சோசியல் மீடியாவை கலக்கும் இந்த குட்டி பாடகி யார் தெரியுமா? வியந்து போன நடிகை பாக்கியஸ்ரீ! குவியும் வாழ்த்து

சென்னை: சமூக வலைதளங்களில் சில நேரங்களில் பழைய வீடியோக்கள் திடீரென்று மீண்டும் பரவி அனைவரின் கவனத்தையும் ஈர்க்கும். அப்படித்தான் இப்போது ஒரு குட்டிப் பாடகியின் பாடல் வீடியோக்கள் மீண்டும் அதிகமாக பகிரப்பட்டு பேசப்பட ஆரம்பித்திருக்கிறது. 2024ஆம் ஆண்டு ஒளிபரப்பான Superstar Singer Season 3 என்ற குழந்தைகள் இசைப் போட்டி நிகழ்ச்சியில் கலந்து கொண்ட சிறுமி தேவனஸ்ரியா பாடிய பாடல்கள்தான் தற்போது சமூக வலைதளங்களில் வேகமாக பரவி வருகிறது.

பெங்களூர் பொண்ணு

பெங்களூரைச் சேர்ந்த தேவனஸ்ரியா அந்த நிகழ்ச்சியில் கலந்து கொண்டு தனது குரலால் பலரையும் கவர்ந்திருந்தார். இறுதி சுற்றில் அவர் இரண்டாம் இடத்தைப் பெற்றார். அந்த நிகழ்ச்சியை பார்த்தவர்களுக்கு அப்போது இந்த சிறுமியின் குரல் நினைவில் இருந்தாலும், இப்போது தான் அவரது பாடல்கள் மீண்டும் அதிகமாக பகிரப்பட்டு அனைவரின் கவனத்தையும் ஈர்த்திருக்கிறது.

அவர் பாடிய இரண்டு பாடல்கள் தான் தற்போது அதிகமாக பேசப்படுகிறது. ஒன்று தேரே மேரே பீச்சு மே (Tere Mere Beech Mein) என்ற பாடல். இந்த பாடல் Ek Duuje Ke Liye திரைப்படத்தில் இடம்பெற்ற மிகவும் பிரபலமான பாடல். மற்றொன்று 'தில் திவானா' (Dil Deewana) என்ற பாடல். இந்த பாடல் 'மைனே பியார் கியா' Maine Pyar Kiya படத்தில் இடம்பெற்ற இனிமையான மெலடி பாடல்.

இந்த இரண்டு பாடல்களையும் தேவனஸ்ரியா பாடிய விதம் பலருக்கும் மெய்சிலிர்க்கும் தருணமாக இருந்ததாக ரசிகர்கள் கூறி வருகின்றனர். குறிப்பாக "தில் திவானா" பாடலை அவர் பாடிய நிகழ்ச்சியின் காட்சி தான் தற்போது அதிகமாக பகிரப்பட்டு வருகிறது.

அந்த நாளில் அந்த நிகழ்ச்சிக்கு சிறப்பு விருந்தினராக வந்திருந்தவர் Bhagyashree. இவர் தான் Maine Pyar Kiya படத்தின் நாயகி. தன்னுடைய படத்தில் இடம்பெற்ற பாடலை ஒரு சிறிய குழந்தை இவ்வளவு உணர்ச்சியுடன் பாடுவதை பார்த்த போது பாக்யஶ்ரீ மிகவும் ரசித்தார். அவர் முகத்தில் தெரிந்த மகிழ்ச்சியும் ஆச்சரியமும் அந்த வீடியோவில் தெளிவாக தெரிகிறது. அதை பார்த்த பலரும் "அந்த தருணமே ஒரு அழகான காட்சி போல இருந்தது" என்று கூறி வருகின்றனர்.

ஆனால் இந்த சிறுமியை பற்றி சில விமர்சனங்களும் அப்போது எழுந்திருந்தது. "இந்த குழந்தையின் இந்தி உச்சரிப்பு முழுமையாக சரியாக இல்லை" என்று சிலர் கருத்து தெரிவித்தனர். ஆனாலும் அந்த விமர்சனங்களை எல்லாம் தாண்டி தேவனஸ்ரியா தனது குரலால் அனைவரையும் கவர்ந்து அந்த போட்டியில் இரண்டாம் இடத்தைப் பெற்றது குறிப்பிடத்தக்கது.

Superstar Singer Season 3 என்பது இந்தியா முழுவதும் இருந்து சிறுவர்கள் கலந்து கொண்டு பாடும் மிகவும் பிரபலமான இசைப் போட்டி நிகழ்ச்சிகளில் ஒன்றாகும். இந்த நிகழ்ச்சியில் பல சிறுவர்கள் தங்கள் குரல் திறமையை வெளிப்படுத்தும் வாய்ப்பு பெறுகிறார்கள். அந்த மேடையில் தான் தேவனஸ்ரியா தனது பாடல் திறமையை வெளிப்படுத்தி பலரின் கவனத்தை பெற்றார்.

நிகழ்ச்சி முடிந்த பிறகும் அவர் இசையை தொடர்ந்து கற்று வருகிறார் என்று கூறப்படுகிறது. சில சமயங்களில் தனது பாடல் காணொளிகளையும் சமூக வலைதளங்களில் பகிர்ந்து வருகிறார். தற்போது அவரது பழைய நிகழ்ச்சி காட்சிகள் மீண்டும் அதிகமாக பகிரப்பட்டு வருவதால், இந்த குட்டிப் பாடகி குறித்து பலரும் தேடி அறிந்து கொள்ள ஆரம்பித்துள்ளனர்.

மொத்தத்தில் பார்த்தால் இரண்டு ஆண்டுகளுக்கு முன்பு ஒரு இசைப் போட்டி நிகழ்ச்சியில் பாடிய பாடல்கள் தான் இப்போது மீண்டும் சமூக வலைதளங்களில் பரவி, தேவனஸ்ரியாவை மீண்டும் அனைவரின் கவனத்திற்கும் கொண்டு வந்திருக்கிறது. அவரது குரலை கேட்டு பலரும் பாராட்டி வருவது குறிப்பிடத்தக்கது.