Robo Shankar: ரோபோ சங்கரின் கடைசி ஆசை இதுதானே! எங்கிட்ட அப்படி சொல்லிட்டே இருந்தாரு.. மதுரை முத்து உருக்கம்

Updated: Friday, September 19, 2025, 9:10 [IST]

Subscribe to Oneindia Tamil

சென்னை: இயல்பான நகைச்சுவை வெளிப்பாட்டால் மக்களை மகிழ்வித்த நடிகர் ரோபோ சங்கர், தனது 46வது வயதில் காலமானார். அவரது மறைவு, தமிழ் திரையுலகில் பேரதிர்ச்சியை ஏற்படுத்தியுள்ளது. அவரை இழந்து வாடும் அவரது குடும்பத்தினரும், நண்பர்களும், திரையுலகப் பிரபலங்களும் தங்கள் ஆழ்ந்த சோகத்தை வெளிப்படுத்தி வருகின்றனர்.

ரோபோ சங்கர் பயணம்

மதுரையைச் சேர்ந்த சங்கர், விஜய் டிவியின் கலக்கப் போவது யாரு? நிகழ்ச்சி மூலம் ரோபோ சங்கர் என்ற பெயருடன் பிரபலமானார். தனது தனித்துவமான உடல்மொழி, குரல் மாடுலேஷன், மற்றும் துடிப்பான நடனத்தால் மக்களைக் கவர்ந்தார். ஆரம்பத்தில் சிறு சிறு வேடங்களில் நடித்திருந்தாலும், தனுஷின் மாரி திரைப்படம் அவருக்கு ஒரு பெரிய திருப்புமுனையாக அமைந்தது. அதன் பிறகு, விஜய், அஜித் போன்ற பல முன்னணி நடிகர்களின் படங்களில் நடித்து, தவிர்க்க முடியாத நகைச்சுவை நடிகராக உயர்ந்தார்.

ரோபோ சங்கர், உலக நாயகன் கமல் ஹாசனின் தீவிர ரசிகர். கமல்ஹாசன் படங்கள் வெளியானால், குடும்பத்துடன் முதல் காட்சிக்குச் சென்று, கையில் சூடம் ஏற்றி வழிபடும் வழக்கம் அவருக்கு இருந்ததாக அவரது நண்பர் மதுரை முத்து குறிப்பிட்டுள்ளார். கமலுடன் ஒரு படத்திலாவது நடிக்க வேண்டும் என்பது ரோபோ சங்கரின் நீண்ட நாள் ஆசையாக இருந்தது.

மதுரை முத்து உருக்கம்

ரோபோ சங்கருடன் 20 ஆண்டுகளுக்கும் மேலாகப் பயணித்த சக கலைஞரும் நண்பருமான மதுரை முத்து, அவரது மறைவு குறித்து உருக்கமாகப் பேசியுள்ளார். "அவர் பார்க்கத்தான் ஜைஜாண்டிக்; ஆனால் குழந்தைத்தனமாகப் பேசுபவர். பாடி லாங்குவேஜில் அசாத்தியமான திறமையைக் காட்டி நடிப்பவர். அவர் வந்தாலே அந்த இடம் காமெடியால் களைகட்டிவிடும்" என்று தனது நண்பனின் திறமையை நினைவு கூர்ந்தார். வாயாலேயே நான்கு இன்ஸ்ட்ருமென்ட்களின் இசையை உருவாக்கும் அவரது தனித்துவமான திறமையையும் மதுரை முத்து புகழ்ந்துள்ளார்.

சவால்கள் நிறைந்த வாழ்க்கை

ரோபோ சங்கரின் வாழ்க்கை வெற்றிகள் நிறைந்ததாக இருந்தாலும், பல சவால்களையும் கண்டது. கடந்த ஆண்டு அவர் மஞ்சள் காமாலையால் பாதிக்கப்பட்டு, உடல் மெலிந்து காணப்பட்டார். அந்த நோயிலிருந்து மீண்டு வந்த அவர், தனது மனைவி மற்றும் குடும்பத்தினர்தான் தன்னைக் காப்பாற்றியதாகப் பல பேட்டிகளில் நெகிழ்ந்து பேசியிருந்தார்.

மஞ்சள் காமாலை பொதுவாகக் கல்லீரலைத் தாக்கும் ஒரு நோய். மதுப்பழக்கம் உள்ளவர்களுக்கு இந்த நோய் ஏற்படும்போது கல்லீரல் மேலும் பாதிக்கப்பட்டு, செயலிழக்க நேரிடும். ரோபோ சங்கருக்கு மதுப்பழக்கம் இருந்ததால்தான், அவர் இந்த நிலைக்கு மீண்டும் ஆளானாரா என்ற கேள்வியும் எழுந்துள்ளது. அவரது உடல் உறுப்புகள் ஒவ்வொன்றாகச் செயலிழந்து, கோமா நிலைக்குச் சென்று, இறுதியில் உயிரிழந்ததாகத் தகவல்கள் தெரிவிக்கின்றன.

அஞ்சலி செலுத்திய பிரபலங்கள்

ரோபோ சங்கரின் மறைவுக்கு, கமல்ஹாசன், பார்த்திபன், தாடி பாலாஜி உள்ளிட்ட திரையுலகப் பிரபலங்கள் பலர் தங்களது ஆழ்ந்த இரங்கல்களைத் தெரிவித்து வருகின்றனர். ஒரு குடும்பத்தின் பக்கபலமாக இருந்த ரோபோ சங்கரின் இழப்பு, அவரது குடும்பத்தினரை மீளாத் துயரத்தில் ஆழ்த்தியுள்ளது. சிரிப்பை மட்டுமே வெளிப்படுத்திய ஒரு கலைஞனின் வாழ்க்கையின் இறுதி அத்தியாயம், பலரது கண்களிலும் கண்ணீரை வரவழைப்பதாக அமைந்துவிட்டது.