விபத்தில் சிக்கிய கேரள முதல்வர் பினராயி விஜயனின் கார்.. அடுத்தடுத்து மோதிய 5 கான்வாய் வாகனங்கள்!

Updated: Monday, October 28, 2024, 21:59 [IST]

Subscribe to Oneindia Tamil

திருவனந்தபுரம்: கேரள முதல்வர் பினராயி விஜயனின் கான்வாய் வாகனங்கள் இன்று சாலையில் சென்று கொண்டிருந்தபோது ஒன்றின் மீது ஒன்று மோதி விபத்துக்குள்ளாகின. இந்த விபத்தில் கேரள முதல்வர் பினராயி விஜயன் பயணித்த வாகனம் லேசாக சேதமடைந்த நிலையிலும், அவர் காயமின்றி தப்பினார்.

கேரள முதல்வர் பினராயி விஜயன் இன்று மாலை கோட்டயத்தில் இருந்து திருவனந்தபுரத்துக்கு சென்று கொண்டிருந்தார். திருவனந்தபுரம் வாமனபுரத்தில் கேரள முதல்வர் பினராயி விஜயனின் கான்வாய் வாகனங்கள் இன்று மாலை சென்று கொண்டிருந்தன. அப்போது திடீரென கான்வாய் வாகனங்களுக்கு முன்னால், இருசக்கர வாகனத்தில் சென்ற பெண் ஒருவர் குறுக்கே வந்துள்ளார்.

இதையடுத்து அந்த ஸ்கூட்டர் மீது மோதாமல் தவிர்ப்பதற்காக கான்வாய் வாகனம் திடீரென பிரேக் போட்டது. இதையடுத்து, பின்னால் வந்த வாகனங்கள் ஒன்றின் மீது ஒன்று மோதின. இந்த விபத்தில், நெருக்கமாக வந்து கொண்டிருந்த ஐந்து கான்வாய் வாகனங்கள் ஒன்றன் பின் ஒன்றாக மோதி விபத்துக்குள்ளானது.

கேரள முதல்வர் பினராயி விஜயன் சென்ற வாகனம் சிறிதளவு சேதம் அடைந்தாலும், அவருக்கு காயம் எதுவும் ஏற்படவில்லை. சிறிது நேரம் தாமதத்திற்குப் பிறகு தொடர்ந்து, அவர் பயணத்தை தொடர்ந்துள்ளார். இந்த சம்பவம் கேரளாவில் பரபரப்பை ஏற்படுத்தியுள்ளது.