தொடர் விடுமுறை.. சுற்றுலா தலங்களில் மக்கள் வெள்ளம்- கோவில்களில் பல மணிநேர காத்திருப்பு தரிசனம்!

Updated: Sunday, November 3, 2024, 12:28 [IST]

Subscribe to Oneindia Tamil

சென்னை: தீபாவளி பண்டிகையை முன்னிட்டு தொடர் விடுமுறை அறிவிக்கப்பட்ட நிலையில் சுற்றுலா தலங்களில் பொதுமக்கள் வெள்ளம் கட்டுக்கடங்காமல் உள்ளது. பிரசித்தி பெற்ற கோவில்களிலும் மக்கள் அலைமோதுவதால் பல மணிநேரம் காத்திருந்து தரிசனம் செய்ய வேண்டிய நிலை ஏற்பட்டது. சுற்றுலா தலங்கள், கோவில்கள் உள்ள பகுதிகளில் கடும் வாகன நெரிசலையும் பொதுமக்கள் எதிர்கொள்ள வேண்டியதானது.

தீபாவளிப் பண்டிகை வியாழக்கிழமை கொண்டாடப்பட்டது. வியாழன் முதல் ஞாயிறு வரை தொடர் விடுமுறை என்பதால் குடும்பத்தினர், உறவினர்களுடன் 'பெட்டியை' கட்டி சுற்றுலா தலங்கள் நோக்கி பொதுமக்கள் படையெடுத்தனர்.

தென் மாவட்டங்களில் கொடைக்கானல், குற்றாலம் உள்ளிட்ட சுற்றுலா தலங்களிலும் நீர்வீழ்ச்சி பகுதிகளிலும் பெருங்கூட்டம் அலை மோதியது. உடுமலைப்பேட்டை அருகே திருமூர்த்தி அணை, அமணலிங்கேஸ்வரர் கோவில் பகுதிகளிலும் மக்கள் அலை அலையாக குவிந்தனர். திருமூர்த்தி மலை பஞ்சலிங்க அருகே, அமணலிங்கேஸ்வர் கோவிலில் அருகே ஓடும் ஆற்று நீரில் பொதுமக்கள் உற்சாக குளியல் போட்டு மகிழ்ந்தனர். பொள்ளாச்சி மாசாணியம்மன் கோவிலில் பக்தர்கள் பல மணிநேரம் நீண்ட வரிசைகளில் காத்திருந்து வழிபாடு செய்தனர்.

திண்டுக்கல் மாவட்டத்தில் கொடைக்கானல் போலவே சிறுமலை, பாச்சலூர், ஆடலூர், தாண்டிக்குடி பகுதிகளிலும் சுற்றுலா பயணிகள் கூட்டம் அலைமோதியது திண்டுக்கல் சுற்றுவட்டாரப் பகுதிகளைச் சேர்ந்தவர்கள் தேனி- வத்தலகுண்டு சாலை அருகே குடகனாறு பாய்ந்தோடும் அனுமந்தராயன் கோட்டை- பித்தளைப்பட்டி தடுப்பணையில் குடும்பம் குடும்பமாக குளித்து மகிழ்ந்தனர். சிறுமலை பகுதிகளில் உள்ள அணைகளிலும் மக்கள் பெருந்திரளாக கூடி இருந்தனர். கொடைக்கானல் மலைக்கு செல்லும் வத்தலகுண்டு, பழனி சாலைகளில் கடுமையாக வாகன நெரிசலையும் சுற்றுலாப் பயணிகள் எதிர்கொண்டனர்.