Chennai Rain: சென்னையில் திடீரென வெளுத்து வாங்கிய மழை.. அடுத்த ரவுண்டு ஸ்டார்ட்! தென் மாவட்டத்திற்கும் கனமழை அலர்ட்

சென்னை: தமிழகத்தில் மீண்டும் மழை பெய்ய தொடங்கியுள்ளது. சென்னையில் இன்று பரவலாக கனமழை பெய்த நிலையில் கடலோர மாவட்டங்களிலும் லேசான மழை பெய்ய தொடங்கியுள்ளது. இதற்கிடையே இன்று நெல்லை, தென்காசி மாவட்டங்களில் ஒரு சில இடங்களில் கனமழை பெய்ய வாய்ப்பு உள்ளதாகவும், சென்னையில் இன்று விட்டு விட்டு மழை பெய்ய வாய்ப்பு உள்ளதாகவும் வானிலை மையம் கூறியுள்ளது.

தமிழகத்தில் திடீரென இன்று கிளைமேட் மாறியது. தென் மாவட்டங்கள், கடலோர மாவட்டங்களில் இன்று திடீரென கிளைமேட் மாறி குளிர்ச்சியான சூழல் நிலவியது. தலைநகர் சென்னையிலும் இன்று பரவலாக மழை பெய்தது. திடீரென பெய்த மழையால் சென்னை நகரமே குளிர்ந்து போய் உள்ளது.

சென்னையில் கனமழை

இன்று காலை முதலே வெயில் அடிக்காமல் குளிர்ச்சியான ஜில் கிளைமேட்டே நிலவி வந்தது. இந்த நிலையில் காலை 11 மணிக்கு மேல் மழை பெய்தது. சென்னையில் எழும்பூர், கோடம்பாக்கம், நுங்கம்பாக்கம், டி நகர், கிண்டி, ஆலந்தூர் என பல்வேறு இடங்களில் பரவலாக மழை பெய்தது. தொடர்ந்து சென்னையில் ஒரு சில இடங்களில் கனமழை கொட்டியது. ஒரு சில இடங்களில் கனமழையும் பெய்தது. இந்த நிலையில் நெல்லை, தென்காசி மாவட்டங்களில் இன்று கனமழைக்கு வாய்ப்பு உள்ளதாக வானிலை மையம் கூறியுள்ளது.

வானிலை மையம் கூறியிருப்பதாவது:- கிழக்கு திசை காற்றின் வேக மாறுபாடு காரணமாக, இன்று தமிழகத்தில் ஒரு சில இடங்களிலும், புதுவை மற்றும் காரைக்கால் பகுதிகளிலும் இடி, மின்னலுடன் கூடிய லேசானது முதல் மிதமான மழை பெய்யக்கூடும். நெல்லை மாவட்டத்தின் மலைப்பகுதிகள் மற்றும் தென்காசி மாவட்டத்தில் ஓரிரு இடங்களில் கன மழை பெய்ய வாய்ப்புள்ளது.

தென் தமிழகத்தில் மழைக்கு வாய்ப்பு

நாளை தென் தமிழகத்தில் ஒருசில இடங்களிலும், வட தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் இடி, மின்னலுடன் கூடிய லேசானது முதல் மிதமான மழை பெய்யக்கூடும். 18 ஆம் தேதி தென் தமிழகத்தில் ஓரிரு இடங்களில் லேசானது முதல் மிதமான மழை பெய்யக்கூடும். வட தமிழகம், புதுவை மற்றும் காரைக்கால் பகுதிகளில் வறண்ட வானிலை நிலவக்கூடும்.

19 ஆம் தேதி முதல் 21 ஆம் தேதி வரை தமிழகம், புதுவை மற்றும் காரைக்கால் பகுதிகளில் வறண்ட வானிலை நிலவக்கூடும். 22 ஆம் தேதி தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் லேசானது முதல் மிதமான மழை பெய்யக்கூடும்.

குறைந்தபட்ச வெப்பநிலை

16-12-2025 மற்றும் 17-12-2025: தமிழகம், புதுவை மற்றும் காரைக்கால் பகுதிகளில் குறைந்தபட்ச வெப்பநிலையில் பொதுவாக பெரியமாற்றம் ஏதுமில்லை. 18-12-2025 முதல் 20-12-2025 வரை; தமிழகத்தில் குறைந்தபட்ச வெப்பநிலை ஓரிரு இடங்களில் 2-3° செல்சியஸ் இயல்பை விட குறைவாக இருக்கக்கூடும்.

சென்னையில் மழைக்கு வாய்ப்பு

சென்னையில் இன்று (16-12-2025): வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் இடி, மின்னலுடன் கூடிய மிதமான மழை பெய்யக்கூடும். அதிகபட்ச வெப்பநிலை 28° செல்சியஸை ஒட்டியும், குறைந்தபட்ச வெப்பநிலை 23-24" செல்சியஸை ஒட்டியும் இருக்கக்கூடும்.

நாளை (17-12-2025): வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் லேசான மழை பெய்யக்கூடும். அதிகபட்ச வெப்பநிலை 28-29 டிகிரி செல்சியஸை ஒட்டியும், குறைந்தபட்ச வெப்பநிலை 23 டிகிரி செல்சியஸை ஒட்டியும் இருக்கக்கூடும்.

மீனவர்களுக்கான எச்சரிக்கை:

16-12-2025 முதல் 19-12-2025 வரை: தென்தமிழக கடலோரப்பகுதிகள், மன்னார் வளைகுடா மற்றும் குமரிக்கடல் பகுதிகளில் சூறாவளிக்காற்று மணிக்கு 35 முதல் 45 கிலோ மீட்டர் வேகத்திலும் இடையிடையே 55 கிலோ மீட்டர் வேகத்திலும் வீசக்கூடும். என்று கூறப்பட்டுள்ளது.

English summary

Rain has resumed across Tamil Nadu, with widespread showers reported in Chennai and light rain beginning in coastal districts. The weather department has forecast heavy rain at a few places in Tirunelveli and Tenkasi districts, while intermittent rain is expected in Chennai today.