சீக்கிரம் போய் விடுவேன் போல! கண் கலங்கிய நடிகர் அபிநய்.. KPY பாலா செய்த மிகப்பெரிய உதவி.. அதுவும் அந்த வார்த்தை சூப்பர்

Updated: Friday, August 1, 2025, 10:52 [IST]

Subscribe to Oneindia Tamil

சென்னை: விஜய் டிவியில் ஒளிபரப்பான பிரபலமான நகைச்சுவை நிகழ்ச்சியான "கலக்கப்போவது யாரு" மூலம் அறிமுகமாகி, ரசிகர்களின் மனதில் இடம்பிடித்தவர் KPY பாலா. தனது நகைச்சுவை உணர்வால் பிரபலமான இவர், தற்போது தனது மனிதாபிமான செயல்களுக்காக அனைவராலும் பாராட்டப்பட்டு வருகிறார். சமீபத்தில் உடல்நலக் குறைவால் பாதிக்கப்பட்டு சிகிச்சை பெற்று வரும் நடிகர் அபிநய் (கிங்கர்) என்பவருக்கு ஒரு லட்சம் ரூபாய் நிதியுதவி செய்து, நேரில் சந்தித்து ஆறுதல் கூறியுள்ளது பெரும் நெகிழ்ச்சியை ஏற்படுத்தியுள்ளது.

நடிகர் அபிநய்க்கு உதவிக்கரம்

நடிகர் அபிநய் கிங்கர், தற்போது கல்லீரல் சிரோசிஸ் நோயால் பாதிக்கப்பட்டு மருத்துவமனையில் சிகிச்சை பெற்று வருகிறார். இந்தச் செய்தி அறிந்ததும், அபிநய்யின் நிலையை உணர்ந்த பாலா உடனடியாக நிதியுதவியுடன் நேரில் சென்று சந்தித்து ஆறுதல் கூறியுள்ளார். இந்தச் சந்திப்பின்போது, மனதளவில் மிகவும் சோர்ந்து போயிருந்த அபிநய், "பாலா... சீக்கிரமா போயிடுவேன்," என்று கண்கலங்கப் பேசியிருக்கிறார்.

இதைக் கேட்ட பாலா, "அப்படி எல்லாம் சொல்லாதீங்க அண்ணா. நாங்க எல்லாம் இருக்கோம். நீங்க சீக்கிரமா உடல்நிலை சரியாகி மீண்டும் சினிமாவில் நடிக்க வேண்டும்," என்று ஆறுதல் கூறியுள்ளார். மேலும், "அப்படி நடிக்கும்போது உங்க படத்தில் எனக்கு ஒரு வாய்ப்பு தருவீங்களா?" என்று பாலா கேட்க, அபிநய் சிரித்து மகிழ்ந்திருக்கிறார். பாலா அபிநய்க்கு ஒரு லட்சம் ரூபாய் வழங்கும் வீடியோ சமூக வலைத்தளங்களில் தற்போது வேகமாகப் பரவி வருகிறது.

நடிகர் அபிநய்

நடிகர் அபிநய், நடிகர் தனுஷ் நடிப்பில் வெளியான 'துள்ளுவதோ இளமை' திரைப்படத்தின் மூலம் சினிமாவில் அறிமுகமாகி பிரபலமானார். அந்தத் திரைப்படத்திற்குப் பிறகு அவருக்கு ஒரு சில திரைப்படங்களில் நடிக்க வாய்ப்பு கிடைத்தது. அதிலும் 'துப்பாக்கி' திரைப்படத்தில் வில்லனுக்கு இவர்தான் குரல் கொடுத்திருந்தார். அந்தத் திரைப்படத்தின் மூலமாக டப்பிங் கலைஞராகவும் பிரபலமானார்.

"தான் நல்ல நிலையில் இருக்கிறோம், நமக்கு பட வாய்ப்புகள் வந்துகொண்டிருக்கிறது" என்று நினைத்துக் கொண்டிருந்த நேரத்தில், ஒரே நேரத்தில் வந்த எட்டு பட வாய்ப்புகளும் இல்லாமல் போனதால் அவர் ரொம்பவும் கஷ்டப்பட்டார். சாப்பிடுவதற்குக்கூட வருமானம் இல்லாமல், அவர் அம்மா உணவகத்தில் சாப்பிட்டு வருவதாக ஒரு பேட்டியில் கூறியிருந்தார்.

அதற்குப் பிறகு சில வருடங்களில் அவருக்கு திடீரென கல்லீரல் பாதிப்பு ஏற்பட்டது. அதற்காக அவர் சிகிச்சை எடுத்து வந்தார். ஆனாலும், அறுவை சிகிச்சை செய்வதற்கு போதிய பணம் இல்லாமல் தவித்து வந்தார். இந்த நிலையில் அவருக்கு பாலா செய்த உதவி இப்போது பலருடைய கவனத்தைப் பெற்று வருகிறது.

KPY பாலா - சமூக சேவை

"கலக்கப்போவது யாரு" நிகழ்ச்சியின் மூலம் பிரபலமான பாலா, பின்னர் விஜய் டிவியின் பல்வேறு நிகழ்ச்சிகளிலும் கலந்துகொண்டு ரசிகர்களின் அன்பைப் பெற்றார். சிறு வேடங்களில் திரைப்படங்களிலும் நடித்துள்ள இவர், சமீப காலங்களில் சமூக சேவைகளில் அதிக ஈடுபாட்டுடன் செயல்பட்டு வருகிறார்.

பாலா, தனது சொந்த முயற்சியால் சம்பாதித்த பணத்தை சமூக நலனுக்காகப் பயன்படுத்தி வருகிறார். ஏற்கனவே பல உதவிகளை செய்துள்ள இவர், அபிநய்க்கு வழங்கிய ஒரு லட்சம் ரூபாய் உதவி, பெரிய நடிகர்கள் கூட உதவ முன்வராத நிலையில், அவருடன் ஒரு திரைப்படத்திலும் நடிக்காத பாலா செய்த உதவி என்பதால், பலராலும் பாராட்டப்பட்டு வருகிறது. "Pls get well soon Abhinay brother" என்று பாலா தனது சமூக வலைத்தளப் பக்கத்தில் பதிவிட்ட பதிவும் வைரலாகி வருகிறது.

அபிநய்யின் உடல்நலப் பிரச்சனை குறித்த செய்தி அறிந்ததும், பாலாவின் மனிதாபிமான செயல் திரையுலகில் உள்ள மற்றவர்களும் இதுபோன்று உதவி செய்ய முன்வர வேண்டும் என்ற எண்ணத்தை ஏற்படுத்தியுள்ளது.