Vaa Vaathiyaar 2nd day box office: பொங்கல் போட்டியில் முந்திய ‘வா வாத்தியார்’.. அதுவும் 2வது நாள் இத்தனை கோடி வசூல்!

சென்னை: பொங்கல் என்றாலே தமிழ் சினிமாவுக்கு அது ஒரு பெரிய திருவிழா. இந்த ஆண்டு பொங்கல் களத்தில் பெரிய நட்சத்திர படங்கள் இல்லாத சூழலில், கார்த்தி - நலன் குமாரசாமி கூட்டணியில் உருவான 'வா வாத்தியார்' படம், மெதுவாக ஆனால் உறுதியாக தனது இடத்தை பிடித்து வருகிறது.

ஸ்டூடியோ க்ரீன் தயாரிப்பில், சந்தோஷ் நாராயணன் இசையில் உருவான இந்த படம், கடந்த ஆண்டு ரிலீஸ் ஆக வேண்டியது. ஆனால் சில சட்ட சிக்கல்கள், நீதிமன்ற உத்தரவுகள் என பல தடைகளை தாண்டி, ஜனவரி 14-ஆம் தேதி தான் திரையரங்குகளை அடைந்தது. "தாமதமானாலும் தரமானது" என்ற சொல்லுக்கு சான்றாகவே இந்த ரிலீஸ் அமைந்துள்ளது.

எம்.ஜி.ஆர் vs நம்பியார்

'வா வாத்தியார்' படத்தின் கதை கேட்கும்போதே நலன் குமாரசாமி ஸ்டைல் டார்க் காமெடியின் நறுமணம் தெரிகிறது.

தீவிரமான எம்.ஜி.ஆர் ரசிகர் ஒருவர், தனது பேரனை "எம்.ஜி.ஆர் திரையில் சொன்ன ஒவ்வொரு நல்ல கருத்தையும் வாழ்க்கையில் கடைப்பிடிக்க வேண்டும்" என்று வளர்க்கிறார். ஆனால் பேரனுக்கோ, இந்த ஓவர்டோஸ் எம்.ஜி.ஆர் போதனை ஒரு கட்டத்தில் வெறுப்பாக மாறுகிறது.

இதன் விளைவாக, எம்.ஜி.ஆரை வெறுக்கும் பேரன், நம்பியாரை தனது ஹீரோவாக பார்க்க ஆரம்பிக்கிறார். வில்லன் போல யோசித்து, வில்லாதி வில்லனாக செயல்பட வேண்டும் என்ற எண்ணம் அவருக்குள் உருவாகிறது. அதுவும் அவர் ஒரு காவல்துறை அதிகாரியாக இருக்கும்போதே.

ஒரு போலீஸ் அதிகாரி, நம்பியார் போல சிந்தித்தால் என்ன ஆகும்? அது தாத்தாவுக்கு தெரிய வந்த பிறகு என்ன நடக்கிறது என்பதே படத்தின் மையம்.

நலன் குமாரசாமி என்றாலே டார்க் காமெடி

நலன் குமாரசாமி படம் என்றாலே ரசிகர்களுக்கு ஒரு குறிப்பிட்ட எதிர்பார்ப்பு இருக்கும். கூர்மையான வசனங்கள், அப்சர்ட் காமெடி, சீரியஸ் விஷயங்களை லைட்டாக சொல்லும் நடை.

'வா வாத்தியார்' படத்திலும் அந்த டிஎன்ஏ முழுமையாக இல்லை என்றாலும், நலன் ரசிகர்களுக்கு "இது நம்ம ஆளு படம் தான்" என்ற உணர்வை கொடுக்கிறது.

பொங்கல் பண்டிகையை முன்னிட்டு வெளியான மற்ற படங்கள் கலவையான விமர்சனங்களை சந்தித்த நிலையில், 'வா வாத்தியார்' பாசிட்டிவ் ரிவ்யூ மூலம் மெதுவாக வேகம் பிடித்து வருகிறது.

முதல் நாளில் ஓரளவு மட்டுமே வசூல் செய்த படம், இரண்டாவது நாளில் முதல் நாளை விட அதிக வசூலை பதிவு செய்துள்ளது.

இரண்டாம் நாள் வசூல் (இந்தியா): சுமார் ரூ. 2.25 கோடி. இதுவரை மொத்த வசூல்: சுமார் ரூ. 3.90 கோடி. இந்த தகவலை சாக்நிக் வலைதளம் வெளியிட்டுள்ளது. இந்த எண்ணிக்கைகள் படக்குழுவுக்கு நம்பிக்கையை அளித்துள்ளன.

மசாலா ரசிகர்களுக்கான படம் இது அல்ல. ஆனால் நலன் குமாரசாமி டார்க் காமெடி படங்களை ரசிக்கும் ரசிகர்களுக்கு இது ஏமாற்றமளிக்காது. பொங்கல் விடுமுறையில் காமெடி விரும்புவோருக்கு 'வா வாத்தியார்' ஒரு தேர்வாக அமைகிறது.

பெரிய ஓபனிங் இல்லாமல், மெதுவாக வசூலை கூட்டி வரும் இந்த படம், பொங்கல் விடுமுறை முடியும் வரை ஓரளவுக்கு நல்ல வசூல் செய்யும் என்ற நம்பிக்கையில் படக்குழு உள்ளது.

English summary

Vaa Vaathiyaar box office collection: Pongal is traditionally a major festive season for Tamil cinema, and in the absence of big-star releases this year, Vaa Vaathiyaar, starring Karthi and directed by Nalan Kumarasamy, is slowly but steadily carving out its space. Produced by Studio Green with music by Santhosh Narayanan, the film finally hit theatres on January 14 after facing several legal hurdles and court-related delays. Staying true to Nalan Kumarasamy’s signature dark comedy style, the story revolves around an intense MGR fan who raises his grandson with rigid ideals, only for the latter to rebel and idolize legendary villain Nambiar instead—while serving as a police officer. This unusual clash of ideologies forms the core conflict. Though the film did not register a massive opening, positive word of mouth has helped it pick up pace. Reports suggest that the film collected around ₹2.25 crore on its second day in India, taking its total collection to approximately ₹3.90 crore so far. While not a typical mass masala entertainer, Vaa Vaathiyaar appeals to fans of offbeat, dark humour and is expected to maintain steady earnings through the Pongal holidays.