Friends movie re-release: மீண்டும் தூசி தட்டிய 'பிரண்ட்ஸ்'! ரீ ரிலீஸ் தேதி அறிவிப்பு! 50 கோடியை தொடுமா?

Updated: Tuesday, October 21, 2025, 18:57 [IST]

Subscribe to Oneindia Tamil

சென்னை: தமிழ் திரையுலகில் இப்போது 'ரீ-ரிலீஸ்' அலைதான் வீசுகிறது! அப்போது வெளியான சூப்பர் ஹிட் படங்களை எல்லாம் மீண்டும் தூசி தட்டி, தியேட்டருக்குக் கொண்டு வரும் இந்த முயற்சிக்கு மக்களும் அமோக வரவேற்பு கொடுக்கிறார்கள். அந்த வரிசையில், இப்போது தளபதி விஜய்யும், சூர்யாவும், காமெடி கிங் வடிவேலுவும் இணைந்து நடித்த 'பிரண்ட்ஸ்' திரைப்படம், மீண்டும் நவம்பர் 21 ஆம் தேதி திரைக்கு வர இருக்கிறது.

ரீ-ரிலீஸில் மிரட்டும் பாக்ஸ் ஆபிஸ்

ரீ-ரிலீஸ் படங்கள் இப்போது வசூலிலும் மிரட்டிக்கொண்டிருக்கின்றன. விஜய் நடிப்பில் ரீ-ரிலீஸான 'கில்லி' திரைப்படம் கிட்டத்தட்ட 50 கோடி ரூபாய் வரை வசூல்செய்ததாகக் கூறப்படுகிறது. அதேபோல, சமீபத்தில் வெளியான விஜயகாந்த் நடித்த 'கேப்டன் பிரபாகரன்' திரைப்படமும் கிட்டத்தட்ட 35 கோடி ரூபாய் வரை வசூல் செய்தது.

இப்படி, பழைய படங்கள் பாக்ஸ் ஆபிஸிலும் நல்ல லாபம் கொடுப்பதால், இனி வரும் காலங்களில் பல படங்கள் ரீ-ரிலீஸ் ஆவதற்காக வரிசை கட்டிக் கொண்டிருக்கின்றன.

பிரண்ட்ஸ்: நட்பின் காவியம்

தளபதி விஜய், சூர்யா, வடிவேலு, தேவயாணி, ரமேஷ் கண்ணா ஆகியோர் இணைந்து நடித்த படம் தான் 'பிரண்ட்ஸ்'. மலையாள இயக்குநர் சித்திக் இயக்கத்தில் 2001 ஆம் ஆண்டு வெளியான இந்தப் படம், மிகப்பெரிய ஹிட் அடித்தது. இந்த படத்தின் வெற்றிக்கு, நட்பின் ஆழமான கதைக்களமும், அதிரடியான நகைச்சுவையும் தான் முக்கியக் காரணம்.

நிலைத்து நிற்கும் காட்சிகள்

'பிரண்ட்ஸ்' திரைப்படத்தின் கதை, மூன்று நண்பர்களின் ஆழமான பாசம், காதல் மற்றும் குடும்பப் பிணைப்புகளை மையமாகக் கொண்டது. ஆனால், இந்தப் படம் இன்றுவரை மக்கள் மத்தியில் நிலைத்து நிற்பதற்குக் காரணம், வேறு யாரும் அல்ல - அது வடிவேலுவின் நகைச்சுவை.

வடிவேலுவின் காமெடிதான் இந்தப் படத்தின் வெற்றிக்குப் பெரிய பங்கினை ஆற்றியது. குறிப்பாக, அவர் பெயிண்டிங் கான்ட்ராக்டராக வரும் 'நேசமணி' கதாபாத்திரம், பெயிண்ட் டப்பாவிற்க்குள் விழுவது, மரத்தில் மாட்டிக் கொள்வது, நேசமணி தலையில் சுத்தியல் விழுவது என இந்தக் காட்சிகள்தான் இன்றைக்கும் மீம்ஸ்கள் மூலமாகவும், சமூக வலைதளங்களிலும் கொண்டாடப்படுகின்றன. இந்த நகைச்சுவைக் காட்சிகள், எத்தனை வருடங்கள் ஆனாலும் சிரிக்க வைக்கும் ஆற்றல் கொண்டவை.

இத்தனை வருடங்கள் கழித்து இந்தப் படம் மீண்டும் கொண்டாடப்படுவதற்கு முக்கியக் காரணம், விஜய், சூர்யா, வடிவேலு ஆகியோரின் கலகலப்பான கூட்டணியும், தலைமுறை தாண்டி நிற்கும் அதன் காமெடி காட்சிகளும்தான். புதிய தலைமுறையினர் இந்தப் படத்தினை எப்படி ரசிப்பார்கள் என்பதைப் பொறுத்திருந்து பார்ப்போம். பழைய சாதனையை முறியடித்து, 'பிரண்ட்ஸ்' திரைப்படம் பாக்ஸ் ஆபிஸில் சாதனை படைக்குமா என்ற எதிர்பார்ப்பு எழுந்துள்ளது.