ஓடிடியிலும் ஓட்டி ஓட்டி பார்க்க வேண்டிய படமாகிப்போன LIK! ரிமோட்டுக்கு வேலை வைத்த விக்னேஷ் சிவன்
சென்னை: விக்னேஷ் சிவன் இயக்கத்தில் பிரதீப் ரங்கநாதன், கீர்த்தி ஷெட்டி, எஸ்.ஜே. சூர்யா நடிப்பில் வெளியான 'எல்.ஐ.கே' (லைஃப் இட்ஸ் எ காமிக்/லைக் ஷேர் சப்ஸ்கிரைப்) திரைப்படம் தற்போது அமேசான் பிரைம் ஓடிடி தளத்தில் வெளியாகியுள்ளது. தியேட்டரில் கலவையான விமர்சனங்களைப் பெற்ற இந்தப் படம், ஓடிடியிலும் ரசிகர்களின் பொறுமையைச் சோதிக்கும் விதமாகவே அமைந்துள்ளது.
2040-ம் ஆண்டு சென்னையில், அலைப்பேசி மற்றும் சமூக வலைதளங்களே இல்லாத ஒரு 'பசுமை உலகில்' வசித்து வருகிறார் நாயகன் வைப் வாசே (பிரதீப் ரங்கநாதன்). அவருக்கு நேர்மாறாக, சமூக வலைதளங்களில் லைக்ஸ் மற்றும் ஃபாலோவர்ஸே கதி என்று இருக்கும் தீமாவுடன் (கீர்த்தி ஷெட்டி) காதல் மலர்கிறது. இவர்களது காதலுக்கு வில்லனாக வருவது சூர்யன் (எஸ்.ஜே. சூர்யா) உருவாக்கிய 'எல்.ஐ.கே' எனும் நவீன செயலி. தொழில்நுட்பம் மனித உணர்வுகளை எப்படிச் சிதைக்கிறது என்பதைச் சொல்ல முயன்றிருக்கிறார் இயக்குநர்.
படத்தின் மிகப்பெரிய பலவீனம் அதன் திரைக்கதைதான். ஒரு மல்டி பில்லியனரான எஸ்.ஜே. சூர்யா, தனது பிசினஸ் வேலைகளை எல்லாம் விட்டுவிட்டு, சாதாரண நாயகன் பிரதீப் ரங்கநாதனை மட்டுமே பின்தொடர்ந்து அவருக்குத் தொல்லை கொடுத்து வருவது என்பது துளியும் நம்பும்படியாக இல்லை. ஒரு மிகப்பெரிய டெக் நிறுவனத்தின் அதிபர் இவ்வளவு வேலையில்லாமல் இருப்பாரா என்ற கேள்வி எழுகிறது. இதனால் இரண்டாம் பாதியில் வரும் பல காட்சிகள் யதார்த்தத்திற்கு அப்பாற்பட்டு, பார்ப்பவர்களுக்குச் சலிப்பைத் தருகின்றன.
நடிகர்களின் பங்களிப்பைப் பொறுத்தவரை, பிரதீப் ரங்கநாதன் தனது வழக்கமான பாணியில் துறுதுறுவென நடித்திருக்கிறார். கீர்த்தி ஷெட்டி திரையில் அழகாகத் தெரிந்தாலும், அவருக்கான கதாபாத்திரம் வலுவாக இல்லை. சீமான் மற்றும் எஸ்.ஜே. சூர்யா தங்களுக்குக் கொடுக்கப்பட்ட வேலையைச் சரியாகச் செய்திருந்தாலும், திரைக்கதையில் இருக்கும் ஓட்டைகளால் அவை எடுபடவில்லை. அனிருத்தின் இசையும், ரவிவர்மனின் ஒளிப்பதிவும் மட்டுமே படத்திற்கு ஒரு ப்யூச்சரிஸ்டிக் தோற்றத்தைக் கொடுத்துக் காப்பாற்றுகின்றன.
மொத்தத்தில், 2040-ம் ஆண்டின் தொழில்நுட்ப வளர்ச்சியைச் சொல்ல வந்த இந்தப் படம், முதல் பாதியில் 'ஹேங்' ஆகி இரண்டாம் பாதியில் 'லோடிங்' ஆகாமலேயே முடிகிறது. தியேட்டரிலேயே சோர்வைத் தந்த இந்தப் படத்தை, இப்போது அமேசான் பிரைமில் பார்க்கும்போதும் பல இடங்களில் 'பார்வர்ட்' செய்து ஓட்டி ஓட்டிப் பார்க்க வேண்டிய கட்டாயமே ஏற்படுகிறது. விக்னேஷ் சிவனின் மேக்கிங்கில் ஒரு கலர்ஃபுல் படம் வேண்டும் என்பவர்கள் மட்டும் ஒருமுறை முயற்சி செய்யலாம்.
Click it and Unblock the Notifications
Sign in with Google