விஜயகாந்த் காலத்தில் நல்லாதானே இருந்தது! நடிகர் சங்க கட்டடம் எப்போது திறக்கப்படும்?
தென்னிந்திய நடிகர் சங்கம் இன்று ஒரு அபாயகரமான நிலையிலுள்ளது. அது செயலில் இருக்கிறதா, இல்லையா என்ற கேள்வியே அதிகமாக எழுகிறது. கடந்த காலங்களில் கேப்டன் விஜயகாந்த், ராதாரவி, சரத்குமார் ஆகியோரின் தலைமையில் இந்த சங்கம் மிகுந்த செயல்பாட்டுடன் மக்கள் பார்வையில் இருந்தது. அங்கு நடைபெறும் நிகழ்வுகள் பேசப்பட்டன, முக்கியமான தீர்மானங்கள் எடுக்கப்பட்டன.
ஆனால், நடிகர் சங்கத்தில் அரசியல் நுழைந்ததிலிருந்து, சங்கம் தனது ஒற்றுமையை இழந்தது. அங்கிருந்து அணிகள் பிரிந்து செயல்பட தொடங்கியதை போல் ஒரு தோற்றம் நிலவுகிறது. விஷால், கார்த்தி போன்றவர்களின் வருகையால் சில முன்னேற்றம் கண்டபோதும், அவர்கள் கொடுத்த வாக்குறுதிகள் வெறும் காகித கப்பல்களாகவே இருந்து போயுள்ளன.
நடிகர் சங்க கட்டிடம், தேர்தல் பிரச்சினைகள், நிர்வாக குழு மாற்றங்கள் போன்றவை தொடர்ந்து சங்கத்தின் செயல்பாட்டை பின்னுக்கு இழுத்துள்ளன. இன்று, சங்கம் முறையாக செயல்படுகிறதா? என்ற கேள்வி எழுகிறது.
கட்டிடம் - இன்னும் ஏன் திறக்கப்படவில்லை?: தென்னிந்திய நடிகர் சங்கத்தின் புதிய கட்டிடத் திட்டம் பல்வேறு காரணங்களால் இன்னும் நிறைவேறவில்லை. 2017ஆம் ஆண்டு ரூ.26 கோடி செலவில் இந்த கட்டிடத்தைக் கட்ட திட்டமிடப்பட்டது. இதில் திரையுலகத்தின் முன்னணி நடிகர்களும், சங்க நிர்வாகத்தினரும் பெரும் உற்சாகத்துடன் ஈடுபட்டனர்.
ஆனால், நடிகர் சங்கத் தேர்தல் தொடர்பான வழக்குகள், நிர்வாகப் பிரச்சினைகள், சட்ட சிக்கல்கள் மற்றும் கொரோனா போன்ற காரணிகளால் கட்டிடப் பணிகள் நிறைவேறாமல் தாமதமடைந்தன.
வேலைகள் பாதியிலேயே நிறுத்தம்: 2017 முதல் தொடங்கிய பணிகள், ஆரம்ப கட்டத்தில் வெகு வேகமாக நடைபெற்றன. ஆனால் நிர்வாக குழுவினருக்கு இடையே ஏற்பட்ட பிரச்சினைகள் காரணமாக பணிகள் தொடர்ந்து முன்னேறவில்லை. மேலும், நடிகர் சங்க தேர்தலில் ஏற்பட்ட உரிமைச் சிக்கல்கள் மற்றும் நீதிமன்ற வழக்குகள் கட்டடப் பணிகளை மேலும் தள்ளிப் போட்டன. இதன் விளைவாக, 60% பணிகள் முடிவடைந்த நிலையில், பணிகள் முழுமையாக நிறுத்தப்பட்டன.
நடிகர்களின் நிதி ஆதரவு: கட்டிடப் பணிகளை மீண்டும் தொடங்குவதற்காக நிதி தேவைப்படும் நிலை ஏற்பட்டது. இந்த சூழலில், நடிகர்கள் ரஜினிகாந்த், கமல்ஹாசன், விஜய், இன்னும் பலர் நிதி வழங்கினர். இந்த நிதி உதவியால், 2024 ஏப்ரல் மாதம் கட்டிடப் பணிகள் மீண்டும் தொடங்கப்பட்டன.
விஷாலின் நேரத்திற்கு ஒரு பேச்சு: இந்நிலையில், பல வருடங்களுக்கு முன்பு விஷால், "நான் கார்த்தியுடன் இணைந்து நடித்து அப்படத்திலிருந்து கிடைக்கும் லாபத்தை நடிகர் சங்க கட்டிடத்திற்காக செலவிடுவேன்" என அறிவித்திருந்தார். ஆனால், இன்று வரை இதற்காக எந்த ஒரு செயலும் எடுக்கப்படவில்லை என்பது ஒரு பெரிய கேள்விக்குறியாக உள்ளது. விஷால் கூறிய நிலைப்பாடு வெறும் வாக்குறுதியாகவே முடிந்துவிட்டதா? என்ற கேள்விகள் எழுகின்றன.
நிர்வாக கால நீட்டிப்பு: நடிகர் சங்கத்தின் நிர்வாகிகளின் பதவிக்காலம் 2025 பிப்ரவரியுடன் முடிவடைய உள்ள நிலையில், அதை மேலும் 3 ஆண்டுகள் நீட்டிக்க பொதுக்குழு கூட்டத்தில் தீர்மானம் நிறைவேற்றப்பட்டது. இதற்கும் கட்டிடப் பணிகளுக்கும் தொடர்பு உள்ளதா? நிர்வாக மாற்றம் ஏற்படலாம் என்பதால் பணிகள் இப்போது விரைவாக நடைபெறுகின்றனவா? என்ற சந்தேகங்கள் எழுகின்றன.
கட்டிட திறப்பு - எப்போது?: தற்போது, வழக்குகள் முடிந்து, நாசர் தலைமையிலான நிர்வாகம் பணிகளை மீண்டும் தொடங்கியுள்ளது. தற்போது பணிகள் மீண்டும் தீவிரமாக நடைபெற்று வருகின்றன. இந்த ஆண்டு இறுதிக்குள் கட்டிடம் திறக்கப்படும் என எதிர்பார்க்கப்படுகிறது.
எல்லாவற்றையும் பொறுத்து பார்க்கும்போது, தென்னிந்திய நடிகர் சங்க கட்டிட திட்டம் மிகுந்த சிக்கல்களை சந்தித்து முன்னேறியுள்ளது.
இந்த கட்டிடம் விரைவில் திறந்து பயன்பாட்டிற்கு வருமா? அல்லது மேலும் தாமதமா? என்பதை எதிர்பார்த்து பார்க்க வேண்டும்.
- குரு கிருஷ்ணன்
Click it and Unblock the Notifications
Sign in with Google