கப் போகிறேன் என்றும் கூறியிருந்தார். ஒவ்வொரு நாளும் தன்னுடைய ரத்தத்தின் அளவு குறைந்து கொண்டே வரும்போதும் தனக்கு பிறகு தன்னுடைய மாணவர்கள் என்னவெல்லாம் செய்ய வேண்டும் என்று கூறியிருந்தார்.

டான்ஸ் மாஸ்டர் கலா வருத்தம்

அதுபோல இறப்பதற்கு மூன்று நாட்களுக்கு முன்பு தன்னுடைய உடலை தானம் செய்திருந்தார். தன்னுடைய இதயம் தவிர மற்ற பாகங்களை தானம் செய்திருந்தார். இதயத்தை மட்டும் மதுரையில் உள்ள கராத்தே பள்ளியில் தன் சிலையில் வைக்க வேண்டும் என்று உருக்கமாக பேசி இருந்தார். இந்த நிலையில் இன்று சிகிச்சை பலனின்றி அவர் காலமானார். அவருடைய இறுதி சடங்கில் பல பிரபலங்கள் கலந்து கொண்டனர்.

அப்போது டான்ஸ் மாஸ்டர் கலா கண்கலங்கி பேசியிருந்தார். அதில் நான் டான்ஸ் ஸ்கூல் தொடங்கிய போது எனக்கு முதல் மாணவனாக ஹுசேன் வந்து சேர்ந்தான். அப்போது இருந்து இப்ப வரைக்கும் நாங்கள் நல்ல விஷயமாக இருந்தாலும் சரி கெட்ட விஷயமாக இருந்தாலும் சரி எல்லாமே பேசிக் கொள்கிறோம். எனக்கு உறுதுணையாக இருந்தான் அவனுக்கு உடல்நிலை சரியில்லை என்றபோது நான் போன் செய்து உன்னை பார்க்க வரேன்னு சொன்னேன்.

அஞ்சலி செலுத்திய காயத்ரி

அதற்கு வேண்டாம் இன்பெக்சன் வந்துரும் என்று சொல்லிவிட்டார். அதற்குப் பிறகு ஐசியூக்கு அவனைக் கொண்டு போகும்போது நான் கடைசியாக பேசினேன். இப்ப கூட அவனுடைய குரல் என் காதுக்குள் கேட்டுக் கொண்டே இருக்கிறது என்று கலங்கியபடியே பேசி இருக்கிறார். அதுபோல நடிகை காயத்ரி ஹுசைனுக்கு நேரில் அஞ்சலி செலுத்தியிருக்கிறார்.

வின்சென்ட் அசோகன் வருத்தம்

ஹுசைன் மருத்துவமனையில் இருக்கும்போது விரைவில் நலம் பெற வேண்டும் என்று அவரை நேரில் சந்தித்து அவரோடு எடுத்த புகைப்படங்களை காயத்ரி பகிர்ந்து இருந்தார். அதுபோல ஹுசைனுக்கு கடைசி வரைக்கும் உறுதுணையாக இருந்த நடிகர் வின்சென்ட் அசோகன் ஹுசைனின் மறைவு குறித்து கலங்கி பேசியிருந்தார்.

நான் இதுவரைக்கும் பார்த்த மனிதர்களில் ஹுசைன் வித்தியாசமானவர். தன்னுடைய மரணம் வந்துவிட்டது என்று தெரிந்தும் சந்தோஷமாக அதை எதிர்கொண்டார். நாங்கள் கடந்த ஆறு ஏழு வருடங்களாக ஒன்றாக பயணிக்கிறோம். அவருடைய ஆரம்ப காலம் முதல் இப்போ வரைக்கும் பல விஷயங்களை என்னிடம் சொல்லி இருக்கிறார்.

அஞ்சலி செலுத்திய பிரபலங்கள்

எவ்வளவோ கஷ்டங்களை தாண்டி எப்படியாவது வாழ்க்கையில் முன்னுக்கு வரவேண்டும் என்ற துடிப்போடு இருந்தாரு. அதுபோல அவரை சுற்றி இருப்பவர்களும் மேலே வர வேண்டும் என்று நினைப்பாரு. ஆனால் அவருக்கு இந்த நிலை வந்ததை யாராலும் ஏற்றுக்கொள்ள முடியவில்லை. அவருடைய ஆன்மா சாந்தியடைய வேண்டிக் கொள்கிறேன் என்று கண்ணீரோடு பேசியிருந்தார். அதுபோல எஸ் வி சேகர் உட்பட ஒரு சில நடிகர்களும் நேரில் அஞ்சலி செலுத்தியிருக்கிறார்கள்.