விவசாய சட்டங்களுக்கு எதிரான கேரளா சட்டசபை தீர்மானத்துக்கு பாஜக எம்.எல்.ஏ. அதிரடி ஆதரவு

திருவனந்தபுரம்: மத்திய அரசின் விவசாய சட்டங்களுக்கு எதிரான கேரளா சட்டச்பை தீர்மானத்தின் கருத்து வேறுபாடுகள் இருந்தாலும் சில அம்சங்களை ஏற்றுக் கொள்வதாக கூறி பாஜகவின் ஒற்றை எம்.எல்.ஏ. ஓ. ராஜகோபால் அதிரடியாக ஆதரவு தெரிவித்திருப்பது பரபரப்பை ஏற்படுத்தியுள்ளது.

மத்திய அரசின் மூன்று விவசாய சட்டங்களுக்கு எதிராக டெல்லியில் ஒரு மாதத்துக்கும் மேலாக கடும் குளிரில் பல்லாயிரக்கணக்கான விவசாயிகள் போராட்டம் நடத்தி வருகின்றனர். மத்திய அரசும் விவசாய சங்கங்களுடன் தொடர்ந்து பேச்சுவார்த்தை நடத்தி வருகிறது.

இந்த நிலையில் கேரளா சட்டசபையின் சிறப்பு கூட்டத்தில் மத்திய அரசின் மூன்று விவசாய சட்டங்களுக்கு எதிராகவும் இந்த சட்டங்களை திரும்பப் பெறக் கோரியும் தீர்மானம் நிறைவேற்றப்பட்டுள்ளது. இந்த தீர்மானத்துக்கு கேரளா சட்டசபையில் பாஜகவின் ஒரே ஒரு எம்.எல்.ஏ.வாக அக்கட்சியின் மூத்த தலைவர் ஓ. ராஜகோபால் ஆதரவளித்திருக்கிறார்.

கேரளா சட்டசபையில் ஆளும் இடது முன்னணி, பிரதான எதிர்க்கட்சியான ஐக்கிய ஜனநாயக முன்னணி மற்றும் பாஜக எம்.எல்.ஏ. ஆதரவுடன் ஒருமனதாக இந்த தீர்மானம் நிறைவேற்றப்பட்டது. முன்னதாக சட்டசபையில் தீர்மானத்தின் மீது பேசிய பாஜக எம்.எல்.ஏ. ஓ. ராஜகோபால், இதேபோன்ற விவசாய சட்டங்கள் காங்கிரஸ் கட்சியின் தேர்தல் அறிக்கையிலும் இடம்பெற்றிருந்தன. இத்தகைய சட்டங்களை கொண்டுவர வேண்டும் என்று மார்க்சிஸ்ட் கட்சியும் வலியுறுத்தியது. இப்போது விவசாயிகளை தவறாக வழிநடத்த வேண்டாம் என்றார்.

தீர்மானத்துக்கு ஆதரவு தெரிவித்த நிலையில் சட்டசபை வளாகத்தில் செய்தியாளர்களிடம் பேசிய ஓ. ராஜகோபால், சட்டசபையில் தீர்மானம் ஒருமனதாக நிறைவேற்றப்பட்டுள்ளது. நான் என்னுடைய கருத்துகளை முன்வைத்திருக்கிறேன். சட்டசபை தீர்மானத்தின் மீது சில கருத்து வேறுபாடுகளும் உள்ளன. அதை சட்டசபையிலேயே சுட்டிக் காட்டியும் இருக்கிறேன். இந்த தீர்மானத்தை நான் முழுமையாகவே ஆதரிக்கிறேன் என்றார். மத்திய அரசின் விவசாய சட்டங்களுக்கு எதிரான தீர்மானத்துக்கு பாஜக எம்.எல்.ஏ. ஆதரவு அளித்திருப்பது பெரும் பரபரப்பை ஏற்படுத்தி உள்ளது.

English summary

Kerala's Lone BJP MLA O Rajagopal supported the Resolution Against Centre's Farm Laws in Assembly.