வேலூர் கிடையாது.. வெயில் ஊர்! கொளுத்தி எடுத்த வெப்பம்.. சென்னைக்கும் அலர்ட்

சென்னை: தமிழ்நாட்டில் கடந்த சில நாட்களாக வெயில் அதிகமாக பதிவாகி வருகிறது. நேற்று வேலூர் மாவட்டத்தில் 104 டிகிரி ஃபாரன்ஹீட் வெப்பம் பதிவாகியிருக்கிறது. சென்னையிலும் 100 டிகிரி அளவுக்கு வெயில் பதிவாக வாய்ப்பு இருக்கிறது என வானிலை ஆய்வு மையம் எச்சரித்துள்ளது.

இது தொடர்பாக விடுக்கபட்டிருக்கும் அறிவிப்பில், "கடந்த 24 மணி நேரத்தை பொறுத்த அளவில், தென் தமிழகத்தில் (திருநெல்வேலி & தென்காசி மாவட்டங்களில் ஓரிரு இடங்களில் மழை பெய்துள்ளது. வட தமிழகம், புதுவை மற்றும் காரைக்கால் பகுதிகளில் வறண்ட வானிலை நிலவியது. கன்னியாகுமரியில் 1 செ.மீ அளவுக்கு மழை பதிவாகியிருக்கிறது.

29-03-2025 மற்றும் 30-03-2025: தமிழகம், புதுவை மற்றும் காரைக்கால் பகுதிகளில் வறண்ட வானிலை நிலவக்கூடும். 31-03-2025: தென் தமிழகத்தில் ஓரிரு இடங்களில் இடி, மின்னலுடன் கூடிய லேசானது முதல் மிதமான மழை பெய்யக்கூடும். வட தமிழகம், புதுவை மற்றும் காரைக்கால் பகுதிகளில் பொதுவாக வறண்ட வானிலை நிலவக்கூடும். 01-04-2025: தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் இடி, மின்னலுடன் கூடிய லேசானது முதல் மிதமான மழை பெய்யக்கூடும். 02-04-2025 மற்றும் 03-04-2025: தமிழகத்தில் ஒருசில இடங்களிலும், புதுவை மற்றும் காரைக்கால் பகுதிகளிலும் லேசானது முதல் மிதமான மழை பெய்யக்கூடும்.

இன்று சென்னை வானம் ஓரளவு மேகமூட்டத்துடன் காணப்படும். அதிகபட்ச வெப்பநிலை 38" செல்சியஸை ஒட்டியும், குறைந்தபட்ச வெப்பநிலை 26-27° செல்சியஸை ஒட்டியும் இருக்கக்கூடும். மீனவர்களுக்கான எச்சரிக்கை ஏதுமில்லை" என தெரிவிக்கப்பட்டிருக்கிறது.

English summary

In Tamil Nadu, temperatures have been soaring over the past few days. Yesterday, Vellore district recorded a temperature of 104 degrees Fahrenheit. The Meteorological Department has warned that Chennai could also experience temperatures reaching up to 100 degrees Fahrenheit.