வெள்ளத்தில் மிதந்த சேலையூர் சாலை.. ஆன்ஸ்பாட்டுக்கு வந்த தாம்பரம் மேயர் வசந்தகுமாரி.. விறுவிறு

சென்னை: சென்னையின் புறநகர் பகுதிகளில் பெய்த மழையால் தாம்பரம் சேலையூரில் சாலையில் மழை வெள்ளம் பெருக்கெடுத்து ஓடியது. இதனிடையே மழை பெய்யத் தொடங்கியதும் உடனடியாக களத்துக்கு வந்து தாம்பரம் மேயர் வசந்தகுமாரி பணிகளை விரைவுபடுத்தினார்.

அதென்னமோ தெரியவில்லை.. வடகிழக்கு பருவ மழையோ, தென்மேற்கு பருவ மழையோ. வங்க கடலில் இருந்து நேராக வானத்துக்கு போகும் மேகக்கூட்டங்கள் அப்படியே நேராக தென் சென்னை பக்கம் தான் பொதுவாக இறங்கி அடிக்கிறது. சென்னையை தாக்கும் ஒவ்வொரு பேய் மழையும், முதலில் தென் சென்னை பகுதியைத்தான் தாக்குகிறது.

குறிப்பாக சொல்வது என்றால், தாம்பரம், மேடவாக்கம், வேளச்சேரி, பள்ளிக்கரணை, ஓஎம்ஆர் சாலைகள், சோழிங்க நல்லூர், பெருங்குடி, மடிப்பாக்கம், சேலையூர், குரோம்பேட்டை, பல்லாவரம் உள்ளிட்ட பகுதிகளில் மழை வெளுத்து வாங்குகிறது. மழை வெளுத்து வாங்கும் போதெல்லாம் இந்த பகுதிகளில் வெள்ள நீர் பெருக்கெடுத்து ஓடுகிறது. மழை நீர் வடிகால்கள் குறைவு மற்றும் பள்ளமான பகுதிகள் என்பால் இந்த பகுதிகள் அதிக அளவு மழை பெய்யும் போதெல்லாம் பாதிக்கப்படுகின்றன.

அந்த வகையில் தென் சென்னை மற்றும் தாம்பரம் உள்ளிட்ட புறநகர் பகுதிகளில் இன்று இரவு கனமழை பெய்தது. மழை காரணமாக பல்வேறு சாலைகளில் மழை நீர் வெள்ளம் பெருக்கெடுத்து ஓடியது. சாலைகளில் சில இடங்களில் மழை நீர் உடனே வெளியேற வழி இல்லாததால் வெள்ளக்கடாக மாறியது.

Tambaram Selaiyur after the rains !!! pic.twitter.com/EwQ9OafRGG

— Tamil Nadu Weatherman (@praddy06) September 23, 2023

தாம்பரம் சேலையூர் பகுதியில் சாலைகளில் மழைநீர் வடிய வேண்டிய வழிகள் மூடிக்கிடந்த காரணத்தால் வெள்ளம் பெரிய அளவில் தேங்கியது. பைக்குகளை பாதிக்கும் மேல் தண்ணீரில் மூழ்கின.வாகன ஓட்டிகள் வாகனத்தை ஓட்ட முடியாமல் அவதிப்பட்டன. ஒருபக்கம் கனமழை என்றால் மறுபக்கம் தண்ணீர் தேங்கி நின்றதால் நீண்ட நேரம் வாகனங்கள் சாலைகளில் தடுமாறியபடி மிக மெதுவாக ஊர்ந்து சென்றன.

இதனிடையே மழை பெய்யத் தொடங்கியதும் உடனடியாக களத்துக்கு வந்தார் தாம்பரம் மேயர் வசந்தகுமாரி. மழையால் சுரங்கப் பாதைகளில் நீர் தேங்காமல் இருக்க முன்னெச்சரிக்கை நடவடிக்கைகளை துரிதப்படுத்தினார். கொட்டும் மழையில் மேயர் வசந்தகுமாரி குடைகளை பிடித்தபடி மாநகராட்சி பணியாளர்களிடம் மழை நீர் தேங்காமல் இருக்குமாறு வழிகளை உருவாக்க அறிவுறுத்தினார்.

English summary

The rains in the suburbs of Chennai led to road flooding in Tambaram Selaiyur. Meanwhile, when it started raining, Tambaram Mayor Vasanthakumari rushed to the field and speed up the work.