“அவரை நான் பார்க்கவே மாட்டேன்..” – திருமணம் பற்றி 54-வது பிறந்தநாளில் மனம் திறந்த நடிகை தபு

Updated: Wednesday, February 4, 2026, 8:15 [IST]

Subscribe to Oneindia Tamil

சென்னை: தமிழில் 'கண்டுகொண்டேன் கண்டுகொண்டேன்', 'காதல் தேசம்' போன்ற படங்களில் நடித்து தமிழ் ரசிகர்களின் கவனத்தை ஈர்த்த பிரபல பாலிவுட் நடிகை தபு இன்று 54-வது பிறந்தநாளை கொண்டாடி வருகிறார். நான்கு தசாப்தங்களாக இந்திய சினிமாவில் தொடர்ச்சியாக நடித்துக் கொண்டிருக்கும் மிகச்சில நடிகைகளில் தபுவும் ஒருவர். வித்தியாசமான கதாபாத்திரங்கள், இயல்பான நடிப்பு, கவர்ச்சியை விட குணாதிசயத்துக்கே முக்கியத்துவம் கொடுக்கும் தேர்வுகள் தான் தபுவின் தனிச்சிறப்பு.

தபுவின் பேச்சு

சமீபத்தில் நிருபர்களிடம் பேசிய தபு, தன் குடும்ப வாழ்க்கை குறித்து மனம் திறந்து பேசியுள்ளார். "எனக்கு மூன்று வயதாக இருந்தபோது என் பெற்றோர் விவாகரத்து செய்துவிட்டனர். அதன் பிறகு என் தந்தையுடன் எனக்கு எந்தவித தொடர்பும் இல்லை. அவரை நான் ஒருபோதும் சந்தித்ததில்லை. அவருடைய பெயரை என் பெயருக்குப் பின்னால் பயன்படுத்துவதும் கிடையாது," என்று கூறியுள்ளார்.

தபுவின் தந்தையின் பெயர் ஹஸ்மி. ஆனால் அவர் தனது முழுப்பெயராக "தபசும் பாத்திமா" என்ற பெயரையே பயன்படுத்தி வருகிறார். பள்ளிக்கூட காலத்தில் கூட அவரது சர்நேம் "பாத்திமா" ஆகத்தான் இருந்ததாகவும் அவர் தெரிவித்துள்ளார். "என் பெற்றோர் பிரிந்த பிறகு, நான் என் அம்மாவின் அம்மா வீட்டில் வளர்ந்தேன்.

என் அம்மா ஓர் ஆசிரியை. பாட்டி புத்தகம் படிப்பது, பிரார்த்தனை செய்வது போன்ற ஒரு அமைதியான சூழலில் நான் வளர்ந்தேன். அதனால், என் தந்தையை சந்திக்க வேண்டும் என்ற எண்ணமே எனக்கு வரவில்லை. அவர் பெயரை பயன்படுத்த வேண்டிய அவசியம் இல்லை என்று நினைத்தேன்," என்று தபு கூறியது பலரையும் நெகிழ வைத்துள்ளது.

அவரது சகோதரி மட்டும் ஒருமுறை தந்தையை சந்தித்ததாகவும், ஆனால் தன்னோடு எந்த நினைவுகளும் இல்லை என்பதால் அந்த சந்திப்பை விரும்பவில்லை என்றும் தபு வெளிப்படையாக தெரிவித்துள்ளார்.

திருமணம் குறித்து தபு எடுத்த முடிவு

திருமணம் செய்யாமல் வாழ்வது குறித்து கேட்கப்பட்டபோது, தபு மிக இயல்பாக பதிலளித்துள்ளார். "நான் திருமணம் செய்திருக்கிறேனா இல்லையா என்பது எனக்கு பெரிய விஷயமாக தெரியவில்லை. நான் தனியாக மகிழ்ச்சியாக இருக்கிறேனா என்பதே முக்கியம். வாழ்க்கையில் ஒவ்வொருவருக்கும் சந்தோஷம் கிடைக்கும் வழி வேறுபடும், என்று அவர் கூறினார்.

பல மொழிகளில் சாதனை

தபு பாலிவுட்டில் மட்டுமல்ல, தென்னிந்திய சினிமாவிலும் தனித்த அடையாளம் பதித்த நடிகை. தமிழில் காதல் தேசம், கண்டுகொண்டேன் கண்டுகொண்டேன், இருவர் போன்ற படங்கள் மூலம் தமிழ் ரசிகர்களிடம் இடம்பிடித்தார். குறிப்பாக கண்டுகொண்டேன் கண்டுகொண்டேன் படத்தில் ஐஸ்வர்யா ராய், மம்மூட்டி, அஜித் ஆகியோருடன் நடித்த அவரது கேரக்டர் இன்றளவும் பேசப்படுகிறது.

ஹிந்தியில், மாசூம், ஹேரா பேரி, சண்டாளி, ஹைதர், அந்தாதூன், டிரிஷ்யம், பஜ்ரங்கி பைஜான் போன்ற பல்வேறு வகை படங்களில் நடித்துத் தன்னை ஒரு "பெர்ஃபார்மன்ஸ் ஓரியண்டட்" நடிகையாக ரசிகர்கள் மனதில் நிலை நிறுத்திக் கொண்டிருக்கிறார். வணிக ரீதியான ஹிட் படங்களிலும், கலைரீதியான படங்களிலும் ஒரே அளவு திறமையுடன் நடித்தது தபுவின் பெரிய பலம்.

விருதுகள், கௌரவங்கள்

தபு தனது நடிப்பிற்காக பல தேசிய விருதுகள், பிலிம் ஃபேர் விருதுகள் உள்ளிட்ட பல கௌரவங்களை பெற்றுள்ளார். ஒரு காலகட்டத்தில் முன்னணி நாயகியாக இருந்தவர், வயது கூடினாலும் "அம்மா", "ஆண்ட்டி" என்ற வகைப்பட்ட பாத்திரங்களில் சிக்காமல், கதைக்கு முக்கியமான வலுவான பெண்கதாபாத்திரங்களைத் தேர்வு செய்து நடிப்பதன் மூலம் இன்னும் திரையில் தன்னை நிலைநிறுத்தி வருகிறார்.