தமிழகத்தில் பல மாவட்டங்களில் மழை பிச்சு உதறும்.. லிஸ்டில் சென்னையும் இருக்கு! வானிலை மையம் அலர்ட்

சென்னை: தமிழ்நாட்டில் கடந்த சில வாரங்களாக மழை குறைந்து வெப்பம் அதிகரித்து வந்த நிலையில், இப்போது மீண்டும் மழை தொடங்கியுள்ளது. மாநிலத்தில் ஓரிரு இடங்களில் கடந்த சில நாட்களாகப் பரவலாக மழை பெய்து வருகிறது. இதற்கிடையே வரும் நாட்களில் சென்னை, கோவை உள்ளிட்ட பல மாவட்டங்களில் கனமழைக்கு வாய்ப்பிருப்பதாக வானிலை மையம் எச்சரித்துள்ளது.

கடந்த ஜூன் மாதம் தமிழகத்தில் வறண்ட ஒரு வானிலையே நிலவியது. பெரும்பாலும் எங்கும் மழை பெய்யவில்லை. இதனால் மாநிலத்தில் மெல்ல வெப்பம் அதிகரிக்க ஆரம்பித்தது. இதற்கிடையே கடந்த சில நாட்களில் கிளைமேட் மீண்டும் மாற ஆரம்பித்துள்ளது. தமிழகத்தில் பரவலான இடங்களில் மீண்டும் மழை பெய்ய ஆரம்பித்துள்ளது.

கனமழை

இதனால் தமிழகத்தில் மீண்டும் வெப்பம் படிப்படியாகக் குறைந்து வருகிறது. மாலை நேரங்களில் மழை பெய்வதால் இரவு குளிர்ச்சியான கிளைமேட் நிலவுகிறது. இதற்கிடையே தமிழகத்தில் வரும் நாட்களில் சென்னை, கோவை உட்படப் பல மாவட்டங்களில் கனமழைக்கு வாய்ப்பிருப்பதாக வானிலை மையம் தெரிவித்துள்ளது.

கோவை, நீலகிரி

இது குறித்து வானிலை மையம் வெளியிட்டுள்ள செய்திக்குறிப்பில், "மேற்குத் திசைக் காற்றின் வேக மாறுபாடு காரணமாக இன்று தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் இடி, மின்னலுடன் கூடிய லேசானது முதல் மிதமான மழை பெய்யக்கூடும். நாளை ஜூலை 15ம் தேதி தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் இடி, மின்னலுடன் கூடிய லேசானது முதல் மிதமான மழை பெய்யக்கூடும். நீலகிரி மாவட்டம் மற்றும் கோயம்புத்தூர் மாவட்டத்தின் மலைப்பகுதிகளில் ஓரிரு இடங்களில் கனமழை பெய்ய வாய்ப்புள்ளது.

லிஸ்டில் சென்னையும் இருக்கு

வரும் ஜூலை 16, 17 தேதிகளில் தமிழகத்தில் ஒருசில இடங்களிலும், புதுவை மற்றும் காரைக்கால் பகுதிகளிலும் இடி, மின்னலுடன் கூடிய லேசானது முதல் மிதமான மழை பெய்யக்கூடும். சென்னை, திருவள்ளூர், காஞ்சிபுரம், இராணிப்பேட்டை, நீலகிரி மாவட்டங்கள் மற்றும் கோயம்புத்தூர் மாவட்டத்தின் மலைப்பகுதிகளில் ஓரிரு இடங்களில் கனமழை பெய்ய வாய்ப்புள்ளது.

ஜூலை 18, 19 தேதிகளில் தமிழகத்தில் ஒருசில இடங்களிலும், புதுவை மற்றும் காரைக்கால் பகுதிகளிலும் லேசானது முதல் மிதமான மழை பெய்யக்கூடும். நீலகிரி மாவட்டம் மற்றும் கோயம்புத்தூர் மாவட்டத்தின் மலைப்பகுதிகளில் ஓரிரு இடங்களில் கனமழை பெய்ய வாய்ப்புள்ளது.

அதிகபட்ச வெப்பநிலை

அதிகபட்ச வெப்பநிலை மாறுதலின் போக்கைப் பொறுத்தவரை இன்று தமிழகம், புதுவை மற்றும் காரைக்கால் பகுதிகளில் அதிகபட்ச வெப்பநிலையில் பொதுவாக மாற்றத்திற்கான வாய்ப்பு குறைவு. இயல்பு நிலையிலிருந்து அதிகபட்ச வெப்ப அளவின் வேறுபாட்டைப் பொறுத்தவரை இன்று தமிழகம், புதுவை மற்றும் காரைக்கால் பகுதிகளில் ஒருசில இடங்களில் அதிகபட்ச வெப்பநிலை 2-4° செல்சியஸ் இயல்பை விட அதிகமாக இருக்கக்கூடும்.

13-07-2025 மற்றும் 14-07-2025: அதிக வெப்பநிலையும், அதிக ஈரப்பதமும், குறைந்தபட்ச வெப்பநிலை இயல்பை விட அதிகமாகவும் இருக்கும் நிலையில், தமிழகத்தில் ஓரிரு பகுதிகளில் அசௌகரியம் ஏற்படலாம்.

சென்னை இன்றைய கிளைமேட்

சென்னை மற்றும் புறநகர்ப் பகுதிகளைப் பொறுத்தவரை இன்று (14-07-2025): வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் இடி, மின்னலுடன் கூடிய லேசானது / மிதமான மழை லேசான மழை பெய்ய வாய்ப்புள்ளது. அதிகபட்ச வெப்பநிலை 38-39° செல்சியஸை ஒட்டியும், குறைந்தபட்ச வெப்பநிலை 26-27° செல்சியஸை ஒட்டியும் இருக்கக்கூடும்.

English summary

Meteorological dept Heavy rain alert for various districts (தமிழ்நாட்டில் அடுத்த சில நாட்களில் கனமழை பெய்யும்): Chennai, Coimbatore rain alert across tamil nadu.