மொத்த கேரளமும்.. இந்த ஒரு குற்றத்திற்கு எதிராக கொந்தளித்தது ஏன்? நீதிபதியின் மகன் செய்தது என்ன?
திருவனந்தபுரம்: அதிகாரமும் பதவியும் இருந்தால் எந்தத் தப்பையும் மறைத்துவிடலாம் என்ற மமதைக்கு எதிராக, ஒட்டுமொத்த கேரள மக்களும் சாமானிய குடும்பத்தின் பக்கம் நின்று குரல் கொடுத்து வருகின்றனர். நீதி வழங்கும் பொறுப்பில் இருக்கும் ஒரு மாவட்ட நீதிபதியின் 17 வயது மகன், அதிவேகமாக சொகுசு காரை ஓட்டிச்சென்று ஏழை வியாபாரி ஒருவரின் உயிரைப் பறித்த சம்பவம் அம்மாநிலத்தில் பெரும் கொந்தளிப்பை ஏற்படுத்தியுள்ளது.
விபத்து நடந்த சில மணி நேரங்களிலேயே குற்றவாளி விடுவிக்கப்பட்டதும், காவல் துறை மெத்தனமாக செயல்பட்டதும் மக்களை ஆத்திரமடைய வைத்தது. மக்கள் திரண்டு வந்து காவல் நிலையத்தை முற்றுகையிட்டதையடுத்து, தற்போது காரின் உரிமையாளரான மாவட்ட நீதிபதியின் மீதும் வழக்குப் பதிவு செய்யப்பட்டுள்ளது.
விபத்து நடந்தது எப்படி?
கேரள மாநிலம் கொச்சி சேரநல்லூர் பகுதியைச் சேர்ந்தவர் ஜெயபாலகிருஷ்ணன் (55). சாலையோரம் சிறிய உணவகம் நடத்தி வந்த இவர், வழக்கம் போல் ஞாயிற்றுக்கிழமை அதிகாலை வியாபாரத்தை முடித்துவிட்டு தனது ஸ்கூட்டரில் வீட்டிற்குத் திரும்பிக் கொண்டிருந்தார். அதிகாலை சுமார் 2.20 மணியளவில் கன்டெய்னர் சாலையில் அவர் சென்று கொண்டிருந்தபோது, பின்னால் வந்த மெர்சிடிஸ் பென்ஸ் சொகுசு கார் மின்னல் வேகத்தில் அவரது ஸ்கூட்டர் மீது பயங்கரமாக மோதியது.
அந்த மோதலின் கோரத் தாக்குதலில் ஜெயபாலகிருஷ்ணன் தூக்கி வீசப்பட்டு சம்பவ இடத்திலேயே பரிதாபமாக உயிரிழந்தார். காரை ஓட்டி வந்தது திருச்சூர் இரிஞ்ஞாலக்குடா கூடுதல் மாவட்ட நீதிமன்ற நீதிபதியின் 17 வயது மகன் என்பது விசாரணையில் தெரியவந்தது.
அதிவேகமும் வீடியோ பதிவும்: அம்பலமான உண்மைகள்
காவல் துறையினரின் விசாரணையில் அதிர்ச்சி தரும் தகவல்கள் வெளியாகின. அந்த சிறுவன் மணிக்கு 104 கிலோமீட்டர் வேகத்தில் காரை அதிவேகமாக ஓட்டியதும், ஓட்டும்போதே தனது மொபைல் போனில் வீடியோ பதிவு செய்ததும் தெரியவந்துள்ளது. இந்த வீடியோ ஆதாரத்தை போலீசார் தற்போது கைப்பற்றியுள்ளனர். உரிமம் இல்லாத ஒரு சிறுவனின் கையில், அதுவும் நள்ளிரவில் சக்திவாய்ந்த சொகுசு காரை கொடுத்து அனுப்பியது யார் என்ற கேள்வி பொதுமக்களிடையே எழுந்தது.
