முதல் நாளே பாக்ஸ் ஆபிஸை அதிர வைத்த ‘தாய் கிழவி’… அதுவும் இத்தனை கோடி வசூல்! ராதிகாவின் கம்பேக்

சென்னை: சிவகார்த்திகேயன் தயாரிப்பில், ராதிகா சரத்குமார் கதையின் நாயகியாக நடித்துள்ள 'தாய் கிழவி' திரைப்படம் (Thaai Kizhavi Day 1 Box Office) திரையரங்குகளில் வெளியாகி நல்ல வரவேற்பை பெற்று வருகிறது. புதுமுக இயக்குநர் சிவகுமார் முருகேசன் இயக்கியுள்ள இந்தப் படம், உள்ளடக்கத்துக்கே முக்கியத்துவம் கொடுத்து உருவாகியுள்ளதால் ஆரம்பத்திலிருந்தே எதிர்பார்ப்பு இருந்தது. இவர் முன்னதாக மணிகண்டன் இயக்கிய 'கடைசி விவசாயி' படத்தில் உதவி இயக்குநராக பணியாற்றியவர் என்பதும் குறிப்பிடத்தக்கது.

சிவகார்த்திகேயன் தயாரிப்பு

சிவகார்த்திகேயன் தனது எஸ்.கே. ப்ரோடக்‌ஷன்ஸ் நிறுவனம் மூலம் இப்படத்தை தயாரித்திருப்பது படத்திற்கு பெரிய பிளஸாக அமைந்தது. ராதிகாவுடன் முனீஸ்காந்த், சிங்கம்புலி, பால சரவணன், அருள்தாஸ் உள்ளிட்ட பலரும் நடித்துள்ளதால், கேரக்டர் ஆர்டிஸ்ட் கூட்டணியுடன் ஒரு வலுவான கதையை படம் சொல்லும் என்ற நம்பிக்கை ரசிகர்களிடம் இருந்தது.

டீசர் வெளியிட்ட சிவகார்த்திகேயன்

படம் ரிலீஸ்க்கு முன்பே நல்ல ஹைப் உருவானது. அதற்கு முக்கிய காரணம் சிவகார்த்திகேயன் தான். இந்த இயக்குநருடன் தனது அடுத்த படத்தையும் தொடங்கியதோடு அதன் டீசரையும் வெளியிட்டது ரசிகர்களின் கவனத்தை ஈர்த்தது. அதன்பிறகு வெளியான டீசர், டிரெய்லர் இரண்டும் சமூக வலைதளங்களில் வைரலாகி, படம் மீது எதிர்பார்ப்பை மேலும் அதிகரித்தது. பிரிமியர் ஷோ பார்த்த சினிமா பிரபலங்களும் படத்தை பாராட்டியதால், பாசிடிவ் டாக் உருவானது.

தாய் கிழவி படம் முதல் நாள் வசூல்

பிப்ரவரி 27ஆம் தேதி உலகம் முழுவதும் வெளியான இந்த படம், முதல் ஷோவிலிருந்தே நல்ல ரெஸ்பான்ஸ் பெற்றதாக திரையரங்கு வட்டாரங்களில் கூறப்படுகிறது. குறிப்பாக ராதிகா சரத்குமார் நடிப்பு படம் முழுவதையும் தாங்கி நிற்கிறது என்ற கருத்து ரசிகர்களிடையே அதிகம் பேசப்படுகிறது. குடும்ப ரசிகர்கள் அதிகமாக வர தொடங்கியிருப்பதும் வசூலுக்கு உதவியாகியுள்ளது.

இந்நிலையில், 'தாய் கிழவி' திரைப்படத்தின் முதல் நாள் பாக்ஸ் ஆபிஸ் வசூல் பற்றிய தகவலும் வெளியாகியுள்ளது. அதன்படி, படம் முதல் நாளிலேயே சுமார் 2.5 கோடி ரூபாய் வரை வசூல் செய்துள்ளதாக திரையுலக வட்டாரங்கள் தெரிவிக்கின்றன. முன்னணி ஹீரோ இல்லாத ஒரு பெண்மணி மையப்படத்திற்கு இத்தகைய ஓப்பனிங் கிடைத்திருப்பது ஆச்சர்யமாக பார்க்கப்படுகிறது.

தற்போது பெரிய படங்கள் போட்டியாக இல்லாததும், வார இறுதி விடுமுறை தொடங்கியிருப்பதும் இப்படத்திற்கு சாதகமான சூழலை உருவாக்கியுள்ளது. படத்திற்கு பாராட்டுதல் தொடர்ந்து கிடைத்தால், வரும் நாட்களில் வசூல் மேலும் உயரும் என எதிர்பார்க்கப்படுகிறது.

மொத்தத்தில் பார்க்கும்போது, வலுவான கதையும் அனுபவம் மிக்க நடிகையின் நடிப்பும் இருந்தால் ரசிகர்கள் திரையரங்குக்கு வர தயாராக உள்ளார்கள் என்பதை 'தாய் கிழவி' படம் மீண்டும் நிரூபித்து வருகிறது. இந்த படம் ராதிகா சரத்குமாருக்கு ஒரு முக்கியமான கம்பேக் படமாக அமையும் என்பதும் தற்போது திரையுலகில் பேசப்படும் முக்கியமான தகவலாக உள்ளது.