ஸ்டேஷன் ஜாமீன்: பற்றி எரிந்த மக்கள் போராட்டம்
விபத்து நடந்தவுடன் கொச்சி சேரநல்லூர் போலீசார் சிறுவனைப் பிடித்து காவல் நிலையத்திற்கு அழைத்துச் சென்றனர். ஆனால், அவனது தந்தை ஒரு மாவட்ட நீதிபதி என்பதால், சிறுவர் நீதிச் சட்டத்தை முன்னிறுத்தி அவசர அவசரமாக காவல் நிலையத்திலேயே அவருக்கு ஜாமீன் வழங்கி அனுப்பி வைத்தனர்.
விபத்தில் கணவனை இழந்து கதறிய ஜெயபாலகிருஷ்ணனின் குடும்பத்தினர், நீதிபதியின் குடும்பத்தினரிடம் இதுபற்றி நியாயம் கேட்டபோது, அவர்கள் அலட்சியமாகவும் அதிகாரத் தோரணையிலும் பேசியதாக குற்றம்சாட்டப்பட்டது. இதையடுத்து, பாதிக்கப்பட்ட குடும்பத்தினருடன் பல்வேறு அரசியல் அமைப்புகள், இளைஞர் அமைப்புகள் மற்றும் பொதுமக்கள் ஒன்றிணைந்து சேரநல்லூர் காவல் நிலையத்தை முற்றுகையிட்டனர். "அதிகாரம் படைத்தவர்களுக்கு ஒரு நீதியா? ஏழையின் உயிருக்கு மதிப்பேயில்லையா?" என்று ஊடகங்களும் பொதுமக்களும் குரல் எழுப்பத் தொடங்கினர்.
மக்களின் அழுத்தத்தால் பின்வாங்கிய காவல் துறை: நீதிபதி மீதும் பிடி இறுகியது
மக்கள் போராட்டம் தீவிரமடைந்ததையடுத்து, காவல் துறை தனது முடிவை மாற்றிக் கொண்டது.
சிறுவன் மீது முதலில் பதிவு செய்யப்பட்டிருந்த கவனக்குறைவால் மரணம் விளைவித்தல் பிரிவை மாற்றி, பிஎன்எஸ் சட்டம் பிரிவு 105-ன் கீழ் (கொலைக்கு நிகரற்ற குற்றச்சாட்டு - Culpable homicide not amounting to murder) கடுமையான வழக்கு பதிவு செய்யப்பட்டது. மோட்டார் வாகனச் சட்டம் பிரிவு 199A-ன் கீழ், காரின் உரிமையாளரும், சிறுவனின் தந்தையுமான கூடுதல் மாவட்ட நீதிபதி மீதும் போலீசார் வழக்குப்பதிவு செய்துள்ளனர். இந்தச் சட்டத்தின்படி, ஓட்டுநர் உரிமம் இல்லாத சிறார்கள் வாகனம் ஓட்டி குற்றம் செய்தால், அதன் உரிமையாளரே பொறுப்பாவார்.
நீதிபதி மீது வழக்குத் தொடுப்பதற்கு கேரள உயர் நீதிமன்றமும் ஒப்புதல் அளித்துள்ளது. வழக்கின் தீவிரத்தைக் கருத்தில் கொண்டு, இதன் விசாரணை மாவட்ட குற்றப்பிரிவு போலீசாருக்கு (Crime Branch) மாற்றப்பட்டுள்ளது.
இறுதியாக வென்றது நீதி
சட்டத்தின் முன் அனைவரும் சமம் என்பதை இந்தச் சம்பவம் மீண்டும் உறுதிப்படுத்தியுள்ளது. உயர் பதவியும் அதிகாரமும் குற்றத்திலிருந்து யாரையும் காப்பாற்ற முடியாது என்பதற்கு மக்களின் இந்த ஒற்றுமைப் போராட்டமே சான்றாக அமைந்தது. அப்பாவி வியாபாரியின் மரணத்திற்கு முழுமையான நீதி கிடைக்கும் வரை போராட்டம் ஓயாது என அப்பகுதி மக்கள் திட்டவட்டமாகத் தெரிவித்துள்ளனர்.
Click it and Unblock the Notifications
Sign in with Google
